ການສະຫຼອງບຸນປີໃໝ່ລາວປີນີ້, ແຂວງສາລະວັນ ເນັ້ນໃສ່ 2 ກິດຈະກໍາ ເປັນຕົ້ນ:ກິດຈະກໍາການອະນຸລັກຮັກສາຄຸນຄ່າທາງດ້ານວັດທະນະທໍາອັນດີງາມຂອງຊາດ ແລະ ສົ່ງເສີມການທ່ອງທ່ຽວ ຕິດພັນກັບຄໍາຂວັນທີ່ວ່າ: ທ່ອງທ່ຽວລາວປອດໄພ ຊື່ນໃຈໃນທໍາມະຊາດ, ວັດທະນະທໍາ ແລະ ປະຫວັດສາດ. ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ຜູ້ຊີ້ນໍາວຽກງານວັດທະນະທໍາ-ສັງຄົມ ໄດ້ໃຫ້ຮູ້ວ່າ: ການສະເຫຼີມສະຫຼອງບຸນປີໃໝ່ລາວ, ແມ່ນມີຄວາມໝາຍຄວາມສໍາຄັນ, ເປັນການສືບທອດປະເພນີອັນດີງາມທີ່ເປັນເອກະລັກຂອງຊາດ, ຮັບປະກັນໃຫ້ໄດ້ 3 ຄາດໝາຍໃຫຍ່ທີ່ສໍາຄັນເຊັ່ນ: ການອະນຸລັກ ສົ່ງເສີມວັດທະນະທໍາ ຂະໜົບທໍານຽມ ຮີດຄອງປະເພນີອັນດີງາມຂອງຊາດ ດ້ວຍການຫົດສົງພະພຸດທະຣູບ, ຫົດສົງເຊິ່ງກັນ ແລະ ກັນ, ດ້ວຍນ້ຳຫອມ, ນໍ້າສະອາດ, ການສົມມາຄາລະວະຂໍບຸນຂໍຄຸນນໍາພໍ່ແມ່, ຄູບາອາຈານ ແລະຜູ້ເຖົ້າຜູ້ແກ່.ບາສີສູ່ຂວັນຮັບພອນປີໃໝ່ ແລະພິທີທາງສາສະໜາ; ຮັບປະກັນດ້ານການທ່ອງທ່ຽວ ດ້ວຍການດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ, ສົ່ງເສີມລາວທ່ຽວລາວໃຫ້ນັບນັບຫຼາຍຂຶ້ນ; ທັງຮັບປະກັນໃຫ້ມີຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຄວາມປອດໄພ, ການເກີດອຸບັດຕິເຫດຕ່າງໆ. ນອກນັ້ນ, ທ່ານຍັງໄດ້ເນັ້ນໃຫ້ຂະແໜງການທີ່ກ່ຽວຂ້ອງ ຈົ່ງເອົາໃຈໃສ່ຕິດຕາມກວດກາ ແລະຄຸ້ມຄອງຜູ້ປະກອບການ ບໍ່ໃຫ້ມີການສວຍໂອກາດຂຶ້ນລາຄາສິນຄ້າ, ກັກຕຸນສິນຄ້າ ແລະເອົາລັດເອົາປຽບຜູ້ບໍລິໂພກ, ການໃຊ້ໄຟຟ້າຢ່າງຖືກວິທີ, ການສະໜອງນໍ້າໃຫ້ພຽງພໍກັບຜູ້ບໍລິໂພກ, ຕະຫຼອດໄລຍະຂອງການສະເຫຼີມສະຫຼອງບຸນປີໃໝ່ລາວ.
ສໍາລັບມື້ສັງຂານລ່ວງປີນີ້ ແມ່ນກົງກັບວັນທີ 13 ເມສາ ຄສ 2024, ກົງກັບມື້ຂຶ້ນ 5 ຄໍ່າ ເດືອນ 5 ລາວ ພສ 2567 ເປັນມື້ທໍາອິດຂອງການສະຫຼອງບຸນປີໃໝ່ລາວ ຊຶ່ງປະຊາຊົນຊາວພຸດໃນຂອບເຂດທົ່ວປະເທດ, ກໍໄດ້ຫ້າງຫາກະກຽມດອກໄມ້, ທູບທຽນ, ເຄື່ອງຫອມ ແລະອະນາໄມປັດກວາດເຮືອນຊານໃຫ້ສະອາດງາມຕາ, ຈັດແຕ່ງພາຫວານ, ພາເຂົ້າເພື່ອເອົາລົງໄປວັດ, ຫຼັງຈາກຖວາຍເພນແລ້ວ, ໃນຕອນບ່າຍພະສົງໃນແຕ່ວັດທົ່ວປະເທດເວົ້າລວມ, ເວົ້າສະເພາະແມ່ນຢູ່ວັດສີມຸງຄຸນ ວັດກາງ ຫຼື ບັນດາວັດແຫ່ງຕ່າງໆຢູ່ພາຍໃນແຂວງສາລະວັນ ກໍໄດ້ຈັດພິທີອັນເຊີນພະພຸດທະຣູບລົງຈາກບັນລັງ ຫຼື ບຸດສະບົກ ຫຼື ຈາກຮ້ານພະ ເພື່ອໃຫ້ພຸດທະສາສະນິກະຊົນໄດ້ຫົດສົງ ດ້ວຍນ້ຳຫອມ ທີ່ຈັດຕຽມມາ ເພື່ອເປັນສິຣິມົງຄຸນແກ່ຕົນເອງ ແລະຄອບຄົວ. ຫຼັງຈາກຫົດສົງພະພຸດທະຣູບແລ້ວ ພໍ່ແມ່ປະຊາຊົນ, ກໍໄດ້ພ້ອມກັນກັບຕ່າວເມືອເຮືອນ ເພື່ອອາຣາດທະນາ ພະພຸດທະຣູບທີ່ບູຊາຄູ່ເຮືອນ ລົງຈາກຮ້ານເພື່ອມາຫົດສົງ ແລະຂໍພອນໃຫ້ເປັນສີລິມຸງຄຸນໃຫ້ແກ່ເຮືອນຊານຂອງຕົນນຳອີກ.
(ຂ່າວ: ລັດຕະນາ ແສງສຸວັນ)
ຄໍາເຫັນ