ວິທະຍຸກະຈາຍສຽງຫວຽດນາມລາຍງານວ່າ: ໃນການຢ້ຽມຢາມ ບຣາຊິນ ຢ່າງເປັນທາງການ, ໃນວັນທີ 24 ກັນຍາ ຜ່ານມາ (ຕາມເວລາທ້ອງຖິ່ນ) ຢູ່ນະຄອນ ເຊົາ ປາວໂລ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ເຂົ້າຮ່ວມໂອ້ລົມສົນທະນາກັບວິສາຫະກິດ ບຣາຊິນ ເພື່ອແນໃສ່ແລກປ່ຽນໂອກາດຮ່ວມມື, ລົງທຶນ, ເຊື່ອມຕໍ່ການດຳເນີນທຸລະກິດ ແລະ ພ້ອມກັນສ້າງບັນດາມູນຄ່າ ແລະ ກຳລັງໜູນເຕີບໂຕໃໝ່, ເພື່ອຊຸກຍູ້, ຍົກລະດັບການພົວພັນຮ່ວມມືເສດຖະກິດ ຫວຽດນາມ - ບຣາຊິນ ທັງໃນດ້ານຄຸນນະພາບ ແລະ ກ້າວເຂົ້າສູ່ລວງເລິກໃນໄລຍະຈະມາເຖິງ.
ຂ່າວລະບຸວ່າ: ພາຍຫຼັງເກືອບ 35 ປີແຫ່ງວັນສ້າງຕັ້ງສາຍພົວພັນທາງການທູດ, ພິເສດ, ນັບແຕ່ເວລາສ້າງການພົວພັນຄູ່ຮ່ວມມືຮອບດ້ານໃນປີ 2007, ການພົວພັນຮ່ວມມື ຫວຽດນາມ - ບຣາຊິນ ສືບຕໍ່ພັດທະນາຢ່າງຕັ້ງໜ້າໃນທຸກຂົງເຂດ. ການພົວພັນດ້ານການເມືອງນັບມື້ນັບສະໜິດຕິດພັນ ແລະ ໄວ້ເນື້ອເຊື່ອໃຈ, ໃນຂະນະທີ່ການພົວພັນເສດຖະກິດ - ການຄ້າ ນັບມື້ນັບໄດ້ເພີ່ມຂຶ້ນ. ປັດຈຸບັນ, ຫວຽດນາມ ແລະ ບຣາຊິນ ແມ່ນຄູ່ຮ່ວມມືການຄ້າໃຫຍ່ທີ່ສຸດຂອງກັນຢູ່ພາກພື້ນອາຊີຕາເວັນອອກສ່ຽງໃຕ້ ແລະ ອາເມຣິກາໃຕ້, ດ້ວຍວົງເງິນການຄ້າ ປີ 2022 ບັນລຸລະດັບສະຖິຕິ ປະມານ 6,78 ຕື້ໂດລາ, ເພີ່ມຂຶ້ນ 6,6% ເມື່ອທຽບໃສ່ປີ 2021.
ທ່ານ ຟ້າມມິງຈິງ ຖືວ່າສອງປະເທດຄວນສົ່ງເສີມ, ຊຸກຍູ້ການລົງທຶນ ແລະ ການຄ້າສອງສົ້ນ, ບົນພື້ນຖານຕ່າງຝ່າຍຕ່າງມີຜົນປະໂຫຍດ; ເພີ່ມທະວີການແລກປ່ຽນບັນດາຄະນະວິສາຫະກິດໄປສຳຫຼວດ ຊອກຮູ້ຕະຫຼາດ, ໂອກາດໃນການລົງທຶນ ແລະ ເຊື່ອມຕໍ່ດຳເນີນທຸລະກິດ ເພື່ອແນໃສ່ຍົກລະດັບການພົວພັນການຄ້າ - ການລົງທຶນ ສົມກັບຄວາມສາມາດບົ່ມຊ້ອນ, ທ່າໄດ້ປຽບຂອງສອງປະເທດ.
ໂດຍຕີລາຄາສູງເຈດຈຳນົງແຫ່ງການຮ່ວມມືຂອງບັນດາວິສາຫະກິດ ບຣາຊິນ, ທ່ານ ຟ້າມມິງຈິງ ໃຫ້ຮູ້ວ່າ: ຫວຽດນາມ ຕັ້ງໜ້າພ້ອມກັບ ບຣາຊິນ ເຈລະຈາບັນດາສັນຍາການຄ້າເສລີ, ອາລັກຂາການລົງທຶນ, ຫຼີກລ່ຽງການເກັບພາສີຊ້ອນ… ສ້າງເງື່ອນໄຂໃຫ້ແກ່ບັນດາວິສາຫະກິດຮ່ວມມື, ພັດທະນາ. ສູ້ຊົນນຳວົງເງິນການຄ້າສອງສົ້ນບັນລຸ 10 ຕື້ໂດລາ ໃນປີ 2025, ບັນລຸ 15 – 20 ຕື້ໂດລາ ໃນປີ 2030.
ຄໍາເຫັນ