ຫຼາຍປະເທດໃກ້ຄຽງ ກໍມີຄວາມພະຍາຍາມເຊັ່ນກັນ ທັງໝົດເພື່ອແນໃສ່ເຮັດໃຫ້ພື້ນທີ່ ໃນຕົວເມືອງກາຍເປັນພື້ນທີ່ສີຂຽວ ຫຼື ສ ສີຂຽວ, ເປັນມິດຕໍ່ສິ່ງແວດລ້ອມ ແລະ ເຮັດໃຫ້ຄຸນະພາບຊີວິດຂອງປະຊາຊົນດີຂຶ້ນ.
ຜູ້ຂຽນມີໂອກາດໄດ້ເຂົ້າຮ່ວມໂຄງການສ້າງຄວາມເຂັ້ມແຂງໃຫ້ສື່ມວນຊົນ ໂດຍການມີສ່ວນຮ່ວມຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມ ເພື່ອພັດທະນາສີຂຽວ ໃນ ສປປ ລາວ ໂດຍໄດ້ຮັບການສະໜັບສະໜູນຈາກສະຫະພາບເອີຣົບ. ໃນນັ້ນ, ຍັງໄດ້ໄປສຶກສາຮຽນຮູ້ການລາຍງານຂ່າວສີຂຽວ ກັບນັກຂ່າວສິ່ງແວດລ້ອມຊື່ດັງຂອງປະເທດໄທ ເຮັດໃຫ້ຜູ້ຂຽນເຂົ້າໃຈບັນຫາສິ່ງແວດລ້ອມຫຼາຍຂຶ້ນ ໂດຍສະເພາະການລາຍງານຂ່າວບັນຫາສີຂຽວ ເພື່ອນໍາມາເປັນບົດຮຽນ ເຜີຍແຜ່ໂຄສະນາຢູ່ ສປປ ລາວ ໃຫ້ສັງຄົມໄດ້ຮັບຮູ້ ແລະ ເຂົ້າໃຈຢ່າງກວ້າງຂວາງ. ໂອກາດນີ້, ຜູ້ຂຽນຍັງໄດ້ຮັບຮູ້ວ່າ: ປັດຈຸບັນກຸງເທບມະຫານະຄອນ (ກທມ) ກໍໄດ້ຖືສໍາຄັນເອົາໃຈໃສ່ການເພີ່ມພື້ນທີ່ສີຂຽວດ້ວຍການສ້າງສວນ 15 ນາທີ ແລະ ມີນະໂຍບາຍການໃຊ້ກົນໄກຕ່າງໆ ທັງໝົດແມ່ນຄວາມຫວັງການສ້າງພື້ນທີ່ສີຂຽວ ກທມ.
ຫຼາຍທ່ານອາດຍັງບໍ່ເຂົ້າໃນວ່າສວນ 15 ນາທີ ແມ່ນສວນແນວໃດ, ສວນດັ່ງກ່າວເປັນນະໂຍບາຍການເພີ່ມພື້ນທີ່ສີຂຽວ ແລະ ພື້ນທີ່ສາທາລະນະ ທີ່ປະຊາຊົນສາມາດເຂົ້າເຖິງໄດ້ພາຍໃນ 10-15 ນາທີ ຫຼື ປະມານ 400-800 ແມັດ ໂດຍອາໃສຄວາມຮ່ວມມືຂອງພາກລັດ ແລະ ເອກະຊົນ ເພື່ອພັດທະນາພື້ນທີ່ເດີມຄວບຄູ່ໄປກັບການເພີ່ມພື້ນໃໝ່. ປັດຈຸບັນພື້ນທີ່ສີຂຽວໃນ ກທມ ມີພຽງ 2.6% ຂອງພື້ນທີ່ທັງໝົດ ຊຶ່ງຖືວ່າຍັງຕໍ່າເມືອງທຽບກັບເມືອງອື່ນໆໃນໂລກ. ດັ່ງນັ້ນ, ກທມ ຈຶ່ງມີຄວາມພະຍາຍາມເພີ່ມພື້ນທີ່ສີຂຽວ ໃຫ້ເປັນມິດຕໍ່ສິ່ງແວດລ້ອມ ໂດຍໄດ້ມີສວນ 15 ນາທີ ຫຼາຍຂຶ້ນ. ສວນດັ່ງກ່າວນີ້, ຈະຊ່ວຍໃຫ້ດູດຊັບມົນລະພິດທາງອາກາດ ແລະ ສ້າງອາກາດບໍລິສຸດ ໃຫ້ກັບປະຊາຊົນ, ຊ່ວຍໃຫ້ປະຊາຊົນມີພື້ນທີ່ສໍາລັບຜັກຜ່ອນຢ່ອນໃຈ, ອອກກໍາລັງກາຍ ແລະ ເຮັດກິດຈະກໍາຕ່າງໆ, ສາມາດຊ່ວຍກັກເກັບນໍ້າຝົນ ແລະ ຫຼຸດຜ່ອນບັນຫານໍ້າຖ້ວມໃນ ກທມ ໄດ້ ແລະ ເຮັດໃຫ້ປະຊາຊົນຫັນເອົາພື້ນທີ່ຮົກເຮື້ຶອ ຫຼື ພື້ນທີ່ບໍ່ໄດ້ໃຊ້ງານ ໃນ ກທມ ຂອງຕົນມານໍາໃຊ້ໃຫ້ເປັນສວນສາທາລະນະ (ສວນ 15 ນາທີ) ເພື່ອເພີ່ມພື້ນທີ່ສີຂຽວ ບໍ່ພຽງຕ້ອງເປັນສວນທີ່ຕອບສະໜອງການໃຊ້ງານໂດຍຈັດໃຫ້ມີຫຼາຍຮູບແບບຂອງສວນ ເປັນຕົ້ນສວນເພື່ອພັດທະນາຊຸມຊົນ ແລະ ຄຸນນະພາບຊີວິດ, ສວນທີ່ເປັນພື້ນທີ່ສໍາລັບກິດຈະກໍາສ້າງສັນ, ສວນທີ່ມີຫຼາກຫຼາຍທາງດ້ານຊີວະພາບ ແລະ ອື່ນໆ. ປັດຈຸບັນ ກທມ ຍັງມີຄວາມພະຍາຍາມເພີ່ມທະວີພື້ນທີ່ສີຂຽວດ້ວຍຫຼາຍຮູບຫຼາຍແບບ ບໍ່ວ່າຈະເປັນການນຳໃຊ້ທີ່ດິນໃນ ກທມ ຫຼື ເຊົ່າທີ່ດິນເພື່ອເຮັດສວນສາທາລະນະ. ປັດຈຸບັນ ກທມ ມີພື້ນທີ່ສີຂຽວສະເລ່ຍພຽງແຕ່ 7.8 ຕາແມັດຕໍ່ຄົນ ຊຶ່ງຕໍ່າກວ່າເກນມາດຕະຖານ ຂອງອົງການອະນາໄມໂລກ (WHO) ໄດ້ກໍານົດຢູ່ໃນ 9 ຕາແມັດຕໍ່ຄົນ. ນອກຈາກນັ້ນ, ເມື່ອປຽບທຽບກັບຕົວເມືອງອື່ນໆໃນອາຊີເຊັ່ນ: ໂຕກຽວ (38 ຕາແມັດຕໍ່ຄົນ), ສິງກະໂປ (66 ຕາແມັດຕໍ່ຄົນ), ສ່ວນຢູ່ ກທມ ຍັງມີອັດຕາສ່ວນພື້ນທີ່ສີຂຽວຕໍ່າທີ່ສຸດ ຊຶ່ງກວມເອົາພຽງແຕ່ 2.7% ຂອງເນື້ອທີ່ທັງໝົດ.ໂຄງການ ກທມ ຍັງໃຫ້ຮູ້ວ່າ: ການເພີ່ມພື້ນທີ່ສີຂຽວ ມາຮອດທ້າຍປີ 2024 ສວນ 15 ນາທີ ເພີ່ມຂຶ້ນ 19 ສວນ ແລະ 1 ປີ 11 ເດືອນ 2024 ຜ່ານມາ ໄດ້ເພີ່ມສວນ 15 ນາທີ ໃກ້ບ້ານມີທັງໝົດ 117 ສວນ ໃນເນື້ອທີ່ຫຼາຍກວ່າ 149 ເຮັກຕາ.
