ການນຳແຂວງສະຫວັນນະເຂດຊົມການສະແດງຊ້ອມຮົບປະສານຍິງລູກປືນແທ້ຢູ່ພາກສະໜາມ 

ໃນວັນທີ16 ມັງກອນຜ່ານມາ, ກອງບັນຊາການທະຫານແຂວງສະຫວັນນະເຂດໄດ້ຈັດພິທີຊ້ອມຮົບປະສານຍິງລູກປືນແທ້ຢູ່ພາກສະໜາມຂຶ້ນທີ່ສະໜາມຊ້ອມຮົບກອງພົນທະຫານຮາບທີ 4 ບ້ານຫ້ວຍລະຄຶ ເມືອງທ່າປາງທອງ ແຂວງສະຫວັນນະເຂດ ໂດຍມີສະຫາຍ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ທັງເປັນປະທານຄະນະກໍາມະການປ້ອງກັນຊາດ(ປກຊ)-ປ້ອງກັນຄວາມສະຫງົບ(ປກສ)ແຂວງ ພ້ອມດ້ວຍຄະນະ, ມີນາຍ ແລະ ພົນທະຫານເຂົ້າຮ່ວມຮັບຊົມ,ໂດຍການຕ້ອນຮັບຂອງສະຫາຍ ພົຈວາ ສີ ທະວີໄຊ ຫົວໜ້າການເມືອງກອງບັນຊາການທະຫານແຂວງພ້ອມດ້ວຍຄະນະພັກ-ຄະນະບັນຊາອົງການ5 ຫ້ອງກອງບັນຊາການທະຫານແຂວງ.
    ສະຫາຍ ພັນເອກ ພັນວິໄລ ລາດສະຍົນ ຮອງຫົວໜ້າການທະຫານ ຫົວໜ້າຫ້ອງເສນາທິການທະຫານແຂວງ ຜູ້ບັນຊາການຊ້ອມຮົບປະສານຍິງລູກປືນແທ້ຢູ່ພາກສະໜາມ ກ່າວວ່າ:ການຊ້ອມຮົບຄັ້ງນີ້ປະກອບມີ: ການສະແດງ“ຈັ້ງທ່າ”, ໝວດລົດຕັງ-ຫຸ້ມເກາະ,ງໍທຮ 4 ສູ້ຮົບຈັ້ງທ່າຢູ່ພູມີປະເທດພູຜາປ່າດົງ. ທັງນີ້ເພື່ອເປັນການຫັດແອບໃຫ້ນາຍ ແລະພົນທະຫານມີຄວາມເຂັ້ມແຂງ, ມີຄວາມຮັບຮູ້, ເຂົ້າໃຈຢ່າງເລິກເຊິ່ງ, ມີຄວາມຊໍານານທາງດ້ານສິລະປະຍຸດ, ຍຸດທະວິທີໃນການນໍາໃຊ້ອາວຸດຍຸດໂທປະກອນ, ຮູ້ຈັງຫວະບາດກ້າວ, ການກະທໍາ, ທ່າ ແລະຈັງຫວະໃນການສູ້ຮົບຂອງກອງທັບ. ການຊ້ອມຮົບດັ່ງກ່າວຍັງສາມາດຮັບປະກັນໄດ້ຄວາມປອດໄພ100% ແລະເປົ້າໝາຍຫຼາຍເປົ້າທີ່ໜ້າສະໜາມຊ້ອມຮົບໄດ້ຖືກທໍາລາຍ ແລະດັບສູນເປັນຈໍານວນຫຼາຍ.
ໃນວັນດຽວກັນ,ການນຳແຂວງພ້ອມຄະນະໄດ້ເຄື່ອນໄຫວຕິດຕາມຊຸກຍູ້ການສ້າງຂົວເຊປອງ ບ້ານຫີນຕັ້ງກາງ ເມືອງທ່າປາງທອງ ແລະ ເຄື່ອນໄຫວຢ້ຽມຢາມກອງພັນທະຫານຮາບທີ 4.ຈາກນັ້ນ, ຄະນະນຳແຂວງໄດ້ເຂົ້າຮ່ວມພິທີມອບເຮືອລາດຕະເວນກອງຮ້ອຍທະຫານຊາຍແດນຈຳນວນ 10 ລຳທີ່ກອງບັນຊາການທະຫານແຂວງ.
ຂ່າວ-ພາບ: ສະຫວັນນະເຂດ