 |
ປະຈຸບັນ, ມີນ້ຳມັນຄ້າງສາງຈຳນວນທັງໝົດ 972,703 ລິດ. ໃນນີ້, ນ້ໍາມັນແອັດຊັງ 139,758 ລິດ, ກາຊວນ 832,945 ລິດ ແລະ ໃນທົ່ວແຂວງມີປໍ້ານໍ້າມັນທີ່ເປີດໃຫ້ບໍລິການຈໍານວນທັງໝົດ 120 ປໍ້າ. ນອກນີ້, ແຂວງຄໍາມ່ວນຍັງມີບັນດາບໍລິສັດໃຫຍ່ທີ່ຕັ້ງຢູ່ພາຍໃນແຂວງ, ໃນກໍລະນີການນຳເຂົ້າຂອງບໍລິສັດ ຜ່ານດ່ານສາກົນຂົວມິດຕະພາບ 3 ບໍ່ສາມາດນໍາເຂົ້າໄດ້ ພະແນກອຸດສາຫະກໍາ ແລະ ການຄ້າແຂວງ ໄດ້ມີການປະສານງານກັບບໍລິສັດ ທີ່ມີແຜນການນຳເຂົ້ານໍ້າມັນເຊື້ອໄຟ ຜ່ານດ່ານສາກົນນາເພົ້າ-ຈາຫຼໍ ເພື່ອມາຕອບສະໜອງພາຍໃນແຂວງຄຳມ່ວນ. ດັ່ງນັ້ນ, ຂໍໃຫ້ພໍ່ແມ່ປະຊາຊົນ ຈົ່ງໝັ້ນໃຈວ່າແຂວງຄໍາມ່ວນ ຈະມີນໍ້າມັນພຽງພໍໃນການນຳໃຊ້ຢູ່ພາຍໃນ. ພ້ອມດຽວກັນ ຂະແໜງການຄ້າພາຍໃນ, ພະແນກອຸດສາກະກຳ ແລະ ການຄ້າແຂວງ ໄດ້ມີການເຄື່ອນໄຫວ ຕິດຕາມ, ກວດກາ ເປັນປະຈຳ ໄດ້ນຳເອົາແຈ້ງການຂອງຫ້ອງການກະຊວງ ອຄ ສະບັບເລກທີ 0583/ຫກ, ລົງວັນທີ 02 ມີນາ 2026, ຜັນຂະຫຍາຍ ພ້ອມທັງເຮັດໜັງສືສະເໜີ ເຖິງບັນດາສາຂາ ແລະ ສາງຂອງບໍລິສັດຈຳໜ່າຍພາຍໃນແຂວງ ສະບັບເລກທີ 301/ພອຄ, ລົງວັນທີ 03 ມີນາ 2026, ກ່ຽວກັບການສະໜອງຂໍ້ມູນ ແຜນການນຳເຂົ້າການສະໜອງນໍ້າມັນເຊື້ອໄຟ ໃຫ້ປໍ້າບໍລິສັດລົງທຶນ, ປໍ້າຕົວແທນຈຳໝ່າຍ ແລະ ນໍ້າມັນຄ້າງສາງ ພ້ອມທັງໃຫ້ ສາຂາ ແລະ ສາງຂອງບໍລິສັດ ສະຫຼຸບລາຍງານໃຫ້ພະແນກອຸດສາຫະກຳ ແລະ ການຄ້າແຂວງ ກໍ່ຄືຂະແໜງການຄ້າພາຍໃນ ກ່ອນເວລາ 16:00 ໂມງຂອງທຸກໆວັນ ເພື່ອລາຍງານໃຫ້ກົມການຄ້າພາຍໃນ ກະຊວງ ອຄ. ພ້ອມທັງ ຕິດຕາມ, ກວດກາ ປໍ້ານໍ້າມັນ ຢ່າງຕໍ່ເນື່ອງ ເພື່ອປ້ອງກັນການລັກລອບ ປິດປໍ້າ ທັງທີ່ມີນໍ້າມັນ ຫຼື ການປັບກົງເຕີ ແລະ ຂາຍເກີນລາຄາທີ່ກຳນົດ. ຫາກກວດພົບເຫັນການລະເມີດ ເຊັ່ນ: ການກັກຕຸນນໍ້າມັນເຊື້ອໄຟ ເພື່ອເກັງກຳໄລ ຫຼື ປັ່ນປ່ວນຕະຫຼາດ, ປິດປໍ້າຊົ່ວຄາວ ຫຼື ຖາວອນ ໂດຍບໍ່ມີເຫດຜົນ, ການສວຍໂອກາດຂຶ້ນລາຄາເອງ ແລະ ພຶດຕິກຳອື່ນໆ ທີ່ລະເມີດຂໍ້ຫ້າມ ຕາມດຳລັດ ວ່າດ້ວຍທຸລະກິດນໍ້າມັນເຊື້ອໄຟ ສະ ບັບເລກທີ 559/ລບ ແມ່ນປະຕິບັດຕາມລະບຽບກົດໝາຍຢ່າງເຂັ້ມງວດ ແລະ ເດັດຂາດ.
 |
ໃນນາມຂະແໜງການຄ້າພາຍໃນ ກໍຄືພະແນກອຸດສາຫະກຳ ແລະ ການຄ້າແຂວງ ຂໍຝາກເຖິງພໍ່ແມ່ປະຊາຊົນ ຢ່າແຕກຕື່ນຈົນເກີນໄປ ແລະ ບໍ່ຄວນແຫ່ກັນໄປຊື້ນໍ້າມັນເຊື້ອໄຟມາກັກຕຸນໄວ້ຢູ່ເຮືອນ ເພາະນອກຈາກຈະເຮັດໃຫ້ເກີດຄວາມວຸ້ນວາຍແລ້ວ ຍັງສ່ຽງຕໍ່ການເກີດອັກຄີໄຟນໍາອີກ, ຂໍໃຫ້ປະຊາຊົນຈົ່ງຊົມໃຊ້ນໍ້າມັນເຊື້ອໄຟຢ່າງປະຢັດ ແລະ ມັດທະຍັດ, ໄປ-ມາເທົ່າທີ່ຈຳເປັນ ເພື່ອຊ່ວຍຫຼຸດຜ່ອນການຮົ່ວໄຫຼຂອງເງິນຕາຕ່າງປະເທດ ແລະ ມີສະຕິໃນການຕິດຕາມຂໍ້ມູນຂ່າວສານ, ຫາກພົບເຫັນປໍ້າໃດທີ່ບໍ່ໃຫ້ບໍລິການ ຫຼື ຂາຍເກີນລາຄາ, ສາມາດໂທແຈ້ງເບີສາຍດ່ວນ 1510 ຫຼື ແຈ້ງໂດຍກົງຕໍ່ເຈົ້າໜ້າທີ່ການຄ້າແຂວງຄໍາມ່ວນ ຕາມເບີໂທ 020 5565 1228 ແລະ 020 2218 9399 ເພື່ອໃຫ້ເຈົ້າໜ້າທີ່ການຄ້າ ລົງໄປຕິດຕາມ, ກວດກາ ແລະ ແກ້ໄຂໃຫ້ທັນສະພາບການ.
(ຂ່າວ-ພາບ: ກອງຄໍາ)
ຄໍາເຫັນ