ກອງປະຊຸມສະຫຼຸບ ຜົນສຳເລັດການເປັນເຈົ້າພາບ ແລະ ປະທານອາຊຽນ ຂອງກະ ຊວງປ້ອງກັນປະເທດ ແຫ່ງ ສປປ ລາວ ໃນປີ 2024 ຈັດຂຶ້ນໃນວັນທີ 29 ມັງກອນ ຜ່ານມາ, ພາຍໃຕ້ການເປັນປະທານຂອງ ສະຫາຍ ພົນໂທ ຄຳລຽງ ອຸທະໄກສອນ ກຳມະການສູນກາງພັກລັດຖະມົນຕີກະຊວງປ້ອງກັນປະເທດ, ມີບັນດາຄະນະນຳກະຊວງ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ໃນໂອກາດນີ້, ສະຫາຍ ພັນເອກ ເຟືອງໄຊ ມີລາກົງ ຮອງຫົວໜ້າກົມພົວພັນຕ່າງປະເທດຫົວໜ້າໜ່ວຍງານວິຊາການ ເຈົ້າໜ້າທີ່ອາວຸໂສປ້ອງກັນປະເທດອາຊຽນຫົວໜ້າກອງເລຂາອາຊຽນ ກະຊວງປ້ອງກັນປະເທດ ໄດ້ໃຫ້ຮູ້ວ່າ: ໃນປີ 2024 ກະຊວງປ້ອງກັນປະເທດ ແຫ່ງ ສປປ ລາວ ໄດ້ເປັນເຈົ້າພາບ ແລະ ປະທານອາຊຽນ ທັງໝົດ 31 ກອງປະຊຸມ ແລະ ມີຜູ້ແທນເຂົ້າຮ່ວມທັງໝົດ 2,902 ທ່ານ, ອັນພົ່ນເດັ່ນແມ່ນກອງປະຊຸມລັດຖະມົນຕີປ້ອງກັນປະເທດອາຊຽນ (ADMM) ຄັ້ງທີ 18, ອາຊຽນ-ບວກ (ADMM-Plus) ຄັ້ງທີ 11, ກອງປະຊຸມຜູ້ບັນຊາການທະຫານສູງສຸດອາຊຽນ ຄັ້ງທີ 21 ແລະ ບັນດາກອງປະຊຸມປິ່ນອ້ອມ. ຕໍ່ຜົນສຳເລັດຂອງບັນດາກອງປະຊຸມດັ່ງກ່າວ, ໄດ້ຍົກໃຫ້ເຫັນເຖິງຄວາມເອົາໃຈໃສ່, ຄວາມຮັບຜິດຊອບສູງ ແລະ ເປັນເຈົ້າພາບທີ່ດີ ຂອງກະຊວງປ້ອງກັນປະເທດ ໃນການຕ້ອນຮັບບັນດາແຂກ ແລະ ຄະນະຜູ້ແທນຕ່າງປະເທດ ທີ່ມາເຂົ້າຮ່ວມບັນດາກອງປະຊຸມອາຊຽນ ລວມເຖິງການປະຕິບັດໜ້າທີ່ວຽກງານຢ່າງເປັນແບບແຜນ ໂດຍການຮັດແໜ້ນປະສານສົມທົບລະຫວ່າງ ກອງເລຂາອາຊຽນ ກະຊວງປ້ອງກັນປະເທດ, ບັນດາອະນຸກຳມະການ ແລະ ພາກສ່ວນທີ່ກ່ຽວຂ້ອງ ຊຶ່ງເຮັດໃຫ້ບັນດາກອງປະຊຸມອາຊຽນ ທີ່ກອງທັບປະຊາຊົນລາວ ເປັນເຈົ້າພາບ ໄດ້ຮັບຜົນສຳເລັດຕາມຄາດໝາຍທີ່ກຳນົດໄວ້ ແລະ ເຮັດໃຫ້ແຂກ ແລະ ຄະນະຜູ້ແທນຕ່າງປະເທດ ມີຄວາມປະທັບໃຈ, ຍ້ອງຍໍ ແລະ ຊົມເຊີຍ ການເປັນເຈົ້າພາບ ແລະ ປະທານອາຊຽນ ຂອງກະຊວງປ້ອງກັນປະເທດ ກໍຄື ສປປ ລາວ.
