 |
ທ່ານ ຂັນຕີ ສີລະວົງສາ ກ່າວເປີດກອງປະຊຸມວ່າ: ໃນໄຕມາດ I ປີ 2026 ນີ້, ເຖິງວ່າສະພາບການຂອງໂລກ ແລະ ພາກພື້ນ ຈະມີການຜັນແປຢ່າງສັບສົນ, ລວມເຖິງສິ່ງທ້າທາຍດ້ານເສດຖະກິດ, ໄພເງິນເຟີ້, ສະພາບຂາດແຄນ ແລະ ລາຄານໍ້າມັນເຊື້ອໄຟຂຶ້ນສູງ, ແຕ່ພາຍໃຕ້ການຊີ້ນໍາຢ່າງໃກ້ຊິດ ຂອງຄະນະພັກ-ອົງການປົກຄອງແຂວງ, ພວກເຮົາ ສາມາດຮັກສາໄດ້ຄວາມສະຫງົບ ໂດຍພື້ນຖານທາງດ້ານການເມືອງ ແລະ ຄວາມ ເປັນລະບຽບຮຽບຮ້ອຍໃນສັງຄົມ ຢ່າງໝັ້ນຄົງ, ການຂະຫຍາຍຕົວ ຂອງເສດຖະກິດ ໂດຍສະເພາະ ແມ່ນຂະແໜງພະລັງງານບໍ່ແຮ່ ແລະ ກະສິກຳ ທີ່ເປັນທ່າແຮງ ຂອງແຂວງ, ການເກັບລາຍຮັບ ທີ່ພະຍາຍາມໃຫ້ເຂົ້າສູ່ລະບົບ ແລະ ບັນລຸຕາມແຜນການທີ່ວາງໄວ້.
ກອງປະຊຸມຄັ້ງນີ້, ຈະໄດ້ຮັບຟັງການລາຍງານຄືນການຈັດຕັ້ງປະຕິບັດເນື້ອໃນ ຂອງມະຕິກອງປະຊຸມຄັ້ງປະຖົມມະລຶກ ຂອງຄະນະກຳມະການປົກຄອງແຂວງ, ຮັບຟັງການເຜີຍແຜ່ໂຄງການດໍາເນີນງານ ຂອງອົງການປົກຄອງແຂວງເຊກອງ 5 ປີ ຄັ້ງທີ XI (2026-2030); ຂໍ້ຕົກລົງ ວ່າດ້ວຍການປະສານງານ ລະຫວ່າງ ປະທານຄະນະກຳມະການປົກຄອງແຂວງ ກັບຫ້ອງວ່າການແຂວງ, ຫ້ອງວ່າການສະພາປະຊາຊົນແຂວງ, ພະເເນກການ-ອົງການລັດທຽບເທົ່າຂັ້ນແຂວງ, ອົງການຈັດຕັ້ງມະຫາຊົນ ແລະ ອົງການປົກຄອງເມືອງ; ນິຕິກຳ ວ່າດ້ວຍທີ່ຕັ້ງ, ພາລະບົດບາດໜ້າທີ່, ຂອບເຂດສິດ ແລະ ແບບແຜນວິທີເຮັດວຽກ ຂອງຄະນະກຳມະການປົກຄອງແຂວງເຊກອງ ສະໄໝທີ XI ແລະ ຮັບຟັງການລາຍງານການຄຸ້ມຄອງ, ຕິດຕາມ ແລະ ກວດກາສະພາບການບັນຫາຂາດແຄນນໍ້າມັນເຊື້ອໄຟ ແລະ ວິທີການ, ມາດຕະການແກ້ໄຂໃນຕໍ່ໜ້າ, ລາຍງານການຈັດເກັບລາຍຮັບເກີນແຜນ ປີ 2025 ໃຊ້ຈ່າຍເຂົ້າໃນວຽກງານຂອງແຂວງ ປີ 2026; ການລາຍງານຄວາມຄືບໜ້າການຈັດຕັ້ງປະຕິບັດໂຄງການກໍ່ສ້າງເສັ້ນທາງຫຼວງແຫ່ງຊາດ 16B ແຕ່ 3ແຍກ ຫ້ອງການ ປກສ ເມືອງລະມາມ ຫາ ຊາຍແດນຫວຽດນາມ; ການສ້ອມແປງທາງຫຼວງແຫ່ງຊາດ ເລກທີ 16B ແລະ ທາງຫຼວງທ້ອງຖິ່ນ ທີ່ນໍາໃຊ້ງົບປະມານກອງທຶນທາງ ແລະ ໂຄງການກໍ່ສ້າງເສັ້ນທາງ 48 ກມ ເມືອງກະລຶມ ແລະ ລາຍງານສະພາບການສັນຍາເຊົ່າລົດເມຂຽວ ລະຫວ່າງ ບໍລິສັດ ກັບ ລັດ; ພ້ອມນີ້, ຍັງຈະໄດ້ຮັບຟັງການລາຍງານ ແລະ ປະກອບຄໍາຄິດຄໍາເຫັນ ຈາກພະແນກການ, ຂະແໜງການ ແລະ ເມືອງ ຕື່ມອີກ.
ໂອກາດນີ້, ທ່ານ ຂັນຕີ ສີລະວົງສາ ໄດ້ຮຽກຮ້ອງໃຫ້ບັນດາທ່ານຜູ້ເຂົ້າຮ່ວມ ຈົ່ງພ້ອມກັນສຸມໃສ່ຄົ້ນຄວ້າ ແລະ ປະກອບຄໍາເຫັນຢ່າງກົງໄປກົງມາ ໃນບາງບັນຫາ ສໍາຄັນ ໂດຍສະເພາະ ຂໍ້ຄົງຄ້າງ, ສິ່ງທ້າທາຍ, ຄວາມຫຍຸ້ງຍາກ ພ້ອມສະເໜີວິທີທາງແກ້ໄຂ ເພື່ອເປັນທາງອອກທີ່ດີໃນການຈັດຕັ້ງປະຕິບັດຕໍ່ການພັດທະນາ, ການແກ້ໄຂບັນຫາຊີວິດການເປັນຢູ່ ຂອງປະຊາຊົນ ແລະ ການບໍລິຫານລັດ; ຈາກນັ້ນ, ໃນການວາງທິດທາງໄຕມາດ II ກໍໃຫ້ກຳນົດມາດຕະການທີ່ຊັດເຈນ ເພື່ອຊຸກຍູ້, ຕິດຕາມ ແລະ ຈັດຕັ້ງປະຕິບັດວຽກງານໃຫ້ມີຜົນສໍາເລັດ ຢ່າງມີປະສິດທິຜົນ ຕາມຄາດໝາຍວາງໄວ້.
ຂ່າວ:ພຸດທະສອນ
ຄໍາເຫັນ