 |
ພິທີດັ່ງກ່າວ, ເປັນການຍ້ອງຍໍຜູ້ມີຜົນງານດີເດັ່ນ ທີ່ໄດ້ປະກອບສ່ວນເຂົ້າໃນວຽກງານຊາຍແດນ ໂດຍສະເພາະວຽກງານຕັ້ງພູມລໍາເນົາຕາມລໍາພັງໃຈ ແລະ ສ້າງຄອບຄົວບໍ່ຖືກລະບຽບ ຕາມບໍລິເວນຊາຍແດນ ລາວ-ຫວຽດນາມນັບແຕ່ປີ 2013-2023,ຊຶ່ງການແກ້ໄຂບັນຫານີ້ແມ່ນບົນຈິດໃຈແຫ່ງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ລາວ-ຫວຽດນາມ ເປັນພື້ນຖານ, ເປັນການແກ້ໄຂບັນຫາພິເສດສະເພາະກໍລະນີ ໃຫ້ແກ່ປະຊາຊົນທີ່ຢູ່ລຽບຕາມບໍລິເວນສອງຟາກຊາຍແດນເທົ່ານັ້ນ.ພ້ອມນີ້, ກໍໍ່ໄດ້ຍ້ອງຍໍວຽກງານ ສຳຫຼວດ, ບູລະນະ ແລະ ກໍ່ສ້າງຫຼັກໝາຍຊາຍແດນຮ່ວມ ລາວ-ມຽນມາ ຄັ້ງທີ 6ໃນຕົ້ນປີ 2024. ຜົນສຳເລັດຂອງທັງສອງວຽກງານດັ່ງກ່າວໄດ້ປະກອບສ່ວນອັນສຳຄັນເຂົ້າໃນການຄຸ້ມຄອງຊາຍແດນ ໃຫ້ມີຄວາມສະຫງົບ ແລະ ເປັນລະບຽບຮຽບຮ້ອຍ, ອຳນວຍຄວາມສະດວກໃຫ້ແກ່ການໄປມາຫາສູ່ ລະຫວ່າງປະຊາຊົນສອງຝາກຊາຍແດນແລະ ຊຸກຍູ້ການພັດທະນາຕາມບໍລິເວນຊາຍແດນ.
 |
ໃນໂອກາດນີ້, ໂດຍໄດ້ຮັບມອບສິດຈາກ ທ່ານ ນາຍົກລົດຖະມົນຕີ ແຫ່ງ ສປປ ລາວ ທ່ານ ທອງສະຫວັນ ພົມວິຫານ ໄດ້ໃຫ້ກຽດປະດັບຫຼຽນໄຊແຮງງານຊັ້ນ Ⅱໃຫ້ແກ່ຜູ້ທີ່ມີຜົນງານຊາຍແດນ ລາວ-ຫວຽດນາມຈຳນວນ 8 ທ່ານ, ປະດັບຫຼຽນໄຊແຮງງານຊັ້ນ Ⅲຈຳນວນ77 ທ່ານ, ຫຼຽນກາແຮງງານຈຳນວນທັງໝົດ139 ທ່ານ ແລະ ຊາຍແດນ ລາວ-ມຽນມາ ມອບຫຼຽນກາໃຫ້ຈຳນວນ40ທ່ານ, ມອບໃບຍ້ອງຍໍຂັ້ນລັດຖະບານຊາຍແດນ ລາວ-ຫວຽດນາມແລະ ຊາຍແດນ ລາວ-ມຽນມາ ຈຳນວນ163 ທ່ານ.ພ້ອມດຽວກັນນີ້,ກໍ່ໄດ້ມີຄຳເຫັນໂອ້ລົມຜູ້ເຂົ້າຮ່ວມພິທີ ໂດຍໄດ້ຕີລາຄາສູງຕໍ່ຜົນງານທີ່ຍາດມາໄດ້ ແລະ ໄດ້ຊີ້ນຳໃຫ້ສືບຕໍ່ເພີ້ມທະວີຄວາມເອົາໃຈໃສ່ໃນການປະຕິບັດໜ້າທີ່ວຽກງານໂດຍເນັ້ນໜັກການແກ້ໄຂບໍລິເວນຊາຍແດນ, ປະກົດການຍໍ້ທໍ້ຕາມບໍລິເວນຊາຍແດນເພື່ອເຮັດໃຫ້ບໍລິເວນຊາຍແດນທົ່ວປະເທດ, ໂດຍສະເພາະກໍຄືຊາຍແດນ ລາວ-ຫວຽດນາມ ແລະ ລາວ-ມຽນມາ ໃຫ້ມີຄວາມສະຫງົບປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ແລະ ການຮ່ວມມືກັບປະເທດໃກ້ຄຽງ.
 |
ຂ່າວ:ກະຊວງການຕ່າງປະເທດ
ຄໍາເຫັນ