ກະຊວງປ້ອງກັນປະເທດມອບນາມມະຍົດໃຫ້ນາຍທະຫານ

ກະຊວງປ້ອງກັນປະເທດໄດ້ຈັດພິທີມອບນາມມະຍົດສາດສະດາຈານ, ຮອງສາດສະດາຈານ ແລະ ມອບໃບຍ້ອງຍໍໃຫ້ນາຍທະຫານໃນວັນທີ 7 ກຸມພາຜ່ານມາ ທີ່ສະໂມສອນກົມໃຫຍ່ການເມືອງກອງທັບ ໂດຍການເປັນປະທານຂອງສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກຮອງນາຍົກລັດຖະມົນຕີລັດຖະມົນຕີກະຊວງປ້ອງກັນປະເທດ, ມີສະຫາຍຮອງສາດສະດາຈານ(ຮສ)ປະລິນຍາເອກ(ປອ) ພຸດ ສິມມາລາວົງ ກຳມະການສູນກາງພັກລັດຖະມົນຕີກະຊວງສຶກສາທິການ ແລະ ກິລາ (ສສກ), ມີຄະນະນໍາກະຊວງປ້ອງກັນປະເທດແຂກຖືກເຊີນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
     ສະຫາຍຮອງສາດສະດາຈານປະລິນຍາເອກ ຫຼ້າວັນ ວົງຄຳສານ ຫົວໜ້າກົມການສຶກສາຊັ້ນສູງ ກະຊວງ ສສກ ໄດ້ຜ່ານດໍາລັດນາຍົກລັດຖະມົນຕີ ວ່າດ້ວຍການແຕ່ງຕັ້ງສາດສະດາຈານກຽດຕິຄຸນ, ຮອງສາດສະດາຈານ, ອີງຕາມກົດໝາຍວ່າດ້ວຍລັດຖະບານສະບັບເລກທີ 03/ສພຊ, ລົງວັນທີ 16 ພະຈິກ 2021, ອີງຕາມກົດໝາຍວ່າດ້ວຍການສຶກສາຊັ້ນສູງສະບັບເລກທີ 87/ສພຊ, ລົງວັນທີ 11 ພະຈິກ 2020, ອີງຕາມດຳລັດວ່າດ້ວຍຕໍາແໜ່ງວິຊາການຄູຢູ່ສະຖານການສຶກສາຊັ້ນສູງສະບັບເລກທີ 03/ລບ, ລົງວັນທີ 10 ມັງກອນ 2020; ອີງຕາມໜັງສືສະເໜີຂອງກະຊວງ ສສກ ສະບັບເລກທີ 1942/ສສກ, ລົງວັນທີ 11 ທັນວາ 2023, ນາຍົກລັດຖະມົນຕີອອກດໍາລັດ: ແຕ່ງຕັ້ງສະຫາຍ ພົນໂທ ປອ ທອງລອຍ ສິລິວົງ ດຳລົງຕຳແໜ່ງສາດສະດາຈານກຽດຕິຄຸນ ສາຂາຍຸດທະສາດປ້ອງກັນຊາດ, ສະຫາຍ ພົນໂທ ປອ ວົງຄຳ ພົມມະກອນ ດຳລົງຕໍາແໜ່ງສາດສະດາຈານກຽດຕິຄຸນ ສາຂາຍຸດທະສາດປ້ອງກັນຊາດ, ສະຫາຍ ພົນຈັດຕະວາ ປອ ຄຳຜາຍ ສະພັງເໜືອ ດຳລົງຕຳແໜ່ງຮອງສາດສະດາຈານ ສາຂາຍຸດທະສາດປ້ອງກັນຊາດ, ສະຫາຍ ພົນຈັດຕະວາ ປອ ສົມພອນ ສີສຸວັນນະ ດຳລົງຕຳແໜ່ງຮອງສາດສະດາຈານ ສາຂາຍຸດທະສາດປ້ອງກັນຊາດ, ສະຫາຍ ພົນຈັດຕະວາ ປອ ຈັນສະໝອນ ມະຫາວົງ ດຳລົງຕຳແໜ່ງຮອງສາດສະດາຈານ ສາຂາພະຍາດຊຶມເຊື້ອເຂດຮ້ອນ-ແມ່ກາຝາກ ແລະ ຕິດແປດ, ສະຫາຍ ພັນເອກ ປອ ກິ່ງແກ້ວ ແສງຄຳປອງ ດຳລົງຕຳແໜ່ງຮອງສາດສະດາຈານ ສາຂາຜ່າຕັດສະໝອງ-ເສົາສັນຫຼັງ, ສະຫາຍ ພັນເອກ ປອ ສະແຫວງໄຊ ດາລາສາດ ດຳລົງຕຳແໜ່ງຮອງສາດສະດາຈານ ສາຂາຜ່າຕັດຜົ້ງເອິກ, ສະຫາຍ ພັນໂທ ປອ ຄໍາມູນ ສົມຕະກຸນ ດຳລົງຕຳແໜ່ງຮອງສາດສະດາຈານ ສາຂາກະທົບຜ່າຕັດກະດູກ ແລະ ແຕ່ງຕັ້ງສະຫາຍ ພັນໂທ ຄໍາຫຼ້າ ສາລີວົງຄໍາໃສ ດຳລົງຕຳແໜ່ງຮອງສາດສະດາຈານ ສາຂາພະຍາດລະບົບລະລາຍ. 
