 |
ທ່ານ ສົມສີ ຊາວພິລາ ຮອງປະທານຄະນະກໍາມະການປົກຄອງເມືອງ ໄດ້ລາຍງານວ່າ: ຕາແສງ ດອນເມນ ຕັ້ງຢູ່ທາງທິດເໜືອ ຂອງເມືອງແກ່ນທ້າວ ຫ່າງຈາກເທດສະບານເມືອງ ປະມານ 31.5 ກິໂລແມັດ,ມີເນື້ອທີ່ທັງໝົດ 24,983.25 ເຮັກຕາ; ປະກອບມີ 7 ບ້ານຄື: ບ້ານຫ້ວຍເປັດ, ບ້ານຫ້ວຍຫຼອດ, ບ້ານນາຄູນ, ບ້ານດອນເມນ, ບ້ານແຄ, ບ້ານນາຄຳ ແລະ ບ້ານດອນສັ້ງ,ມີພົນລະເມືອງທັງໝົດ 5,227 ຄົນ, ຍິງ 2,447 ຄົນ (ໃນນີ້ ເຜົ່າລາວ ກວມເອົາ 99.97% ແລະ ເຜົ່າອື່ນໆ ກວມເອົາ 0,03%).
ສໍາລັບສໍານັກງານຕາແສງ ແມ່ນຕັ້ງຢູ່ບ້ານດອນເມນ (ນຳໃຊ້ຫ້ອງການກຸ່ມບ້ານພັດທະນາດອນເມນຫຼັງເກົ່າ); ດ້ານການຈັດຕັ້ງພັກ-ພະນັກງານ ປະກອບມີ 1 ອົງຄະນະພັກຮາກຖານ, ມີໜ່ວຍພັກຂຶ້ນກັບທັງໝົດ 8 ໜ່ວຍ (ໜ່ວຍພັກບ້ານ 7 ໜ່ວຍ ແລະ ໜ່ວຍພັກໂຮງຮຽນ 1 ໜ່ວຍ),ມີສະມາຊິກພັກທັງໝົດ 108 ສະຫາຍ, ຍິງ 27 ສະຫາຍ (ສະມາຊິກພັກສໍາຮອງ 12 ສະຫາຍ, ຍິງ 6 ສະຫາຍ).
 |
ຈາກນັ້ນ, ທ່ານ ໄພທອງ ຈັນດາ ຮອງຫົວໜ້າຄະນະຈັດຕັ້ງແຂວງ ໄດ້ຜ່ານຂໍ້ຕົກລົງຂອງປະທານຄະນະກຳມະການປົກຄອງແຂວງ ວ່າດ້ວຍການສ້າງຕັ້ງຕາແສງ ດອນເມນ ແລະ ທ່ານ ຈິນດາ ກະທາທອງ ຮອງເລຂາຄະນະບໍລິຫານງານພັກເມືອງ ໄດ້ຜ່ານ ມະຕິຕົກລົງ ຂອງຄະນະປະຈໍາພັກເມືອງ ວ່າດ້ວຍການສ້າງຕັ້ງອົງຄະນະພັກຮາກຖານຕາແສງດອນເມນ, ການສ້າງຕັ້ງໜ່ວຍພັກຫ້ອງການຕາແສງດອນເມນ, ຂໍ້ຕົກລົງວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ຢູ່ຫ້ອງການຕາແສງດອນເມນ, ມະຕິຕົກລົງວ່າດ້ວຍການບົ່ງຕົວແຕ່ງຕັ້ງຄະນະບໍລິຫານງານພັກຕາແສງດອນເມນ, ເລຂາ-ຮອງເລຂາແລະ ປະທານ-ຮອງປະທານກວດກາຄະນະພັກຕາແສງດອນເມນ, ມະຕິຕົກລົງບົ່ງຕົວແຕ່ງຕັ້ງຄະນະໜ່ວຍພັກຫ້ອງການຕາແສງດອນເມນ ແລະ ຂໍ້ຕົກລົງ ຂອງປະທານຄະນະກໍາມະການປົກຄອງເມືອງ ວ່າດ້ວຍການແຕ່ງຕັ້ງປະທານ, ຮອງປະທານຄະນະກໍາມະການປົກຄອງຕາແສງດອນເມນ ເຊິ່ງປະກອບມີ: ທ່ານ ສະເຫຼີມທອງ ລາດສະແກ້ວເປັນປະທານຄະນະກຳມະການປົກຄອງຕາແສງ, ທ່ານ ວິມົນ ແກ້ວມາລາແລະ ທ່ານ ທອງຄູນ ບຸນຈະເລີນເປັນຮອງປະທານຄະນະກຳມະການປົກຄອງຕາແສງ.
ຂ່າວ: ແກ່ນທ້າວ
ຄໍາເຫັນ