ຖ້າຫາກສະຖານະການຄວາມບໍ່ສະຫງົບຍັງຄົງຢູ່, ການສົ່ງອອກເຂົ້າບາສມາຕິຈະໄດ້ຮັບຜົນກະທົບຫຼາຍທີ່ສຸດ, ຍ້ອນວ່າເກືອບ 50% ຂອງການສົ່ງອອກເຂົ້າບາສມາຕິຂອງອິນເດຍແມ່ນສົ່ງໄປ 5 ປະເທດໃນອາຊີຕາເວັນຕົກຄື: ຊາອຸດິດ ອາຣັບບີ, ອີຣ່ານ, ອີຣັກ, ສະຫະລັດ ອາຣັບເອມີເຣດ (UAE) ແລະ ເຢເມນ.
ສະຫະພັນຜູ້ສົ່ງອອກເຂົ້າອິນເດຍ (IREF) ໄດ້ອອກຖະແຫຼງການໃນທີ 1 ມີນາ ຜ່ານມາວ່າ: ໄດ້ແນະນຳໃຫ້ສະມາຊິກຂອງຕົນຫຼີກລ່ຽງການເຮັດສັນຍາໃໝ່ໃນຮູບແບບ CIF (Cost, Insurance, and Freight) ກັບຈຸດ ໝາຍປາຍທາງໃນອີຣ່ານ ແລະ ບັນດາປະເທດອ່າວເປີເຊຍ, ຫຼັງຈາກການໂຈມຕີອີຣ່ານ ລະຫວ່າງ ສະຫະລັດ ອາເມຣິກາ ແລະ ອິສຣາແອນ ໃນທີ 28 ກຸມພາ ຜ່ານມາ, ເຮັດໃຫ້ເກີດຄວາມຢ້ານກົວກ່ຽວກັບຄວາມບໍ່ສະຫງົບທີ່ເພີ່ມຂຶ້ນ ແລະ ອາດນຳໄປສູ່ການຈຳກັດເສັ້ນທາງແລ່ນເຮືອນຜ່ານຊ່ອງແຄບຮໍມຸສ.
ທັງນີ້, ພາຍໃຕ້ຂໍ້ຕົກລົງ CIF ຜູ້ຂາຍຈະຕ້ອງຮັບຜິດຊອບຄ່າໃຊ້ຈ່າຍຂອງສິນຄ້າ, ປະກັນໄພ ແລະ ຄ່າຂົນສົ່ງຈົນກວ່າສິນຄ້າຈະໄປຮອດທ່າເຮືອຂອງຜູ້ຊື້. ດັ່ງນັ້ນ, IREF ຈຶ່ງແນະນຳໃຫ້ຜູ້ສົ່ງອອກປ່ຽນໄປໃຊ້ເງື່ອນໄຂການຂາຍແບບ FOB (Free-on-Board) ແທນເມື່ອເປັນໄປໄດ້, ເພື່ອໃຫ້ພາລະຂອງຄ່າຂົນສົ່ງ, ປະກັນໄພ ແລະ ຄວາມສ່ຽງທີ່ກ່ຽວຂ້ອງຕົກຢູ່ກັບຜູ້ຊື້ຢູ່ຕ່າງປະເທດ.
IREF ຍັງໄດ້ເຕືອນວ່າ: ສະຖານະການໃນອີຣ່ານ ແລະ UAE ອາດຈະສົ່ງຜົນກະທົບ ໂດຍກົງຕໍ່ລາຄານໍ້າມັນເຊື້ອໄຟເຮືອ ແລະ ຂັດຂວາງການສະໜອງເຮືອຕູ້ຄອນເທນເນີ ແລະ ເຮືອບັນທຸກສິນຄ້າຂະໜາດໃຫຍ່, ໂດຍກ່າວວ່າ: "ພາຍໃຕ້ສະຖານະການເຫຼົ່ານີ້..." "ຄ່າຂົນສົ່ງອາດຈະເພີ່ມຂຶ້ນຢ່າງໄວວາໃນໄລຍະເວລາສັ້ນໆ ຊຶ່ງອາດຈະເຮັດໃຫ້ຜູ້ສົ່ງອອກປະເຊີນກັບການຂາດທຶນຫາກຍັງສືບຕໍ່ໃຊ້ສັນຍາລາຄາຄົງທີ່ລວມທັງຄ່າຂົນສົ່ງ."
ນອກຈາກນັ້ນ, ອົງການດັ່ງກ່າວຍັງໄດ້ເຕືອນກ່ຽວກັບຄ່າປະກັນໄພທີ່ອາດຈະເພີ່ມຂຶ້ນຢ່າງຫຼວງຫຼາຍ ຖ້າຄວາມເຄັ່ງຕຶງທາງພູມິສາດທາງການເມືອງຮ້າຍແຮງຂຶ້ນ, ໂດຍຮຽກຮ້ອງໃຫ້ຜູ້ສົ່ງອອກໃຊ້ຄວາມລະມັດລະວັງໃນການຮັບເອົາຄຳສັ່ງຊື້ໃໝ່ ແລະ ຫຼີກລ່ຽງການເປີດຕຳແໜ່ງທີ່ບໍ່ມີການປ້ອງກັນຄວາມສ່ຽງ.
ປັດຈຸບັນ, ລາຄາຂາຍສົ່ງເຂົ້າບາສມາຕິໄດ້ເພີ່ມຂຶ້ນ 10-15% ໃນເດືອນທີ່ຜ່ານມາ ແລະ ເນື່ອງຈາກອີຣ່ານເປັນຕະຫຼາດຫຼັກ, IREF ຄາດວ່າລາຄາຈະມີຄວາມຜັນຜວນຕື່ມອີກໃນມື້ຕໍ່ໆໄປ.
ຂໍ້ມູນຈາກອົງການພັດທະນາການສົ່ງອອກສິນຄ້າກະສິກຳ-ອາຫານປຸງແຕ່ງ (APEDA) ຂອງອິນເດຍສະແດງໃຫ້ເຫັນວ່າ: ອິນເດຍເປັນຜູ້ສົ່ງອອກເຂົ້າບາສມາຕິທີ່ໃຫຍ່ທີ່ສຸດໃນໂລກ, ໂດຍມີການສົ່ງອອກປະມານ 6 ລ້ານໂຕນ ລະຫວ່າງປີ 2024 – 2025 ຊຶ່ງຄວາມຕ້ອງຕົ້ນຕໍແມ່ນມາຈາກບັນດາປະເທດອາຊີຕາເວັນຕົກ.
ຄໍາເຫັນ