ການເປັນປະທານອາຊຽນດັ່ງກ່າວ, ຍັງຮັບປະກັນໄດ້ດ້ານວຽກງານປິ່ນອ້ອມ ລວມເຖິງວຽກງານ ຄວາມປອດໄພ, ພິທີການ, ບໍລິຫານ, ບຸກຄະລາກອນຮັບໃຊ້ ແລະ ວຽກງານອື່ນໆ ໂດຍສະເພາະແມ່ນດ້ານວຽກງານເນື້ອໃນ. ນອກຈາກນີ້, ຍັງໄດ້ອອກຖະແຫຼງການ 4 ເອກະສານທີ່ສຳຄັນຄື: ຖະແຫຼງການວຽງຈັນ ຂອງກອງປະຊຸມລັດຖະມົນຕີປ້ອງກັນປະເທດອາຊຽນ ວ່າດ້ວຍ “ຮ່ວມມືກັນ ເພື່ອສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງ ຂອງອາຊຽນ” ແລະ ຖະແຫຼງການຮ່ວມ ຂອງກອງປະຊຸມລັດຖະມົນຕີປ້ອງກັນປະເທດ ອາຊຽນ-ບວກ ວ່າດ້ວຍ “ການປ່ຽນແປງຂອງສະພາບດິນຟ້າອາກາດ”, ຖະແຫຼງການຮ່ວມຂອງ ກອງປະຊຸມລັດຖະມົນຕີປ້ອງກັນປະເທດອາຊຽນ ວ່າດ້ວຍຜົນສຳ ເລັດຂອງການຈັດຕັ້ງປະຕິບັດແຜນແມ່ບົດຂອງ ປະຊາຄົມການເມືອງ ແລະ ຄວາມໝັ້ນຄົງອາຊຽນ ໃນປີ 2025 ແລະ ຖະແຫຼງການຮ່ວມ ຂອງກອງປະຊຸມຜູ້ບັນຊາການທະຫານສູງສຸດອາຊຽນ ວ່າດ້ວຍ ຮ່ວມມືກັນ ເພື່ອສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງ ຂອງອາຊຽນ.
ໂອກາດນີ້, ສະຫາຍ ພົນໂທ ຄຳລຽງ ອຸທະໄກສອນ ໄດ້ຍ້ອງຍໍຊົມເຊີຍຜົນສຳເລັດດັ່ງກ່າວ, ພ້ອມທັງເນັ້ນໜັກຫຼາຍບັນຫາ ເປັນຕົ້ນທຸກພາກສ່ວນທີ່ກ່ຽວຂ້ອງ ຕ້ອງສຸມໃສ່ກໍ່ສ້າງພະນັກງານສືບທອດຢ່າງຕໍ່ເນື່ອງ, ເປັນລະບົບ ໂດຍສະເພາະການສ້າງຂີດຄວາມສາມາດທາງດ້ານພາສາຕ່າງປະເທດ, ຄວາມຮູ້ວິຊາການອື່ນໆ; ເອົາໃຈໃສ່ສັງລວມ ແລະ ຮັກສາຂໍ້ມູນທີ່ສໍາຄັນ ຂອງກອງປະຊຸມເຊັ່ນ: ເນື້ອໃນ, ຮູບພາບເຄື່ອນໄຫວ ແລະ ອື່ນໆ ເພື່ອເປັນຂໍ້ມູນຂອງການສຶກສາຄົ້ນຄວ້າ ແລະ ເປັນບ່ອນອີງໃນການເປັນປະທານອາຊຽນ ໃນຕໍ່ໜ້າ, ພ້ອມທັງຮຽກຮ້ອງໃຫ້ພ້ອມກັນສຸມໃສ່ ເຮັດສຳເລັດໜ້າທີ່ການເມືອງທີ່ຕົນເອງໄດ້ຮັບການມອບໝາຍ, ສິ່ງສໍາຄັນແມ່ນສາມັກຄີຮ່ວມແຮງຮ່ວມໃຈກັນປັບປຸງ ແລະ ກໍ່ສ້າງກອງທັບປະຊາຊົນລາວ ໃຫ້ກາຍເປັນກອງທັບປະຕິວັດ ທີ່ມີແບບແຜນ, ທັນສະໄໝ ແລະ ເຂັ້ມແຂງ.
(ຂ່າວ-ພາບ: ສຸເວດ ສີດາຄໍາ)
ຄໍາເຫັນ