ກະຊວງພາຍໃນຍົກລະດັບວຽກງານໂຄສະນາ-ປາຖະກະຖາ ໃຫ້ສະມາຊິກພັກ-ພະນັກງານ

ພິທີເປີດຊຸດຝຶກອົບຮົມ ວຽກງານໂຄສະນາ-ປາຖະກະຖາ ໃຫ້ສະມາຊິກພັກ-ພະນັກງານຫຼັກແຫຼ່ງຂອງກະຊວງພາຍໃນ ຊຸດທີ VI ໄດ້ຈັດຂຶ້ນໃນວັນທີ 25 ມີນາ ນີ້ ທີ່ກະຊວງດັ່ງກ່າວ ໂດຍໃຫ້ກຽດເຂົ້າຮ່ວມຂອງ ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ ຮອງເລຂາຄະນະບໍລິຫານງານພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ສະຫາຍ ນິສິດ ແກ້ວປັນຍາ ຮອງລັດຖະມົນຕີ ກະຊວງຫພາຍໃນ, ມີສະມາຊິກພັກ, ພາກສ່ວນທີ່ກ່ຽວຂ້ອງເຂົ້າຮ່ວມ.
ສະຫາຍ ນິສິດ ແກ້ວປັນຍາ ກ່າວວ່າ: ປະຕິບັດຕາມເນື້ອໃນມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ ກ່ຽວກັບເພີ່ມທະວີຍົກລະດັບຄວາມສາມາດຂອງບັນດາອົງການຕ່າງໆ ໃນວຽກງານແນວຄິດ, ເປັນຕົ້ນແມ່ນການບໍາລຸງສ້າງ ຍົກລະດັບຖັນແຖວພະນັກງານ ໃນວຽກງານໂຄສະນາສຶກສາອົບຮົມ, ປາຖະກະຖາ ໃຫ້ແທດເໜາະກັບຄວາມຮຽກຮ້ອງຕ້ອງການໃນໄລຍະໃໝ່ ແລະ ປະຕິບັດຕາມແຜນພັດທະນາພະນັກງານ-ລັດຖະກອນ ກະຊວງພາຍໃນ ເພື່ອສືບຕໍ່ຍົກລະດັບຄວາມສາມາດ ຂອງສະມາຊິກພັກ ພະນັກງານ-ລັດຖະກອນ ກະຊວງພາຍໃນ ໃຫ້ຫຍັບເຂົ້າສູ່ມາດຕະຖານ ດັ່ງທີ່ໄດ້ກໍານົດໄວ້ ໃນດໍາລັດ 203/ລບ ວ່າດ້ວຍມາດຕະຖານຕໍາແໜ່ງບໍລິຫານ ຂອງພະນັກງານ-ລັດຖະກອນ. ສະນັ້ນ, ກະຊວງພາຍໃນໄດ້ເປີດຊຸດຝຶກອົບຮົມ “ວຽກງານໂຄສະນາ-ປາຖະກະຖາ” ຂຶ້ນເພື່ອໃຫ້ສະມາຊິກພັກ, ພະນັກງານ-ລັດຖະກອນ ໄດ້ຮັບຮູ້ ແລະ ເຂົ້າໃຈກ່ຽວກັບຄວາມໝາຍ ແລະ ຄວາມສໍາຄັນຂອງວຽກງານໂຄສະນາ-ປາຖະກະຖາ.
ທ່ານກ່າວຕື່ມວ່າ: ການຝຶກອົບຮົມວຽກງານໂຄສະນາ-ປາຖະກະຖາ ຕາມຫຼັກສູດ ຂອງຄະນະໂຄສະນາອົບຮົມສູນກາງພັກ ຈະເປັນພື້ນຖານອັນສໍາຄັນ ໃຫ້ບັນດາສະຫາຍຜູ້ທີ່ມີຕໍາແໜ່ງນໍາພາ-ຄຸ້ມຄອງກໍຄືພະນັກງານສືບທອດໃຫ້ມີຄວາມສາມາດ ທາງດ້ານການຂີດຂຽນເອກະສານໃຫ້ຖືກວິທີ ແລະ ການປາຖະກະຖາຕໍ່ໜ້າຊຸມຊົນໃຫ້ໄດ້ຮັບຜົນດີ, ນີ້ແມ່ນຫຼັກສູດທີ່ມີປະໂຫຍດ ແລະ ສໍາຄັນ, ບໍ່ສະເພາະແຕ່ພະນັກງານຈັດຕັ້ງ ແລະ ພະນັກງານໂຄສະນາເທົ່ານັ້ນ, ຫາກຍັງມີຄວາມສໍາຄັນ ສໍາລັບສະມາຊິກພັກ, ພະນັກງານ-ລັດຖະກອນ ໃນທຸກຂົງເຂດວຽກງານ ໂດຍສະເພາະຜູ້ທີ່ເປັນ ພະນັກງານຫຼັກແຫຼ່ງ.
ໃນການຝຶກອົບຮົມຄັ້ງນີ້ນັກຝຶກອົບຮົມຈະໄດ້ຮັບຟັງການບັນຍາຍເອກະສານສໍາຄັນເປັນຕົ້ນແມ່ນ ບັນຫາພື້ນຖານຂອງວຽກງານໂຄສະນາ, ການຂີດຂຽນເອກະສານ, ຄຸນລັກສະນະ ແລະ ສີລະປະໃນການປາກເວົ້າ ຂອງນັກປາຖະກະຖາ ແລະ ບາງບົດຮຽນໃນການເຄື່ອນໄຫວປາຖະກະຖາ, ພາຍຫຼັງສຳເລັກຊຸດຝຶກອົຍຮົມນັກຝຶກອົບຮົມຍັງຈະໄດ້ທົດລອງຄົ້ນຄວ້າຂຽນບົດປາຖະກະຖາດ້ວຍຕົນເອງ ແລະ ທົດລອງຂຶ້ນປາຖະກະຖາໃນຫ້ອງຮຽນ. ການຝຶກອົບຮົມຈະເນີນເປັນເວລາ 10 ວັນຈຶ່ງຈະສຳເລັດ.
(ຂ່າວ-ພາບ: ສຳນານ)