ການເຕີບໃຫຍ່ຂະຫຍາຍຕົວຂອງໜັງສືພິມພາສາຕ່າງປະເທດ

ປະຕິວັດສະບັບທຳອິດແລະເປັນວັນສ້າງຕັ້ງໂຮງພິມປະຕິວັດຂຶ້ນໃນວັນດຽວກັນຄືວັນທີ 13 ສິງຫາ 1950 ນັ້ນຄືທີ່ມາຂອງວັນສື່ມວນຊົນແລະການພິມຈຳໜ່າຍຂອງຊາດລາວຊຶ່ງປີນີ້ຄົບຮອບ 74 ປີແຫ່ງການສະເຫຼີມສະຫຼອງມູນເຊື້ອການເຕີບໃຫຍ່ຂະຫຍາຍຕົວແລະພັດທະນາຂອງວຽກງານສື່ມວນຊົນແລະ ການພິມຈຳໜ່າຍນັບແຕ່ມີການຕິດຕໍ່ພົວພັນສົ່ງຂ່າວທາງຈົດໝາຍ, ກ້າວຂຶ້ນມີໃບຂ່າວ, ໃບປີວແລະມີໜັງສືພິມ, ວິທະຍຸ, ໂທລະພາບຢູ່ປະເທດເຮົາຕາມລຳດັບຈົນກ້າວມາຮອດຍຸກສື່ເອເລັກໂຕຣນິກແລະການພິມຈຳໜ່າຍທາງເອເລັກໂຕຣນິກ (E-book) ສາມາດບໍລິການການອ່ານໄດ້ຢ່າງໄຮ້ຂີດຈຳກັດ.

ທ່ານ ທອງຫຼໍ່ ດວງສະຫວັນ ຫົວໜ້າບັນນາທິການໃຫຍ່ໜັງສືພິມພາສາຕ່າງປະເທດ (ໜັງສືພິມວຽງຈັນທາຍ)ກະຊວງຖະແຫຼງຂ່າວ, ວັດທະນະທໍາແລະທ່ອງທ່ຽວ (ຖວທ) ໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນໃນວັນທີ7ສິງຫາຜ່ານມາທີ່ໜັງສືພິມດັ່ງກ່າວວ່າ:ໜັງສືພິມວຽງຈັນທາຍສະບັບທໍາອິດໄດ້ຈັດພິມອອກໃນວັນທີ 7 ເດືອນເມສາ ປີ 1994, ໃນໄລຍະຕົ້ນໄດ້ພິມໜັງສືພິມອອກເປັນລາຍສັບປະດາມີ 16 ໜ້າເປັນພາບຂາວ-ດຳແລະ ຈັດໜ້າໃນຮູບແບບການຕັດຕໍ່ດ້ວຍມື. ຈຸດປະສົງໃນການສ້າງຕັ້ງໜັງສືພິມພາສາອັງກິດ ເພື່ອຕອບສະໜອງຄວາມຮຽກຮ້ອງຕ້ອງການຂອງລັດຖະບານສປປລາວ ກໍຄືພັກປະຊາຊົນປະຕິວັດລາວໃນການເປີດກວ້າງການພົວພັນຮ່ວມມືກັບໂລກພາຍນອກພາຍຫຼັງທີ່ພັກປະຊາຊົນປະຕິວັດລາວໄດ້ດຳເນີນນະໂຍບາຍການປ່ຽນແປງໃໝ່ໃນປີ 1986.

