 |
ໃນພິທີປິດຊຸດຝຶກອົບຮົມຄັ້ງນີ້, ທ່ານພອນສະຫວັດ ພອນແກ້ວ, ຮອງຫົວໜ້າກົມກວດກາ ໄດ້ຜ່ານບົດລາຍງານກ່ຽວກັບຜົນການຈັດຝຶກອົບຮົມວຽກງານກວດກາໃນຄັ້ງນີ້, ເຊິ່ງໄດ້ດຳເນີນມາແຕ່ວັນທີ 23ຕຸລາ-6ພະຈິກ 2025 (11 ວັນ) ດ້ວຍຜົນສຳເລັດອັນຈົບງາມ. ຜ່ານການຝຶກອົບຮົມ ເຮັດໃຫ້ນັກສຳມະນາກອນມີຄວາມຮັບຮູ້ແລະເຂົ້າໃຈກ່ຽວກັັບທັດສະນະຂອງພັກຕໍ່ວຽກງານກວດກາ, ຄວາມຮູ້ພື້ນຖານຂອງການຈັດຕັ້ງປະຕິບັດວຽກງານຕິດຕາມ, ກວດກາດີຍິ່ງຂຶ້ນເຊິ່ງເປັນວຽກທີ່ຕ້ອງໄດ້ເຮັດເປັນປົກກະຕິ, ຕໍ່ເນື່ອງແລະການກວດກາເປັນເຄື່ອງມືສຳຄັນ ເພື່ອຊ່ວຍເຕືອນ ແລະ ແກ້ໄຂບັນຫາໄດ້ຢ່າງທັນການ, ນອກນັ້ນ, ຍັງເປັນໂອກາດແລກປ່ຽນບົດຮຽນ ແລະ ປະສົບການຕົວຈິງນໍາບັນດານັກວິທະຍາກອນ ທີ່ມີປະສົບການ ແລະ ບົດຮຽນຫຼາກຫຼາຍເຊິ່ງເປັນຂໍ້ມູນພື້ນຖານອັນສໍາຄັນ ແລະ ຄວາມຮູ້ອັນລໍ້າຄ່າ ທີ່ສາມາດນຳໄປໜູນໃຊ້ເຂົ້າໃນການເຄື່ອນໄຫວວຽກງານຕິດຕາມ,ກວດກາຕົວຈິງ.
 |
ໃນໂອກາດດັ່ງກ່າວນີ້, ທ່ານ ທ່ານ ພົງສະຫວັນ ສີສຸລາດ ປະທານກອງປະຊຸມໄດ້ໃຫ້ກຽດມອບໃບຢັ້ງຢືນໃຫ້ແກ່ນັກສໍາມະນາກອນທີ່ເຂົ້າຮ່ວມຝຶກອົບຮົມທັງໝົດ 33 ທ່ານ, ຍິງ12ທ່ານ. ພ້ອມດຽວກັນນັ້ນ, ກໍ່ໄດ້ສະແດງຄວາມຂອບໃຈມາຍັງຄະນະກວດກາສູນກາງພັກ, ອົງການກວດສອບແຫ່ງລັດ ແລະ ອົງການໄອຍະການປະຊາຊົນສູງສຸດທີ່ໄດ້ໃຫ້ການຮ່ວມມືແລະອຳນວຍຄວາມສະດວກໃນການຕອບສະໜອງນັກວິທະຍາກອນ, ເອກະສານບົດຮຽນ ແລະ ປະກອບສ່ວນບໍາລຸງ-ກໍ່ສ້າງ ສະມາຊິກພັກ-ພະນັກງານ ທີ່ເຮັດວຽກງານກວດກາຂອງບັນດາໜ່ວຍພັກ ທີ່ຂື້ນກັບອົງຄະນະພັກກະຊວງການຕ່າງປະເທດ ໃຫ້ມີຄວາມເຂັ້ມແຂງ.
 |
ພ້ອມນັ້ນ, ທ່ານຍັງໄດ້ເນັ້ນໃຫ້ບັນດານັກສໍາມະນາກອນທຸກທ່ານເອົາໃຈໃສ່ວຽກງານດັ່ງກ່າວແລະ ນໍາເອົາບົດຮຽນທີ່ສໍາຄັນດັ່ງກ່າວໄປໜູນໃຊ້ເຂົ້າໃນການປະຕິບັດໜ້າທີ່ວຽກງານຂອງຕົນ ເພື່ອຍົກສູງວຽກງານຕິດຕາມ, ກວດກາຂອງກະຊວງການຕ່າງປະເທດ ໃຫ້ມີຄວາມເຂັ້ມແຂງ, ຖືກຕ້ອງ ແລະ ມີຜົນສັກສິດຍິ່ງຂຶ້ນ.
 |
ຊຸດຝຶກອົບຮົມຄັ້ງນີ້ ໄດ້ດຳເນີນໄປດ້ວຍຜົນສຳເລັດອັນຈົບງາມ ເຊິ່ງໃນຕອນທ້າຍ ທ່ານ ນາງ ວິໄລລັກ ແສນດວງເດດ ໄດ້ຕາງໜ້າໃຫ້ນັກສຳມະນາກອນ ກ່າວສະແດງຄວາມຂອບໃຈຕໍ່ທ່ານປະທານ, ບັນດານັກວິທະຍາກອນ ແລະ ແຂກຖືກເຊີນ ພ້ອມທັງຮັບເອົາບັນດາທິດນໍາ ແລະ ຄໍາເຫັນຕ່າງໆ ເພື່ອນໍາໄປໜູນໃຊ້ ແລະ ຖ່າຍທອດບົດຮຽນຕ່າງໆ ທີ່ໄດ້ຮັບຈາກຊຸດຝຶກອົບຮົມໃນຄັ້ງນີ້ ໃຫ້ເກີດດອກອອກຜົນໃນຕໍ່ໜ້າ.
ຄໍາເຫັນ