 |
ທ່ານ ກອງທ່ຽນ ໄຊະພອນ ຫົວໜ້າຫ້ອງການກະສິກໍາ ແລະ ສິ່ງແວດລ້ອມເມືອງ ໄດ້ລາຍງານການຈັດຕັ້ງປະຕິບັດວຽກງານການປະມົງ ປະຈຳປີ 2025 ແລະ ແຜນການ ປີ 2026 ໂດຍໄດ້ຍົກໃຫ້ເຫັນຜົນງານປີ 2025 ທົ່ວເມືອງ ມີໜອງປາທັງໝົດ 2,563 ໜອງ, ມີ3,170 ຄອບຄົວ, ເນື້ອທີ່ລວມ 474.62 ເຮັກຕາ,ປ່ອຍປາໄດ້ທັງໝົດ 7,650,000 ໂຕ (ບັນລຸ 85% ຂອງແຜນການ). ໃນນີ້,ປະກອບມີ: ປາໄນ, ປານິນ, ປາປາກ, ປາອິນເດຍ, ປາເກັດແລບ, ປາຈາລະແມັດ, ປາດຸກ, ປາເພ້ຍ ແລະ ປາບຶກ.ສະເພາະປີ 2026 ເມືອງແກ່ນທ້າວມີແຜນການ ຈະປ່ອຍປາໃຫ້ໄດ້ທັງໝົດ 11,250,000 ໂຕ ເຊິ່ງຮອດປັດຈຸບັນ ປະຕິບັດໄດ້ແລ້ວ 950,000 ໂຕ (ເທົ່າກັບ 8.44% ຂອງແຜນການ).
ທ່ານຫົວໜ້າຫ້ອງການກະສິກໍາ ແລະ ສິ່ງແວດລ້ອມເມືອງ ກ່າວຕື່ມວ່າ: ສໍາລັບການຈັດພິທີສະເຫຼີມສະຫຼອງໃນຄັ້ງນີ້ ແມ່ນໄດ້ນໍາປາລົງປ່ອຍສູ່ແມ່ນ້ຳຂອງ ຢູ່ຈຸດບ້ານດອນເມນ ຈໍານວນ 37,500 ໂຕ. ພ້ອມດຽວກັນ, ທາງຫ້ອງການຈະສືບຕໍ່ຊຸກຍູ້ສົ່ງເສີມໃຫ້ຊາວກະສິກອນ ປ່ອຍປາລົງໃນໜອງຂອງຕົນເອງ ແລະ ບ່ອນທີ່ມີເງື່ອນໄຂ ເພື່ອໃຫ້ບັນລຸຕາມແຜນການທີ່ວາງໄວ້.
 |
ທ່ານ ຄໍາປຸ່ນ ນວນສະບັບ ໄດ້ກ່າວວ່າ:ເມືອງແກ່ນທ້າວ ມີຄວາມອຸດົມສົມບູນທາງທໍາມະຊາດ, ມີຫ້ວຍນໍ້າລໍາເຊທີ່ເປັນແຫຼ່ງອາໄສຂອງສັດນໍ້ານາໆຊະນິດ ເຊິ່ງເປັນປັດໄຈສໍາຄັນໃນການພັດທະນາເສດຖະກິດ-ສັງຄົມ. ເຖິງຢ່າງໃດກໍຕາມ, ໃນຊຸມປີຜ່ານມາ ຄວາມອຸດົມສົມບູນເຫຼົ່ານັ້ນໄດ້ຫຼຸດລົງ, ຫ້ວຍນໍ້າຫຼາຍສາຍບົກແຫ້ງ ແລະ ຈຳນວນສັດນໍ້າຫຼຸດລົງ ຍ້ອນການກະທຳຂອງມະນຸດເປັນຕົ້ນແມ່ນການບຸກລຸກຂຸນຫ້ວຍ ແລະ ການນໍາໃຊ້ເຄື່ອງມືຫາປາທີ່ຫວງຫ້າມ ເຊັ່ນ: ການຊັອດໄຟຟ້າ, ການເບື່ອປາ ແລະ ອື່ນໆ ເຊິ່ງເຮັດໃຫ້ສັດນໍ້າບາງຊະນິດເກືອບສູນພັນ.ທ່ານໄດ້ຮຽກຮ້ອງໃຫ້ທຸກພາກສ່ວນ ຈົ່ງຮ່ວມກັນຈັດຕັ້ງປະຕິບັດແນວທາງນະໂຍບາຍຂອງພັກ ແລະ ກົດໝາຍຂອງລັດ ຢ່າງເຂັ້ມງວດ, ເພີ່ມທະວີມາດຕະການຄຸ້ມຄອງ, ສົ່ງເສີມການລ້ຽງ, ການຂະຫຍາຍພັນ ແລະ ການຮັກສາສັດນໍ້າ ໂດຍບໍ່ໃຫ້ມີຜົນກະທົບຕໍ່ທໍາມະຊາດ. ພ້ອມທັງປຸກລະດົມທົ່ວປວງຊົນໃຫ້ເຫັນຄວາມສໍາຄັນ ແລະ ເປັນເຈົ້າການເຂົ້າຮ່ວມໃນການອະນຸລັກ ປົກປັກຮັກສາສັດນໍ້າໃຫ້ມີຄວາມຍືນຍົງ.
ຂ່າວ: ແກ່ນທ້າວ
ຄໍາເຫັນ