 |
ທ່ານ ສິນນະສອນ ແສງຈັນທະວົງ ຫົວໜ້າພະແນກ ຮສສ ແຂວງຄຳມ່ວນ ໄດ້ລາຍງານຜົນການຈັດຕັ້ງປະຕິບັດດ້ານວຽກງານແຮງງານຢູ່ແຂວງຄໍາມ່ວນ ໃນໄລຍະຜ່ານມາ ຊຶ່ງໄດ້ຊຸກຍູ້ບັນດາຫົວໜ່ວຍແຮງງານ ແລະ ສະຖານປະກອບການຕ່າງໆ ພາຍໃນແຂວງ, ຈັດສົ່ງແຮງງານທີ່ຕ້ອງການມີວຽກເຮັດງານທໍາເຂົ້າບັນຈຸເຮັດວຽກໄດ້ທັງໝົດ ຈໍານວນ 5,444 ຄົນ, ຂຶ້ນທະບຽນຜູ້ຕ້ອງການຊອກຫາວຽກເຮັດງານທຳ ທັງພາຍໃນ ແລະ ຕ່າງປະເທດ 560 ຄົນ. ໃນນີ້, ສະໝັກງານພາຍໃນ 275 ຄົນ ແລະ ສະໝັກໄປຕ່າງປະເທດ 285 ຄົນ, ພ້ອມດຽວກັນ ຍັງໄດ້ຜ່ານບົດບັນທຶກກອງປະຊຸມຮ່ວມກັບຄູ່ຮ່ວມງານ ແລະ ພາກສ່ວນກ່ຽວຂ້ອງພາຍໃນແຂວງ ໃນການປຶກສາຫາລືສົ່ງເສີມວຽກງານບໍລິການຈັດຫາງານພາຍໃນ ແລະ ການແກ້ໄຂບັນຫາການຂາດແຄນແຮງງານໃນໄລຍະປີຜ່ານມາ. ຈາກນັ້ນ, ກອງປະຊຸມກໍໄດ້ປຶກສາຫາລືກ່ຽວກັບວຽກງານຝຶກສີມືແຮງງານ, ການບໍລິການຈັດຫາງານ, ການແກ້ໄຂບັນຫາການຂາດແຄນແຮງງານພາຍໃນແຂວງ ແລະ ການຮ່ວມມືໃນຕໍ່ໜ້າ ລະຫວ່າງພາກລັດ ແລະ ເອກະຊົນ, ການເຂົ້າເຖິງການບໍລິການຈັດຫາງານຂອງຫົວໜ່ວຍແຮງງານພາຍໃນແຂວງ, ການຝຶກສີມືແຮງງານ ເພື່ອຕອບສະໜອງກັບຄວາມຕ້ອງການຂອງຕະຫຼາດແຮງງານ, ການປະກາດຕໍາແໜ່ງງານວ່າງ, ການຮ່ວມຈັດງານຕະຫຼາດນັດແຮງງານ, ການຮ່ວມມືໄລຍະສັ້ນ ແລະ ໄລຍະຍາວ ລະຫວ່າງພະແນກ ຮສສ ກັບ ພະແນກການກ່ຽວຂ້ອງ ແລະ ຫົວໜ່ວຍແຮງງານ. ທັງນີ້, ກໍເພື່ອເຮັດໃຫ້ວຽກງານການຝຶກສີມືແຮງງານ ແລະ ການແກ້ໄຂການຂາດແຄນແຮງງານຢູ່ພາຍໃນແຂວງຄໍາມ່ວນ ໄດ້ຮັບການປັບປຸງ ແລະ ພັດທະນາດີຂຶ້ນໃນຕໍ່ໜ້າ.
(ຂ່າວ-ພາບ: ກອງຄໍາ)
ຄໍາເຫັນ