ໂຄງການ Green Bangkok ໄດ້ຄາດຄະເນແຜນການເພີ່ມພື້ນທີ່ສີຂຽວ ຮອດປີ 2030 ນອກຈາກຕ້ອງການເພີ່ມພື້ນທີ່ສີຂຽວເປັນ 10 ຕາແມັດ/ຄົນ ຍັງມີເປົ້າໝາຍທີ່ຈະເພີ່ມສວນໃຫ້ຫຼາຍຂຶ້ນແລະ ສວນສາທາລະນະຂະໜາດນ້ອຍ (Pocket Park) ປະຊາຊົນສາມາດເຂົ້າເຖິງພາຍໃນ 400-800 ແມັດ ຫຼື 15 ນາທີ ໃຫ້ໄດ້ 50% ແລະ ເພີ່ມພື້ນທີ່ຮົ່ມໄມ້ໃນເມືອງຈາກປັດຈຸບັນຢູ່ໃນປະມານ 17% ໃຫ້ເປັນ 30%. ປັດຈຸບັນ ກທມ ບໍ່ພຽງມີໂຄງການ ສວນ 15 ນາທີ ຍັງມີໂຄງການຕົ້ນໄມ້ລ້ານຕົ້ນ, ໂຄງການຮັກສາດູແລຕົ້ນໄມ້ປະຈໍາເຂດຕື່ມອີກ.
ທ່ານ ນາງຈາຣຸວັນ ຈາຣຸຈິນດາ ນັກຂ່າວສິ່ງແວດລ້ອມຊ່ອງ NBT ປະເທດໄທ ໄດ້ມີຄໍາເຫັນຜ່ານຜູ້ຂຽນເມື່ອບໍ່ດົນມານີ້ວ່າ: ການເພີ່ມພື້ນທີ່ສີຂຽວໃນ ກທມ ມີຄວາມກ້າວໜ້າເພີ່ມຂຶ້ນເລື້ອຍໆໃນໄລຍະ 1-2 ປີ ຜ່ານມາ ເຮັດໃຫ້ສວນທາລະນະເກີດຂຶ້ນໃໝ່ຫຼາຍ ແລະສວນສາທາລະນະຫຼາຍແຫ່ງທີ່ມີຢູ່ແລ້ວກໍຖືກປັບປຸງໃໝ່ເຮັດໃຫ້ປັດຈຸບັນຜູ້ຄົນໃນ ກທມ ຈະໃຊ້ເວລາຫວ່າງໄປສວນສາທາລະນະ ເພື່ອໄປຜັກຜ່ອນຢ່ອນໃຈຫຼາຍຂຶ້ນ.
ສະຫຼຸບລວມແລ້ວການເພີ່ມພື້ນທີ່ສີຂຽວໃນຕົວເມືອງ ບໍ່ວ່າຈະເປັນຢູ່ ສປປ ລາວ ກໍຄືປະເທດເພື່ອນບ້ານເຫັນວ່າມີຄວາມຈໍາເປັນ ແລະ ສໍາຄັນຫຼາຍ ຕ້ອງຢູ່ຄວບຄູ່ກັນກັບຕົວເມືອງໃຫຍ່ ເພື່ອເຮັດໃຫ້ສາມາດດູດຊັບອາຍແກັສຄາບອນໄດອອກໄຊ, ດູດຊັບນໍ້າ, ຫຼຸດຜ່ອນມົນລະພິດທາງອາກາດ, ເຮັດໃຫ້ອາກາດບໍລິສຸດ ທັງເຮັດໃຫ້ຄຸນນະພາບຊີວິດຂອງປະຊາຊົນ ມີສຸຂະພາບທີ່ດີທາງດ້ານຮ່າງກາຍ ແລະ ຈິດໃຈດີຂຶ້ນ.
ຄໍາເຫັນ