 |
ທ່ານ ໂພໄຊ ໄຊຍະສອນ ໄດ້ກ່າວວ່າ: ກອງປະຊຸມຄົ້ນຄວ້າປະກອບຄຳເຫັນຕໍ່ຮ່າງລາຍງານການເມືອງ, ຮ່າງແຜນພັດທະນາວຽກງານແຮງງານ ແລະ ສະຫວັດດີການສັງຄົມ 5 ປີ ຄັ້ງທີ VI ແລະ ທາບທາມບຸກຄະລາກອນ ອອກສະໝັກເລືອກຕັ້ງເຂົ້າໃນຄະນະບໍລິຫານງານພັກກະຊວງແຮງງານ ແລະ ສະຫວັດດີການສັງຄົມ ສະໄໝທີ VII ຮອບທີ 3 ໃນຄັ້ງນີ້ ແມ່ນມີຄວາມສໍາຄັນເປັນຢ່າງຍິ່ງ ຊຶ່ງຈະເປັນການກວດກາ, ຕີລາຄາ ຄວາມພ້ອມດ້ານຕ່າງໆເພື່ອກະກຽມເຂົ້າສູ່ກອງປະຊຸມໃຫຍ່ອົງຄະນະພັກກະຊວງ ຄັ້ງທີ VII ທີ່ຈະເປີດຂຶ້ນໃນຕໍ່ໜ້ານີ້; ທັງເປັນການສໍາມະນາພາຍໃນ ເພື່ອເປີດກ້ວາງໃຫ້ບັນດາສະຫາຍພະນັກງານ-ສະມາຊິກພັກ ໄດ້ມີຄໍາຄິດ ຄໍາເຫັນ ພ້ອມທັງຊອກໃຫ້ເຫັນບັນດາສາເຫດ ຕໍ່ການຕີລາຄາຜົນສໍາເລັດ-ດ້ານດີ, ດ້ານອ່ອນ-ຂໍ້ຄົງຄ້າງໃນການນຳພາ ແລະ ຊີ້ນຳການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກກະຊວງ, ແຜນພັດທະນາວຽກງານແຮງງານ ແລະ ສະຫວັດດີການສັງຄົມ 5 ປີຄັ້ງທີ V ເພື່ອສ້າງຄວາມເຂົ້າໃຈຢ່າງເລິກເຊິ່ງແຕ່ຫົວທີຕໍ່ບັນດາຄາດໝາຍ ໃນຊຸມປີຕໍ່ໜ້າໃຫ້ມີຄວາມເປັນເອກະພາບ. ພ້ອມກັນນີ້ ຜູ້ເຂົ້າຮ່ວມຈະໄດ້ພ້ອມກັນຄົ້ນຄວ້າ ເພື່ອຊອກໃຫ້ເຫັນບຸກຄົນທີ່ພົ້ນເດັ່ນ, ມີມາດຕະຖານ-ເງື່ອນໄຂ ທາບທາມຄັດເລືອກເຂົ້າໃນຄະນະບໍລິຫານງານພັກກະຊວງແຮງງານ ແລະ ສະຫວັດດີການສັງຄົມ ສະໄໝທີ VII ດ້ວຍຄຸນນະພາບ ເພື່ອເປັນຫຼັກແຫຼ່ງນໍາພາຈັດຕັ້ງປະຕິບັດໜ້າທີ່ການເມືອງ ຂອງຂະແໜງແຮງງານ ແລະ ສະຫວັດດີການສັງຄົມ ໃນຊຸມປີຕໍ່ໜ້າ ໃຫ້ມີຜົນສໍາເລັດ.
ໃນໂອກາດດັ່ງກ່າວ ສະຫາຍ ໂພໄຊ ໄຊຍະສອນ ໄດ້ຮຽກຮ້ອງມາຍັງບັນດາສະຫາຍ ຈົ່ງພ້ອມກັນຍົກສູງຄວາມຮັບຜິດຊອບການເມືອງຂອງຕົນ, ເສີມຂະຫຍາຍປະຊາທິປະໄຕ ແລະ ສຸມສະຕິບັນຍາເຂົ້າໃນການຄົ້ນຄວ້າປະກອບຄຳເຫັນຕໍ່ບັນດາເອກະສານຕ່າງໆ ຂອງກອງປະຊຸມຢ່າງເລິກເຊິ່ງ, ພ້ອມກັນຊອກ
ໃຫ້ເຫັນຜົນສໍາເລັດ-ດ້ານດີ ທີ່ຈະຕ້ອງໄດ້ເສີມຂະຫຍາຍ, ດ້ານອ່ອນ, ຂໍ້ຄົງຄ້າງ ແລະ ສາເຫດຕົ້ນຕໍ ທີ່ຈະຕ້ອງພ້ອມກັນແກ້ໄຂໃຫ້ຖືກຕ້ອງ, ບົນຈິດໃຈຄວາມເປັນເອກະພາບທາງດ້ານທັດສະນະແນວຄິດ ແລະ ຄວາມຮັບຜິດຊອບຂອງຄະນະພັກ ແລະ ພ້ອມກັນທາບທາມເອົາບຸກຄະລາກອນ ຄະນະບໍລິຫານງານພັກກະຊວງແຮງງານ ແລະ ສະຫວັດດີການສັງຄົມ ສະໄໝທີ VII ໃຫ້ຖືກຕາມມາດຕະຖານ, ເງື່ອນໄຂທີ່ກໍານົດໄວ້.
(ຂ່າວ: ຍຸພິນທອງ; ພາບ: ບຸນຕອມ)
ຄໍາເຫັນ