ຢູ່ຫ້ອງປະຊຸມຫ້ອງວ່າການແຂວງ, ເຂົ້າຮ່ວມເປັນປະທານມີ ທ່ານ ບູນລ້ຽງ ດວງສະເພົາທອງ ຫົວໜ້າພະແນກ ການເງິນແຂວງ ບໍລິຄຳໄຊ, ທ່ານ ສາຍທອງ ອູ້ຍພິລາວົງ ຮອງຫົວໜ້າກົມເຕັກໂນໂລຊີ່ຂໍ້ມູນຂ່າວສານ ກະຊວງການເງິນ, ມີສ່ວຍສາອາກອນປະຈຳເມືອງ 7 ຕົວເມືອງ, ພະແນກການທີ່ກ່ຽວຂ້ອງ, ນາຍບ້ານ 19 ບ້ານເທດສະບານແຂວງເຂົ້າຮ່ວມ.
ທ່ານ ນາງ ລາຕີ ໄຊຍະວົງ ຮອງຫົວໜ້າພະແນກນິຕິກຳ ກົມສ່ວຍສາອາກອນ ໄດ້ເຜີຍແຜ່ກົດໝາຍວ່າດ້ວຍການເກັບອາກອນທີ່ດິນ, ຊຶ່ງກົດໝາຍດັ່ງກ່າວປະກອບດ້ວຍ 9 ພາກ 47 ມາດຕາ, ໄດ້ກຳນົດຫຼັກການ, ລະບຽບການ, ວິທີການ ແລະ ມາດຕະການກ່ຽວກັບການຄູ້ມຄອງ ແລະ ຕິດຕາມ ກວດກາວຽກງານອາກອນທີ່ດິນ ເພື່ອເຮັດໃຫ້ວຽກງານດັ່ງກ່າວມີປະສິດທິພາບ ແລະ ປະສິດທີຜົນແນໃສ່ຮັບປະກັນເກັບລາຍຮັບເຂົ້າງົບປະມານແຫ່ງລັດໃຫ້ຖືກຕ້ອງ, ຄົບຖ້ວນ, ຍຸຕິທຳ ແລະ ໂປ່ງໃສ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ. ການເກັບອາກອນທີ່ດິນ ແມ່ນການເກັບພັນທະເປັນເງິນໃນການນຳໃຊ້ທີ່ດິນປະຈຳປີຈາກບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ເປັນເຈົ້າຂອງສິດນຳໃຊ້ທີ່ດິນ, ຜູ້ນຳໃຊ້ ຫຼື ຄອບຄອງຕາມທີ່ໄດ້ກຳນົດໄວ້ໃນກົດໝາຍ,ທີ່ດິນທີ່ຖືກເສຍອາກອນທີ່ດິນ ປະກອບມີ 2 ປະເພດຄື: ທີ່ດິນ ກະສິກຳ ແລະ ທີ່ດິນປຸກສ້າງ. ທີ່ດິນສອງປະເພດນີ້ ໄດ້ນຳໃຊ້ ຫຼື ບໍ່ນຳໃຊ້ (ເປົ່າຫວ່າງ) ຕ້ອງໄດ້ເສຍອາກອນທີ່ດິນປະຈຳປີ.
ຈຸດປະສົງຂອງການເຜີຍແຜ່ ກົດໝາຍຄັ້ງນີ້ ກໍເພື່ອສ້າງຄວາມຮັບຮູ້ເຂົ້າໃຈ ໃຫ້ແກ່ພະນັກງານຫຼັກແຫຼ່ງຂັ້ນແຂວງ, ຂັ້ນເມືອງ ກໍຄືການຈັດຕັ້ງຂັ້ນບ້ານ ເປັນບ່ອນອິງໃນການຈັດຕັ້ງປະຕິບັດໜ້າວຽກງານຕົວຈິງ.ໂອກາດທີ່ກະຊວງການເງິນ ລົງມາເຜີຍແຜ່ ກົດໝາຍ ຢູ່ແຂວງ ບໍລິຄຳໄຊໃນຄັ້ງນີ້ ໄດ້ນຳເອົາເຄື່ອງປີ່ນເຕີຈຳນວນ 5 ເຄື່ອງມອບໃຫ້ສ່ວຍສາອາກອນປະຈຳແຂວງ ນຳໃຊ້ເຂົ້າໃນການຄູ້ມຄອງ ຕິດຕາມ ແລະ ກວດກາວຽກງານອາກອນທີ່ດິນຕື່ມອີກ.
(ຂ່າວ_ພາບ: ສາຍສະໝອນ)
ຄໍາເຫັນ