    ຈາກນັ້ນ, ສະຫາຍ ພົນຈັດຕະວາ ວັນລະວົງ ນັນທະວົງ ຫົວໜ້າກົມນະໂຍບາຍ ກະຊວງປ້ອງກັນປະເທດ ຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການປະດັບຫຼຽນໄຊພິລະອາດຫານ, ອີງຕາມດຳລັດຂອງນາຍົກລັດຖະມົນຕີ ສະບັບເລກທີ 116/ລບ, ລົງວັນທີ 22 ເມສາ 2019 ວ່າດ້ວຍການແຂ່ງຂັນ ແລະ ຍ້ອງຍໍ, ອີງຕາມໜັງສືສະເໜີຂອງກົມໃຫຍ່ການເມືອງກອງທັບ ສະບັບເລກທີ 294/ກມທ, ລົງວັນທີ 18/12/2013 ເພື່ອຍ້ອງຍໍສັນລະເສີນຜົນງານ, ຄຸນງາມຄວາມດີໃຫ້ແກ່ການນຳກະຊວງສສກ ທີ່ມີຜົນງານປະກອບສ່ວນຊ່ວຍສ້າງໂຄງການຫຼັກສູດການຮຽນ-ການສອນ, ຄົ້ນຄວ້າວິທະຍາສາດການທະຫານໃຫ້ແກ່ບັນດາໂຮງຮຽນ, ວິທະຍາຄານທົ່ວກອງທັບປະຊາຊົນລາວ. ກະຊວງປ້ອງກັນປະເທດຕົກລົງ: ມອບຫຼຽນໄຊພິລະອາດຫານຊັ້ນ I ໃຫ້ກະຊວງ ສສກ; ປະດັບຫຼຽນໄຊພິລະອາດຫານຊັ້ນ II ໃຫ້ສະຫາຍ ຮສ ປອ ພຸດ ສິມມາລາວົງ ລັດຖະມົນຕີກະຊວງ ສສກ, ຫຼຽນໄຊພິລະອາດຫານຊັ້ນ III ໃຫ້ຈຳນວນ 3 ສະຫາຍຄື: ສະຫາຍ ຮສ ປອ ຫຼ້າວັນ ວົງຄຳສານ ຫົວໜ້າກົມການສຶກສາຊັ້ນສູງ ກະຊວງ ສສກ, ສະຫາຍ ວິໄຊ ຈັນທະສອນຫົວໜ້າຫ້ອງການສະພາການສຶກສາຊັ້ນສູງ ແລະ ສະຫາຍ ຄໍາລຽງ ນາມບຸດຮອງຫົວໜ້າຫ້ອງການສະພາການສຶກສາຊັ້ນສູງຢ່າງສົມກຽດ.
    ໂອກາດນີ້, ສະຫາຍ ພົນເອກ ຈັນສະໝອນ ຈັນຍາລາດ ໄດ້ສະແດງຄວາມຊົມເຊີຍມາຍັງຄະນະນໍາກະຊວງປ້ອງກັນປະເທດ ທີ່ເຫັນໄດ້ຄວາມສໍາຄັນທາງດ້ານການສຶກສາ ແລະ ຍົກສູງຄວາມຮູ້-ຄວາມສາມາດໃນການຄົ້ນຄວ້າທາງວິທະຍາສາດໄດ້ຕັ້ງໜ້າສ້າງບຸກຄະລາກອນຕະຫຼອດໄລຍະເວລາທີ່ຜ່ານມາຈົນສາມາດປະດັບນາມມະຍົດໄດ້ຮອດ ຂັ້ນສາດສະດາຈານ ແລະ ຮອງສາດສະດາຈານ, ສະຫາຍຍັງໄດ້ຮຽກຮ້ອງໃຫ້ພ້ອມກັນສຸມສະຕິເຫື່ອແຮງກໍາລັງຄວາມຮູ້-ຄວາມສາມາດເຂົ້າໃນການພັດທະນາກົມກອງໃຫ້ມີຄວາມກ້າວໜ້າຂຶ້ນໄປເລື້ອຍໆ ແລະ ປະກອບສ່ວນເຂົ້າໃນການຄົ້ນຄວ້າທາງດ້ານວິທະຍາສາດປົກປັກຮັກສາ ແລະ ສ້າງສາປະເທດຊາດ ເພື່ອເຮັດໃຫ້ປະເທດຊາດມີຄວາມຈະເລີນສີວິໄລ.
ຂ່າວ-ພາບ: ບິກໄຊ ສົມພູ