ໜັງສືພິມວຽງຈັນທາຍ ໄດ້ລາຍງານຂ່າວເຫດການເດັ່ນໃນການປົກປັກຮັກສາ ແລະ ສ້າງສາພັດທະນາ ສປປ ລາວອອກສູ່ໂລກໄດ້ຢ່າງກວ້າງຂວາງຊຶ່ງໃນໄລຍະຕົ້ນເປັນລາຍສັບປະດາ, ຕໍ່ມາປີ 1996 ໄດ້ພິມອອກອາທິດໜຶ່ງ 2 ຄັ້ງ ແລະ ໃນປີ 2004 ໄດ້ພິມອອກເປັນລາຍວັນ ແຕ່ວັນຈັນເຖິງວັນສຸກ, ປີ 2007 ໄດ້ພິມໜັງສືພິມທ້າຍສັບປະດາອອກຊຶ່ງປະກອບມີ 6 ສະບັບຕໍ່ອາທິດ. ໜັງສືພິມປະກອບດ້ວຍຫຼາຍຄໍລໍາ ເປັນຕົ້ນຂ່າວພາຍໃນ, ຂ່າວຕ່າງປະເທດ, ຂ່າວທຸລະກິດ, ຂ່າວບັນເທິງ ແລະ ຂ່າວກິລາ. ນອກນັ້ນ, ຍັງມີຄໍລໍາບົດເຊັ່ນ: ສຶກສາ, ສາທາ, ວັດທະນະທໍາ, ທ່ອງທ່ຽວ ແລະ ບົດຄວາມຄິດເຫັນຈາກສັງຄົມທີ່ມີຫົວຂໍ້ແຕກຕ່າງກັນໃນແຕ່ລະໄລຍະແລະສະພາບແວດລ້ອມຕົວຈິງຂອງສັງຄົມ. ໜັງສືພິມພາສາຕ່າງປະເທດແມ່ນໜຶ່ງໃນບັນດາສື່ຫຼັກຂອງລັດຖະບານຂຶ້ນກັບກະຊວງ ຖວທປະກອບມີ 7 ພະແນກ, ມີພະນັກງານທັງໝົດ56 ຄົນ, ເປັນລັດຖະກອນ 42ຄົນ,ຍິງ 18 ຄົນເພື່ອຕອບສະໜອງຄວາມຮຽກ ຮ້ອງຕ້ອງການຂອງສັງຄົມ, ໃນປີ 1998 ໄດ້ສ້າງຕັ້ງວາລະສານເລີເຣໂນວາເຕີພາສາຝຣັ່ງ ແລະໄດ້ປ່ຽນຊື່ອົງການມາເປັນໜັງສືພິມພາສາຕ່າງປະເທດ ໂດຍມີເປົ້າໝາຍເພື່ອມາເຜີຍແຜ່ແນວທາງຂອງພັກ-ລັດ, ກະຈາຍຂໍ້ມູນຂ່າວສານດ້ານການພັດທະນາຂອງລາວເປັນຫຼາກຫຼາຍພາສາຢູ່ທັງພາຍໃນ ແລະ ຕ່າງປະເທດ,ໃນເວລາດຽວກັນກໍນຳເອົາຂໍ້ມູນຂ່າວສານທີ່ເປັນປະໂຫຍດຈາກສື່ອື່ນໆທີ່ເປັນພາຄີມາສູ່ຜູ້ອ່ານ.ໜັງສືພິມວຽງຈັນທາຍໄດ້ຮັບການສະໜັບສະໜູນໂດຍການຈອງອ່ານ ແລະລົງໂຄສະນາຜະລິດຕະພັນຕ່າງຈາກອົງການຈັດຕັ້ງພັກ-ລັດ, ອົງການຈັດຕັ້ງທາງສັງຄົມ, ສ່ວນບຸກຄົນຢູ່ພາຍໃນ ແລະ ຕ່າງປະເທດ.ໃນປີ 1999 ໜັງສືພິມໄດ້ສ້າງເວັບໄຊຊຶ່ງເປັນເວັບໄຊຂອງສື່ມວນຊົນລາວທໍາອິດ,

ຂຶ້ນຢ່າງເປັນທາງການແນໃສ່ເຮັດໃຫ້ຂ່າວລາວໄດ້ກະຈາຍອອກສູ່ໂລກພາຍນອກວ່ອງໄວທັນກັບສະພາບການ, ກວ້າງຂວາງແລະ ໄປເຖິງຫຼາຍກຸ່ມເປົ້າໝາຍ.ໃນປີ 2001 ໄດ້ສ້າງຖານຂໍ້ມູນເພື່ອບັນທຶກເນື້ອໃນໜັງສືພິມທັງໝົດໄວ້ໃນລະບົບຖານຂໍ້ມູນ; ໄດ້ພັດທະນາໂປຣແກຣມວັດຈະນານຸກົມລາວ-ອັງກິດ-ລາວແລະລາວ-ລາວຂຶ້ນເພື່ອຮັບໃຊ້ພາຍໃນໜັງສືພິມແລະສັງຄົມທົ່ວໄປ. ທີມງານດັ່ງກ່າວຍັງຊ່ວຍສ້າງເວັບໄຊໃຫ້ອົງການສື່ມວນຊົນອື່ນໆໃນລາວຈໍານວນໜຶ່ງ ແລະ ໃນປີ 2004 ວຽງຈັນທາຍກໍໄດ້ເລີ່ມໃຫ້ລູກຄ້າຈອງອ່ານຂ່າວໄດ້ຢູ່ເວັບໄຊ.ນັບແຕ່ປີ2005ໜັງສືພິມໄດ້ຮັບ ເປັນສະມາຊິກຂອງອົງການເຄືອຂ່າຍຂ່າວພາກພື້ນ ແລະ ສາກົນເຊັ່ນ: ອົງການເຄືອຂ່າຍຂ່າວອາຊີທີ່ມີຢູ່ໃນ 20 ປະເທດໂດຍມີຄໍາຂວັນວ່າຂ່າວອາຊີໂດຍນັກຂ່າວອາຊີ, ໄດ້ຕົກລົງແລກປ່ຽນຂ່າວກັບສໍານັກຂ່າວຊິນຮວາ, ກຽວໂດ, ໜັງສືພິມທຸລະກິດແມອີວ ສເກົາຫຼີ, ເອຟີ, ສໍານັກຂາວສານ ສປປ ເກົາຫຼີແລະກຸ່ມບໍລິສັດສື່ມວນຊົນຢູນນານສປຈີນ,ໄດ້ຮ່ວມມືກັບ TV Novosti, ສໍານັກຂ່າວອີຕາ-ຕາສ, ສະປຸດນິກຣັດເຊຍ, ໜັງສືພິມລາຍວັນພາສາອັງກິດ Global Times,ອົງການເຄື່ອຂ່າຍຂ່າວໜຶ່ງແລວໜຶ່ງເສັ້ນທາງຂອງສປຈີນ, ສຳນັກຂ່າວຕວັກກີAnodola, ສໍານັກຂ່າວເອບີຊີ ອົສຕຣາລີແລະ ສໍານັກຂ່າວປະເທດກຸຍບາ,ນັບແຕ່ປີ 2009 ໜັງສືພິມວຽງຈັນທາຍໄດ້ເພີ່ມຜະລິດຕະພັນສື່ຂອງຕົນເຊັ່ນ: ບໍລິການຂ່າວຂໍ້ຄວາມສັ້ນພາສາລາວແລະອັງກິດຜ່ານບໍລິສັດລາວໂທລະຄົມ LTC,Unitelແລະ ETL, ສ້າງໜ້າຂ່າວຢູ່ສື່ອອນລາຍເຟສບຸກ, ຢູທູບ, ເວັບໄຊພາສາລາວແລະ ໜ້າຕິກຕັອກ. ໜັງສືພິມພາສາຕ່າງປະເທດໄດ້ກາຍເປັນເວທີຂອງມະຫາຊົນແລະເປັນອົງການສື່ມວນຊົນແຫ່ງໜຶ່ງທີ່ມີບັນດາແຂກຫຼາຍປະເທດມາຢ້ຽມຢາມ ແລະ ຝຶກງານ.ໃນປີ 2019ໜັງສືພິມໄດ້ພັດທະນາລະບົບການຮັບຊໍາລະເງິນຂອງລູກຄ້າຄ່າຈອງອ່ານຂ່າວ ແລະ ໂຄສະນາດ້ວຍບັດຕ່າງໆແລະຄິວອາໂຄດຜ່ານເວັບໄຊຂອງໜັງສືພິມວຽງຈັນທາຍ www.vientianetimes.org.laໂດຍການຮ່ວມມືກັບທະນາຄານການຄ້າຕ່າງປະເທດລາວ.

ທ່ານກ່າວໃຫ້ຮູ້ອີກວ່າ: ໜັງສືພິມພາສາຕ່າງປະເທດຍັງສືບຕໍ່ຢຶດໝັ້ນວິໄສທັດໃນການພັດທະນາສື່ມວນຊົນລາວໂດຍອີງໃສ່ບົດຮຽນ 30 ປີໃນການເປີນປະຕູຂໍ້ມູນຂ່າວສານໜຶ່ງທີ່ສໍາຄັນຂອງ ສປປ ລາວ ແລະ ເປັນເວທີຂອງມະຫາຊົນ, ຢຶດໝັ້ນມາດຕະຖານຈັນຍາບັນ, ຈັນຍາທໍາຂອງສື່ມວນຊົນໃນການສະໜອງຂໍ້ມູນຂ່າວສານໃຫ້ແກ່ສັງຄົມດ້ວຍການຮິ່ນຕອງຢ່າງຖີ່ຖ້ວນ, ເລິກເຊິ່ງ, ແຫຼມຄົມ, ມີຂໍ້ມູນຈາກຫຼາຍແຫຼ່ງທີ່ໜ້າເຊື່ອຖື, ຖືກຕ້ອງເຊັດເຈນ, ເປັນທໍາ, ກວ້າງໄກ, ວ່ອງໄວທັນກັບເຫດການ,ຕໍ່ເນື່ອງ, ມີຄວາມຮັບຜິດຊອບສູງ ແລະ ເປັນທີ່ໄວ້ໃຈຂອງຜູ້ບໍລິໂພກ.

