ການນຳກະຊວງ ກສ ລົງຊີ້ນໍາການແກ້ໄຂບັນຫາໄຟໄໝ້ລາມປ່າ ຢູ່ເຂດພູເຂົາຄວາຍ ແລະ ພູພະນັງ

ໃນໂອກາດນີ້, ທ່ານລັດຖະມົນຕີ ກະຊວງ ກສ ໄດ້ກ່າວເປີດກອງປະຊຸມໂດຍເນັ້ນໜັກວ່າ: ປ່າສະຫງວນແຫ່ງຊາດພູພະນັງ ແລະ ອຸທິຍານແຫ່ງຊາດພູເຂົາຄວາຍ ທີ່ໄດ້ຮັບການສ້າງຕັ້ງຂຶ້ນນັບແຕ່ປີ 1993 ຕາມດຳລັດຂອງນາຍຍົກລັດຖະມົນຕີ ສະບັບເລກທີ 164/ນຍ ແມ່ນເຂດຍຸດທະສາດທີ່ສຳຄັນ ທີ່ມີບົດບາດຕໍ່ການພັດທະນາເສດຖະກິດ-ສັງຄົມ, ລະບົບນິເວດ, ສິ່ງແວດລ້ອມ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບ ຂອງບັນດາແຂວງໃກ້ຄຽງ ແລະ ນະຄອນຫຼວງວຽງຈັນ.

ເຖິງຢ່າງໃດກໍຕາມ, ໃນປີ 2026 ນີ້ ສະພາບໄຟໄໝ້ປ່າແມ່ນມີຄວາມຮຸນແຮງທີ່ສຸດເມື່ອທຽບໃສ່ໄລຍະຜ່ານມາ ຊຶ່ງບາງເຫດການບໍ່ສາມາດຄວບຄຸມໄດ້ດ້ວຍກຳລັງພາກພື້ນດິນ ຈົນຕ້ອງໄດ້ນຳໃຊ້ເຮືອບິນເຂົ້າຊ່ວຍດັບມອດ. ສາເຫດຕົ້ນຕໍແມ່ນເກີດຈາກການບຸກລຸກຈັບຈອງທີ່ດິນ, ການລັກລອບຕັດໄມ້ ແລະ ການຈູດປ່າຊະຊາຍ ເຮັດໃຫ້ເກີດບັນຫາໝອກຄວັນ ແລະ ມົນລະພິດທາງອາກາດປົກຄຸມຢ່າງໜັກໜ່ວງ.

ອີງຕາມບົດລາຍງານຕົວຈິງຈາກແຂວງວຽງຈັນ, ເນື້ອທີ່ປ່າໄມ້ທົ່ວແຂວງມີທັງໝົດ 677,329 ເຮັກຕາ. ນັບແຕ່ຕົ້ນປີ 2026 ຈົນເຖິງວັນທີ 7 ເມສາ, ໄດ້ເກີດເຫດໄຟໄໝ້ປ່າໃນ 10 ເມືອງ, ສ້າງຄວາມເສຍຫາຍແກ່ເນື້ອທີ່ປ່າໄມ້ເຖິງ 3,117.42 ເຮັກຕາ. ໃນນັ້ນ, ເມືອງທີ່ໄດ້ຮັບຜົນກະທົບຫຼາຍກວ່າໝູ່ແມ່ນ ເມືອງແກ້ວອຸດົມ ເສຍຫາຍ 520 ເຮັກຕາ ແລະ ເມືອງຫີນເຫີບ ເສຍຫາຍ 494 ເຮັກຕາ (ກວມເອົາເຂດປ່າສະຫງວນແຫ່ງຊາດພູພະນັງ). ສິ່ງທ້າທາຍສຳຄັນແມ່ນສະພາບພູມສັນຖານທີ່ຊັນ, ອຸປະກອນຮັບໃຊ້ບໍ່ພຽງພໍ ແລະ ງົບປະມານສຸກເສີນຍັງມີຈຳກັດ.

