ພວກເຮົາຕ່າງກໍໄດ້ຮຽນຮູ້ ແລະ ເຂົ້າໃຈການກໍາເນີດເກີດຂຶ້ນຂອງພັກປະຊາຊົນ ປະຕິວັດລາວ ອັນມີປະທານໄກສອນ ພົມວິຫານ ເປັນຄັນທຸງ ເປັນຜູ້ຈັດຕັ້ງ ແລະ ນໍາພາທຸກໄຊຊະນະຂອງການປະຕິວັດລາວ ຈົນປະເທດຊາດໄດ້ຮັບການປົດປ່ອຍຢ່າງສົມບູນ ໃນປີ 1975. ຫຼັງຈາກຮຽນຈົບອຸດົມວຽງຈັນ ແລະ ເຮັດໄດ້ວຽກໄລຍະໜຶ່ງ ຂ້າພະເຈົ້າກໍໄດ້ມີໂອກາດໄປຮໍ່າຮຽນ ແລະ ຄົ້ນຄວ້າຢູ່ ນະຄອນຫຼວງ ມົສກູ ສ ໂຊວຽດ ໃນເວລານັ້ນ ຈົນເຖິງປີ 1993 ຈຶ່ງໄດ້ກັບມາ ພ້ອມກັບ ໃບປະກາສະນີຍະບັດແດງ ແລະ ປະລິນຍາເອກ ຝ່າຍຄຸ້ມຄອງເສດຖະກິດ ແລະ ສຶບຕໍ່ປະກອບສ່ວນໃນກົງຈັກລັດ ໃນກະຊວງອຸດສາຫະກໍາການຄ້າ ແລະ ຢູ່ແຂວງບໍລິຄໍາໄຊ ຈົນເຖິງປັດຈຸບັນ.
ວາດພາບບໍ່ອອກວ່າ ຖ້າບໍ່ແມ່ນຢູ່ພາຍໃຕ້ລະບອບໃໝ່, ລູກຊາວນາ ຄືຂ້າພະເຈົ້າ ຊຶ່ງມີພໍ່ ພໍອ່ານອອກຂຽນເປັນ ຍ້ອນໄດ້ບວດຢູ່ວັດ, ແມ່ຮຽນຈົບປະຊາສຶກສາ, ຄົງຈະເປັນເລື່ອງໄຝ່ຝັນທີ່ຈະໄດ້ມີໂອກາດຮໍ່າຮຽນ, ໄດ້ຮັບການອົບຮົມບົ່ມສອນ, ຮຽນຮູ້ໂລກະທັດ, ຊິວະທັດ, ປັດສະຍາ ແລະ ວິຊາການຕ່າງໆ ຄືແນວນີ້, ໄດ້ມີໂອກາດໄປອົບຮົມ, ຮ່ວມປະຊຸມໃນເວທີຕ່າງໆ ທັງພາຍໃນ ແລະ ຕ່າງປະເທດຫຼາຍບ່ອນ.
ໃນຊ່ວງປີ 80 ຂ້າພະເຈົ້າເຄີຍໄດ້ອ່ານໃນວາລະສານ “ວັນນະສິນ” ບໍ່ຈືວ່ານັກກະວີທ່ານໃດຂຽນ (ຕ້ອງຂໍອາໄພ) ຊຶ່ງມີເນື້ອໃນແນວນີ້:
ພັກ ກັບ ແມ່
ແມ່ ໃຫ້ກໍາເນີດແຫ່ງຊີວິດ
ພັກ ໃຫ້ກໍາເນີດແນວຄິດປະຕິວັດ
ແມ່ ຈຸງແຂນພາເຮົາແອບຍ່າງ
ພັກສ່ອງແສງເຍືອງທາງໃຫ້ເຮົາຕໍ່ສູ້
ກູ້ເອົາຊີວິດແທ້ມາໃຫ້ ແມ່ນພັກເຮົາ
ຂ້າພະເຈົ້າຄິດວ່າ ໄດ້ເຮັດສໍາເລັດໜ້າທີ່ ທີ່ພັກລັດໄດ້ມອບໝາຍໃຫ້ ເວົ້າສະເພາະໃນຊ່ວງທ້າຍ 10 ປີມານີ້ ທີ່ເປັນສະມາຊິກສະພາແຫ່ງຊາດ ຊຸດທີ VIII ແລະ ຊຸດທີ IX ໂດຍເຮັດໜ້າທີ່ໃນຖານະເປັນຕົວແທນ ແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ເທົ່າທີ່ມີຄວາມສາມາດ ໃນການປະຕິບັດພາລະບົດບາດຂອງອົງການນິຕິບັນຍັດ, ຮັບຮອງເອົາບັນດາກົດໝາຍ, ຕົກລົງບັນຫາສໍາຄັນພື້ນຖານຂອງຊາດ ແລະ ເຮັດໜ້າທີ່ໃນການຕິດຕາມກວດກາ ການປະຕິບັດລັດຖະທໍາມະນູນ ແລະ ກົດໝາຍ, ສ່ວນຢູ່ຂັ້ນທ້ອງຖິ່ນ ກໍແມ່ນຢູ່ພາຍໃນແຂວງຂອງຕົນ, ສະເພາະຢູ່ແຂວງບໍລິຄໍາໄຊ ມີສະມາຊິກສະພາແຫ່ງຊາດ 7 ທ່ານ ໃນນັ້ນປະຈໍາຢູ່ສູນກາງ 2 ທ່ານ, ສ່ວນຢູ່ສະພາປະຊາຊົນແຂວງບໍລິຄໍາໄຊ ຊຶ່ງມີ 7 ເມືອງນັ້ນ ປະກອບມີ ສະມາຊິກສະພາປະຊາຊົນແຂວງ 30 ທ່ານ.
ໄປຄຽງຄູ່ກັບບັນຍາກາດແຫ່ງການສະເຫຼີມສະຫຼອງດ້ວຍຄວາມເອກອ້າງທະນົງໃຈ ວັນຊາດທີ 2 ທັນວາ ຄົບຮອບ 50 ປີ, ວັນເກີດ ປະທານ ໄກສອນ ພົມວິຫານ ຄົບຮອບ 105 ປີ ສະພາປະຊາຊົນແຂວງບໍລິຄໍາໄຊ ກໍພວມກະກຽມໃຫ້ແກ່ການດໍາເນີນກອງປະຊຸມສະໄໝສາມັນ ເທື່ອທີ 10 ຂອງຕົນ ຊຶ່ງເປັນເທື່ອສຸດທ້າຍຂອງ ຊຸດທີ IV ຊຶ່ງຈະຈັດຂຶ້ນໃນກາງເດືອນທັນວາ 2025 ນີ້. ພ້ອມນີ້ກໍພວມຂຸ້ນຂ້ຽວກະກຽມຮອບດ້ານໃຫ້ແກ່ການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ ຊຸດທີ Vໃນຕົ້ນປີ 2026.
ໃນໂອກາດ ວັນສໍາຄັນທີ່ມີຄວາມໝາຍປະຫວັດສາດຂອງຊາດ, ຂອງພັກ, ຂ້າພະເຈົ້າ ຂໍອວຍພອນໄຊ ອັນປະເສີດ ມາຍັງການນໍາພັກ-ລັດ, ວິລະຊົນແຫ່ງຊາດ, ຜູ້ຊົງຄຸນວຸດທິ, ລຸງປ້າອາວອາ, ນັກຮົບ, ພະນັກງານ, ທະຫານ, ຕໍາຫຼວດ, ປະຊາຊົນລາວບັນດາເຜົ່າ ຈົ່ງມີຄວາມຜາສຸກ ເບີກບານມ່ວນຊື່ນ, ຂໍສະແດງຄວາມຮູ້ບຸນຄຸນ ອີກເທື່ອໜຶ່ງ ຕໍ່ພັກ, ລັດ ທີ່ໄດ້ເອົາໃຈໃສ່ກໍ່ສ້າງຊຸກຍູ້ບໍາລຸງໃຫ້ ຂ້າພະເຈົ້າໄດ້ມີໂອກາດສຶກສາຮໍ່າຮຽນມີຄວາມຮູ້, ຄວາມສາມາດ ແລະ ໄດ້ປະກອບສ່ວນພັດທະນາສ້າງສາບ້ານເມືອງ ແລະ ເຊື່ອໝັ້ນວ່າ ປະເທດຊາດຂອງພວກເຮົາ ພວມກ້າວເດີນສູ່ເສັ້ນທາງອັນສະຫວ່າງສະໃຫວຈະເລີນກ້າວໜ້າ ຕາມຈຸດໝາຍທີ່ໄດ້ກໍານົດໄວ້ຢ່າງແນ່ນອນ.
ຄໍາເຫັນ