ສຳລັບວັນສື່ມວນຊົນແຕ່ລະປີພວກເຮົາກໍໄດ້ມີການຈັດກິດຈະກຳຕ່າງໆ ຄືປີນີ້ກໍໄດ້ຈັດໄປແລ້ວໂດຍການຮ່ວມມືກັບສະມາຄົມນັກຂ່າວແຫ່ງ ສປປ ລາວ ເພື່ອເຮັດແນວໃດທີ່ຈະນຳໃຊ້ເອໄອປັນຍາປະດິດມາຊ່ວຍຫຼຸດຜ່ອນໃນການຕັດຕໍ່ຫຼື ໃຊ້ເວລາໃຫ້ມັນສັ້ນລົງເຊັ່ນຕົວຢ່າງຄືເຮົາເຄີຍຂຽນຂ່າວໜຶ່ງໃຊ້ເວລາຢູ່ຊົ່ວໂມງໜຶ່ງເຮົາເອົາເອໄອປັນຍາປະດິດມາຊ່ວຍຈະໃຊ້ເວລາພຽງແຕ່ຫ້ານາທີປະຢັດຂັ້ນຕອນໄປເຮັດອັນອື່ນ ອັນນີ້ພວກເຮົາກໍໄດ້ຈັດເສວະນາໄປແລ້ວໃນວັນສຸກທີ່ຜ່ານມາ ແລະ ໃນອະນາຄົດຈະຝຶກອົບຮົມວິທີໃຊ້ ວ່າໂປແກຣມໃດແດ່ທີ່ຈະມາຊ່ວຍໂດຍສະເພາະພາສາລາວເຮົາທີ່ດີທີ່ສຸດ ເພື່ອຫຼຸດຜ່ອນຂັ້ນຕອນ,ຫຼຸດຜ່ອນເວລາໃນການເຮັດວຽກວິຊາສະເພາະຂອງພວກເຮົາໃຫ້ມັນໄວຂຶ້ນໃນຍຸກໄອທີ 4.0 ກ່ອນຈະພັດທະນາໂຕນັ້ນໄດ້ພວກເຮົາກໍຕ້ອງໄດ້ພັດທະນາບຸກຄະລາກອນນຳໃຊ້ເຄື່ອງມືທັນສະໄໝດັ່ງກ່າວໃຫ້ມັນດຶງດູດຜູ້ອ່ານຜູ້ຈອງຜູ້ເບິ່ງຜູ້ຊົມເຮັດທັງໜ້າທີ່ການເມືອງທັງພາລະກິດໄປພ້ອມກັນຄຽງຄູ່ກັບການພັດທະນາປະເທດຊາດ ເພື່ອໃຫ້ສື່ມວນຊົນເຮົາສືບຕໍ່ຂະຫຍາຍຕົວຄຽງຄູ່ກັບການພັດທະນາ ສປປ ລາວ.

ໃນໂອກາດສະເຫຼີມສະຫຼອງວັນສ້າງຕັ້ງສື່ມວນຊົນແລະການພິມຈໍາໜ່າຍຄົບຮອບ 74 ປີຕາງໜ້າໜັງສືພິມວຽງຈັນທາຍ ຂໍສະແດງຄວາມຊົມເຊີຍແລະຂອບໃຈເປັນຢ່າງສູງຕໍ່ການນໍາພັກ-ລັດແລະທຸກພາກສ່ວນໃນສັງຄົມທີ່ໄດ້ປະກອບສ່ວນເຮັດໃຫ້ວຽກງານໜັງສືພິມວຽງຈັນທາຍເຕີບໃຫຍ່ຂະຫຍາຍຕົວຮັບໃຊ້ສັງຄົມມາຕະຫຼອດໄລຍະ30ປີ. ຂໍອວຍພອນໄຊອັນປະເສີດແດ່ການນໍາພັກ-ລັດທຸກຂັ້ນທຸກພາກສ່ວນ, ອົງການສື່ມວນຊົນແລະພະນັກງານ-ລັດຖະກອນ, ກໍາມະກອນ, ຜູ້ປະກອບການດ້ານສື່ມວນຊົນແລະການພິມຈໍາໜ່າຍແລະປະຊາຊົນລາວບັນດາເຜົ່າຈົ່ງມີສຸຂະພາບແຂງແຮງ, ມີຄວາມຜາສຸກໃນຊີວິດສ່ວນຕົວ, ຄອບຄົວປະສົບຜົນສໍາເລັດໃນໜ້າທີ່ວຽກງານອັນມີກຽດສະຫງ່າຂອງບັນດາທ່ານປະກອບສ່ວນໃນພາລະກິດປົກປັກຮັກສາສ້າງສາແລະພັດທະນາປະເທດຊາດໃຫ້ຈະເລີນກ້າວໜ້າຂຶ້ນໄປຢ່າງບໍ່ຢຸດຢັ້ງ.