ການນໍາແຂວງ ລົງຊຸກຍູ້ວຽກງານການປູກພືດລະດູແລ້ງຢູ່ເມືອງຫຼວງນ້ຳທາ

ທ່ານ ສິງໄຊ ພອນສະຫວາດ ກໍາມະການພັກເມືອງ ຫົວໜ້າຫ້ອງການກະສິກໍາ ແລະ ສິ່ງແວດລ້ອມເມືອງ ໄດ້ລາຍງານສະພາບການຈັດຕັ້ງປະຕິບັດວຽກງານກະສິກໍາ ແລະ ສິ່ງແວດລ້ອມເມືອງ ປະຈໍາ 9 ເດືອນ ແລະ ທິດທາງແຜນການ 3 ເດືອນທ້າຍປີ 2025 ໃຫ້ຫົວໜ້າພະແນກກະສິກໍາ ແລະ ສິ່ງແວດລ້ອມແຂວງ ໄດ້ຮັບຊາບ: ໃນໄລຍະ 9 ເດືອນຜ່ານມາ ຄະນະຫ້ອງການ ໄດ້ລົງຊຸກການຜະລິດເຂົ້ານາແຊງ ໃນເນື້ອທີ່ 24 ເຮັກຕາ ຜົນຜະລິດໄດ້ 72 ໂຕນ, ເນື້ອທີ່ ສາລີຫວານ 96 ເຮັກຕາ, ຜົນຜະລິດໄດ້ 576 ໂຕນ ເທົ່າກັບ 77%; ເນື້ອທີ່ປູກເຜືອກມັນຕ່າງໆ 77 ເຮັກຕາ ຜົນຜະລິດໄດ້ 814 ໂຕນ ເທົ່າກັບ 68%; ເນື້ອທີ່ພືດຜັກຕ່າງໆ 1,001 ເຮັກຕາ ຜົນຜະລິດ 5.264 ໂຕນ ເທົ່າກັບ 74%; ເນື້ອທີ່ໄມ້ໃຫ້ໝາກ 393 ເຮັກຕາ ຜົນຜະລິດ 6,298 ໂຕນ ເທົ່າກັບ 73%; ການປູກສາລີແຂງ ເນື້ອທີ່ 354 ເຮັກຕາ ຜົນຜະລິດ ຕົວຈິງໄດ້ 1,947ໂຕນ ເທົ່າກັບ 89%; ພືດອຸດສາຫະກໍາ ມີ 191 ເຮັກຕາ ຜົນຜະລິດ ຕົວຈິງໄດ້ 1,662 ໂຕນ ເທົ່າກັບ 67%; ການປຸກພືດຕະກຸນຖົ່ວ ເນື້ອທີ່ 350 ເຮັກຕາ ຜົນຜະລິດ ຕົວຈິງໄດ້ 3,018 ໂຕນ ເທົ່າກັບ 84%; ເນື້ອທີ່ປູກຢາງພາລາ 9,546 ເຮັກຕາ ເນື້ອທີ່ປາດຢາງແລ້ວ 8,321 ເຮັກຕາ ຜົນຜະລິດ 27.781 ໂຕນ ແລະ ອື່ນໆ.

ໂອກາດນີ້, ທ່ານ ພິມແກ້ວ ທໍາລະສິນ ໄດ້ກ່າວສະແດງຄວາມຊົມເຊີຍຜົນງານຂອງຫ້ອງການກະສິກໍາ ແລະ ສິ່ງແວດລ້ອມເມືອງ ໃນໄລຍະຜ່ານມາ ພ້ອມທັງຮຽກຮ້ອງໃຫ້ຄະນະຫ້ອງການເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກເມືອງ ຄັ້ງທີ Xl ຂອງເມືອງໃຫ້ປະກົດຜົນເປັນຈິງ, ເຕົ້າໂຮມຄວາມສາມັກຄີເປັນປຶກແຜ່ນ, ເອົາໃຈໃສ່ຈັດຕັ້ງປະຕິບັດໜ້າທີ່ວິຊາສະເພາະໃຫ້ມີຜົນສໍາເລັດ, ມີການສະຫຼຸບລາຍງານ, ຖອດຖອນບົດຮຽນ, ເອົາໃຈໃສ່ຄຸ້ມຄອງປ່າໄມ້, ສະກັດກັ້ນໄຟໄໝ້ລາມປ່າ, ເກັບກໍາຂໍ້ມູນການພັດທະນາຊົນນະບົດແກ້ໄຂຄວາມທຸກຍາກ, ຈັດສັນເນື້ອທີ່ທໍາການຜະລິດເຂດລ້ຽງ, ເຂດປຸກ, ເອົາໃຈໃສ່ຊຸກຍູ້ປະຊາຊົນຜະລິດພຶດລະດູແລ້ງໃຫ້ທ່ວງທັນການເວລາ. ໃນໂອກາດນີ້, ກໍໄດ້ມອບເງິນ ຈໍານວນ 15 ລ້ານກີບ ໃຫ້ຫ້ອງການກະສິກໍາ ແລະ ສິ່ງແວດລ້ອມເມືອງ ເພື່ອນໍາໃຊ້ເຂົ້າໃນການເຄື່ອນໄຫວວຽກງານຊຸກຍູ້ການຜະລິດປຸກພຶດລະດູແລ້ງ ທີ່ຈະມາເຖີງນີ້ ແລະ ມອບຄອມພີວເຕີຕັ້ງໂຕະ ຈໍານວນ 1 ຊຸດ ໃຫ້ຫ້ອງວ່າການເມືອງຫຼວງນໍ້າທາ ມູນຄ່າ 13 ລ້ານກວ່າກີບ.

(ຂ່າວ: ຄໍາຕັນ ອຸ່ນຄໍາ)