ການນຳເມືອງຄູນຄຳລົງຕິດຕາມສະພາບນ້ຳຖ້ວມ

ການລົງຕິດຕາມໃນຄັ້ງນີ້ພົບວ່າລະດັບນ້ຳເພີ່ມຂຶ້ນຫຼາຍຈົນເຮັດໃຫ້ ເສັ້ນທາງສັນຈອນຄູນຄຳ-ກອງລໍ ເຂດບ້ານນາຄຳ ລົງຫາບ້ານນາກາງຖືກຕັດຂາດ, ລົດນ້ອຍ-ໃຫຍ່ ບໍສາມາດໄປມາໄດ້, ນ້ຳກໍເລີ່ມໄຫຼເຮືອນ, ບາງພື້ນທີ່ ເຂົ້າຮອດຊັ້ນລຸ່ມຂອງເຮືອນປະຊາຊົນໂດຍສະເພາະເຂດບ້ານນາກາງ, ບ້ານແກ້ງ ແລະ ບ້ານມ່ວງນ້ຳສາງ, ໄຮ່ນາບາງສ່ວນຖືກນ້ຳຖ້ວມ, ສ່ວນເຂດບ້ານໜອງຮາງເກົ່າແມ່ນຖືກນ້ຳຖ້ວມ ການສັນຈອນຖືກຕັດຂາດ ປັດຈຸບັນປະຊາຊົນແມ່ນນຳໃຊ້ເຮືອຈັກເລັ່ງຍົກຍ້າຍສັດ ແລະ ສັບສິນມີຄ່າໄປໄວ້ບ່ອນທີ່ປອດໄພ.

ການລົງຕິດຕາມໃນຄັ້ງນີ້ ການນຳຂອງເມືອງຄູນຄຳ ໄດ້ໃຫ້ອົງການປົກຄອງບ້ານ, ຂະແໜງການທີ່ກ່ຽວຂ້ອງ ເຝົ້າລະວັງຕະຫຼອດ 24 ຊົ່ວໂມງ ຖ້າຫາກລະດັບນ້ຳຍັງເພີ່ມຂຶ້ນ ໃຫ້ແຈ້ງປະຊາຊົນອົບພະຍົກອອກຈາກບ່ອນທີ່ມີຄວາມສ່ຽງໂດຍໄວແລະ ແຈ້ງໃຫ້ເມືອງຮັບຊາບ ເພາະປັດຈຸບັນເຮືອຈັກຂອງເມືອງກໍທຽບທ່າກຽມພ້ອມຊ່ວຍເຫຼືອປະຊາຊົນຢ່າງເຕັມຄວາມສາມາດ ແລະ ການລົງຕິດຕາມໃນຄັ້ງນີ້ການນຳເມືອງຄູນຄຳ ຍັງໄດ້ມອບເຄື່ອງບໍລິໂພກຈຳນວນໜື່ງ ໃຫ້ແກ່ປະຊາຊົນຜູ້ທີ່ໄດ້ຮັບຜົນກະທົບຈາກນ້ຳຖ້ວມອີກດ້ວຍ.

ຂ່າວ: ເມືອງຄູນຄຳ