ເພື່ອແກ້ໄຂບັນຫາດັ່ງກ່າວຢ່າງເດັດຂາດ, ທ່ານລັດຖະມົນຕີໄດ້ເຈາະຈີ້ມໃຫ້ຄະນະຮັບຜິດຊອບ ແລະ ພາກສ່ວນກ່ຽວຂ້ອງສຸມໃສ່ວຽກງານຈຸດສຸມ ດັ່ງນີ້: 1) ການບັງຄັບໃຊ້ກົດໝາຍ: ຈັດຕັ້ງປະຕິບັດຄຳສັ່ງເລກທີ 11/ນຍ ແລະ 15/ນຍ ຢ່າງເຂັ້ມງວດ, ຕີລາຄາຄືນຜົນໄດ້ຮັບ ແລະ ຂໍ້ຄົງຄ້າງ ເພື່ອແກ້ໄຂປະກົດການຫຍໍ້ທໍ້ໃນການບຸກລຸກປ່າໄມ້ໃຫ້ເດັດຂາດ; 2) ການປັບປຸງກົງຈັກ: ພິຈາລະນາການບັນຈຸພະນັກງານຄຸ້ມຄອງປ່າໄມ້ໃຫ້ສອດຄ່ອງກັບຫຼັກການສາກົນ ໂດຍເນັ້ນໃສ່ກຳລັງພົນຢູ່ຂັ້ນເມືອງ ແລະ ເຂດອຸທິຍານ ໃຫ້ກວມເອົາ 65% - 80% ຂອງພະນັກງານທັງໝົດ; 3) ມາດຕະການໄລຍະຍາວ: ສ້າງແຜນການດຳເນີນງານທີ່ເປັນຮູບປະທຳ, ຍົກລະດັບຄວາມຮູ້ໃຫ້ແກ່ຄະນະຕອບໂຕ້ໄພພິບັດຂັ້ນບ້ານ ແລະ ສ້າງກອງທຶນສຸກເສີນເພື່ອຮັບໃຊ້ວຽກງານນີ້ໂດຍສະເພາະ. ນອກຈາກນັ້ນ, ທ່ານລັດຖະມົນຕີຍັງໄດ້ຮຽກຮ້ອງໃຫ້ທຸກພາກສ່ວນ ຈົ່ງຮ່ວມມືກັນຢ່າງຈິງຈັງ ເພາະວຽກງານນີ້ແມ່ນໜ້າທີ່ຂອງທົ່ວສັງຄົມ ເພື່ອປົກປັກຮັກສາຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ມີຄວາມຍືນຍົງຕະຫຼອດໄປ.

ໃນຕອນທ້າຍຂອງພິທີ, ທ່ານ ລິນຄຳ ດວງສະຫວັນ ຍັງໄດ້ຕາງໜ້າໃຫ້ກະຊວງມອບເງິນຊ່ວຍເຫຼືອຈຳນວນ 60 ລ້ານກີບ ແລະ ນໍ້າດື່ມຈຳນວນ 150 ແຟັກ ໃຫ້ແກ່ຄະນະອົງການປົກຄອງ 4 ແຂວງ (ແຂວງວຽງຈັນ, ບໍລິຄຳໄຊ, ໄຊສົມບູນ ແລະ ນະຄອນຫຼວງວຽງຈັນ) ເພື່ອນຳໃຊ້ເຂົ້າໃນວຽກງານສະກັດກັ້ນ ແລະ ດັບມອດໄຟປ່າໃນຄັ້ງນີ້. ຈາກນັ້ນ, ທ່ານລັດຖະມົນຕີ ພ້ອມດ້ວຍຄະນະ ໄດ້ລົງຕິດຕາມເບິ່ງສະພາບການໄຟໄໝ້ປ່າຕົວຈິງໃນບາງຈຸດທີ່ສຳຄັນ ເພື່ອປະເມີນສະຖານະການ ແລະ ວາງແຜນການເຂົ້າຊ່ວຍເຫຼືອໃນຂັ້ນຕໍ່ໄປໃຫ້ທ່ວງທັນການ.

(ແຫຼ່ງຂ່າວ: ເສດຖະກິດ-ການຄ້າ)