 |
ທ່ານ ບຸນຍັງ ພັນທະວົງ ຮອງປະທານຄະນະກໍາມະການປົກຄອງເມືອງ ໄດ້ລາຍງານວ່າ: ງານແຂ່ງຂັນຊ່ວງເຮືອປະຈໍາປີ 2025 ໄດ້ດໍາເນີນເປັນເວລາ 2 ວັນຄື: ວັນທີ 13 ກັນຍາ ເປັນການແຂ່ງຂັນຊ່ວງເຮືອເພດຍິງ ມີເຮືອເຂົ້າຮ່ວມແຂ່ງຂັນທັງໝົດ 8 ລໍາ ແລະ ວັນທີ 14 ກັນຍາ ແມ່ນການແຂ່ງຂັນຊ່ວງເຮືອເພດຊາຍ ມີເຮືອເຂົ້າຮ່ວມແຂ່ງຂັນທັງໝົດ 13 ລໍາ, ຊຶ່ງເປັນມື້ເປີດງານແຂ່ງຂັນກິລາຊ່ວງເຮືອປະຈຳປີ 2025 ຢ່າງເປັນທາງການ. ຈາກນັ້ນ, ທ່ານ ສີຄານ ແກ່ນມະນີ ປະທານຄະນະກໍາມະການປົກຄອງເມືອງໄດ້ກ່າວເປີດງານແຂ່ງຂັນກິລາຊ່ວງເຮືອປະຈໍາປີ 2025 ວ່າ: ການແຂ່ງຂັນຊ່ວງເຮືອປະຈໍາປີນີ້, ຈັດຂຶ້ນໃນວັນທີ 13-14 ກັນຍາ, ເພື່ອເປັນການອະນຸລັກຮັກສາຮີດຄອງປະເພນີອັນດີງາມຂອງຊາດກໍຄືຂອງທ້ອງຖິ່ນທີ່ເຄີຍປະຕິບັດກັນມາເປັນເວລາຍາວນານ ແລະ ທັງເປັນການເສີມສ້າງຄວາມສາມັກຄີຮັກແພງລະຫວ່າງປະຊາຊົນຊັ້ນຄົນຕ່າງໆໃຫ້ເປັນປຶກແຜ່ນ ແລະ ທັງເປັນການຊຸກຍູ້ສົ່ງເສີມການທ່ອງທ່ຽວຢູ່ພາຍໃນເມືອງໃຫ້ໄດ້ຮັບການພັດທະນາດີຂຶ້ນ.
 |
ຜ່ານການແຂ່ງຂັນ, ຊ່ວງເຮືອເພດຊາຍທີ 1 ໄດ້ແກ່ເຮືອບໍລິສັດຈັນທະວົງ ກໍ່ສ້າງ ຂົວ-ທາງ ໄດ້ຮັບເງິນລາງ 10 ລ້ານກີບ ພ້ອມຂັນນໍ້າໜັກ 1 ກິໂລ, ທີ 2 ເຮືອພອນພຣະເຈົ້າຊຽງຢືນ1 ໄດ້ຮັບເງິນລາງວັນ 8 ລ້ານກີບ, ທີ 3 ເຮືອບ້ານທ້າວແກ່ນໄດ້ຮັບເງິນລາງວັນ 6 ລ້ານກີບ ແລະ ທີ 4 ເຮືອບ້ານເມືອງໝໍ + ເຮືອ ມສ ເມືອງໝໍໄດ້ຮັບເງິນລາງວັນ 4 ລ້ານກີບ. ສ່ວນເຮືອເພດຍິງທີ 1 ເຮືອບ້ານເມືອງໝໍໄດ້ຮັບເງິນລາງວັນ 10 ລ້ານກີບ ພ້ອມຂັນນໍ້າໜັກ 0,5 ກິໂລ, ທີ 2 ເຮືອບ້ານພວນ ໄດ້ຮັບເງິນລາງວັນ 8 ລ້ານກີບ, ທີ 3 ເຮືອບ້ານທ້າວແກ່ນ ໄດ້ຮັບເງິນລາງວັນ 6 ລ້ານກີບ ແລະ ທີ 4 ເຮືອບ້ານຫາດແດງໄດ້ຮັບເງິນລາງວັນ 4 ລ້ານກີບ.
(ຂ່າວ: ແກ່ນທ້າວ)
ຄໍາເຫັນ