ການນຳແຂວງຫຼວງພະບາງ ຢ້ຽມ​ຢາມບໍ​ລິ​ສັດຊີມັງຫຼວງພະບາງ ຈຽງເກີ ຈໍາກັດ

ໂອກາດນີ້ ຜູ້ອໍານວຍ ບໍລິສັດ ຊີມັງ ຫຼວງພະບາງ ຈຽງເກີ ຈໍາກັດ ຜູ້ດຽວ ໄດ້ລາຍງານສະພາບ ການເຄື່ອນໄຫວຈັດຕັ້ງປະຕິບັດຂອງບໍລິສັດວ່າ: ໂຮງງານຊີມັງ ຈຽງເກີ ແມ່ນໂຄງການທີ່ສໍາຄັນ ຕາມນະໂຍບາຍໜຶ່ງແລວ-ໜຶ່ງເສັ້ນທາງ ຂອງ ສປ ຈີນ ຊຶ່ງມີໂຮງງານແຫ່ງທຳອິດຕັ້ງຢູ່ແຂວງອຸດົມໄຊ ແລະໄດ້ມາຂະຫຍາຍ ມາຕັ້ງຢູ່ເມືອງນໍ້າບາກ ແຂວງຫຼວງພະບາງ, ເປັນໂຮງງານຜະລິດຊີມັງທີ່ມີການຕິດຕັ້ງເຄື່ອງຈັກ-ອຸປະກອນເຕັກໂນໂລຊີ ການຜະລິດທີ່ທັນສະໄໝ, ເປັນໂຮງງານຂະໜາດໃຫຍ່ກວ່າໝູ່ຢູ່ໃນ ສປປ ລາວ, ສາມາດຕອບສະໜອງຄວາມຕ້ອງການຂອງຕະຫຼາດ ທັງປະລິມານ ແລະຄຸນນະພາບ ຜ່ານການຢັ້ງຢືນມາດຕະຖານສາກົນ ISO 9001 ແລະ 2015, ບໍລິສັດ ຊີມັງ ຫຼວງພະບາງ ຈຽງເກີ ຈໍາກັດ ຜູ້ດຽວ ເປັນສາຂາຂອງບໍລິສັດ ຊີມັງກຸ່ຍໂຈຈຽງເກີ ຈໍາກັດ ໃນກຸ່ມບໍລິສັດຢົງຟູກຸ່ຍ ຂອງ ສປ ຈີນ ທີ່ເປັນຜູ້ລົງທຶນທັງໝົດ, ສາມາດຜະລິດຊີມັງໄດ້ 2,000,000 ໂຕນຕໍ່ປີໂດຍສະໜອງໃຫ້ໂຄງການກໍ່ສ້າງເຊັ່ນ: ກໍ່ສ້າງເສັ້ນທາງດ່ວນ, ເຂື່ອນໄຟຟ້ານໍ້າຕົກ, ທາງແລ່ນໃນສະໜາມບິນ, ຂົວ, ອຸໂມງ, ກໍ່ສ້າງອາຄານ ແລະອື່ນໆ.

ປັດຈຸບັນ “ຊີມັງຈຽງເກີ” ໄດ້ຈໍາໜ່າຍເຂົ້າສູ່ຕະຫຼາດໃນພາກເໜືອ ຂອງ ສປປ ລາວ ແລະສົ່ງອອກໄປປະເທດໄທ, ຫວຽດນາມ, ຈີນ ແລະມຽນມາ. ພ້ອມນັ້ນ ບໍລິສັດໄດ້ສ້າງວຽກເຮັດງານທຳໃຫ້ປະຊາຊົນຢູ່ທ້ອງຖິ່ນ ໃຫ້ມີລາຍຮັບທີ່ໝັ້ນຄົງ ໂດຍມີນະໂຍບາຍສູງ, ມີທີ່ພັກອາໄສ ແລະອາຫານໃຫ້ໃນແຕ່ລະວັນ, ທັງມີນະໂຍບາຍການສຶກສາຮ່ຳຮຽນ, ຝຶກອົບຮົມໃຫ້ພະນັກງານ ໃຫ້ມີໂອກາດເລື່ອນຊັ້ນ ເລື່ອນຕຳແໜ່ງ ຕາມຄວາມເໝາະສົມ.

ຕາມວິໄສທັດຂອງບໍລິສັດ ຊີມັງ ຫຼວງພະບາງ ຈຽງເກີ ຈໍາກັດ ຜູ້ດຽວ ແມ່ນໃຫ້ກາຍເປັນວິສາຫະກິດ ທີ່ມີຄວາມສາມາດໃນການແຂ່ງຂັນໄດ້ໃນລະດັບສູງ ແລະມີຄວາມຮັບຜິດຊອບຕໍ່ສັງຄົມ ໂດຍພະຍາຍາມຢຶດຖືຍຸດທະສາດແບບແຜນທ້ອງຖິ່ນ, ປະກອບສ່ວນພັນທະຕໍ່ລັດຖະບານຕາມລະບຽບການ ແລະກົດໝາຍ, ສ້າງໂອກາດໃຫ້ປະຊາຊົນບັນດາເຜົ່າມີວຽກເຮັດງານທໍາ.

ໂອກາດນີ້, ທ່ານ ບຸນເລື່ອມ ມະນີວົງໄດ້ສະແດງຄວາມຍ້ອງຍໍຕໍ່ບໍລິສັດ ທີ່ໄດ້ປະກອບສ່ວນ ຊ່ວຍເຫຼືອພັດທະນາ ແລະປັບປຸງພື້ນຖານໂຄງລ່າງ ພາຍໃນແຂວງຫຼວງພະບາງ, ພ້ອມທັງເນັ້ນໃຫ້ສືບຕໍ່ຊຸກຍູ້ ການສ້າງວຽກເຮັດງານທໍາ ໃຫ້ປະຊາຊົນລາວ ແລະຊ່ວຍປະກອບສ່ວນສ້ອມແປງເສັ້ນທາງ ພາຍໃນແຂວງຕາມຄວາມເໝາະສົມ.

ພາບ-ຂ່າວ: ທະນູສິນ ອິດທິພົນ