ແກ່ນທ້າວ ມອບເຂົ້າສານຈ້າວໃຫ້ຄອບຄົວທີ່ໄດ້ຮັບຜົນກະທົບຈາກໄພພິບັດ ແລະ ນັກຮຽນຫໍພັກ

ທ່ານ ອານຸເດດ ພິທັກ ຫົວໜ້າຫ້ອງການແຮງງານ ແລະ ສະຫວັດດີການສັງຄົມເມືອງ ໄດ້ລາຍງານໃຫ້ຮູ້ວ່າ: ເຂົ້າສານຈ້າວທີ່ນໍາມາມອບໃນຄັ້ງນີ້, ແມ່ນໄດ້ຮັບການຊ່ວຍເຫຼືອຈາກ ອົງການຈັດຕັ້ງອາຊຽນ ຈໍານວນ 3,000 ກິໂລ. ການຈັດແບ່ງແມ່ນອີງຕາມແຈ້ງການຂອງພະແນກແຮງງານ ແລະ ສະຫວັດດີການສັງຄົມແຂວງແຂວງໄຊຍະບູລີ ແລະ ຂໍ້ຕົກລົງຂອງຄະນະກຳມະການປົກຄອງເມືອງແກ່ນທ້າວ. ຊຶ່ງໄດ້ມອບໃຫ້ຄອບຄົວຜູ້ປະສົບໄພພິບັດ 77 ຄອບຄົວ ກວມເອົາ 8 ບ້ານ ຄື: ບ້ານຫ້ວຍລ້າ, ນາຄໍາ, ດອນສັ່ງ, ບ້ານແຄ, ດອນເມນ, ຫ້ວຍບູຮາ, ປາກແຄມ ແລະ ບ້ານໜອງ ລວມທັງໝົດ 2,760 ກິໂລ ແລະ ມອບໃຫ້ນັກຮຽນດ້ອຍໂອກາດທີ່ນອນຫໍພັກ ຈໍານວນ 24 ນ້ອງລວມ240 ກິໂລ.

(ຂ່າວ: ແກ່ນທ້າວ)