 |
ທ່ານ ສັກດາ ແກ້ວມະນີໄຊ ປະທານຄະນະກຳມະການປົກຄອງເມືອງທ່າແຂກ ໄດ້ຂຶ້ນລາຍງານການກະກຽມສ້າງຕັ້ງຕາແສງ ພ້ອມທັງສະເໜີສະພາບລວມຂອງເມືອງທ່າແຂກ ທີ່ເປັນເມືອງເທສະບານຂອງແຂວງຄໍາມ່ວນ ມີທ່າແຮງດ້ານເສດຖະກິດ, ການຄ້າ, ການທ່ອງທ່ຽວ ແລະ ການຄົມມະນາຄົມ ໂດຍມີເສັ້ນທາງເລກ 13 ໃຕ້ ແລະ ເສັ້ນທາງເລກ 12 ເປັນແລວເສດຖະກິດສໍາຄັນເຊື່ອມຕໍ່ສູ່ສາກົນ.
ການສ້າງຕັ້ງ 5 ຕາແສງ ໃນຄັ້ງນີ້, ເປັນການປະຕິບັດຕາມຄໍາແນະນໍາຂອງຄະນະຈັດຕັ້ງສູນກາງພັກ ແລະ ນິຕິກໍາທີ່ກ່ຽວຂ້ອງ ໂດຍໄດ້ຮັບການຮັບຮອງຈັດຕັ້ງເປັນ 5 ຕາແສງ ປະກອບມີ: ຕາແສງສີໂຄດ, ຕາແສງດົງໃຕ້, ຕາແສງນາເສ, ຕາແສງນາມ່ວງ ແລະ ຕາແສງນາໂດນ. ແຕ່ລະຕາແສງ ຈະມີຄະນະບໍລິຫານ ແລະ ພະນັກງານປະຈໍາ 13 ທ່ານ ເພື່ອຮັບໃຊ້ວຽກງານການປົກຄອງ, ບໍລິຫານ ແລະ ປະສານງານລະຫວ່າງເມືອງກັບບ້ານໃຫ້ມີຄວາມໃກ້ຊິດ ແລະ ວ່ອງໄວຂຶ້ນ.
ສໍາລັບຕາແສງສີໂຄດ ເປັນເຂດເທສະບານ, ມີພົນລະເມືອງ ທັງໝົດ 54,843 ຄົນ ຍິງ 27,539 ຄົນ ແລະ ປະກອບມີ 35 ບ້ານຄື: ບ້ານເລົ່າໂພໄຊ, ຈອມແຈ້ງ, ເລົ່າໂພຄໍາ, ໜອງໝ້ຽງ, ປາກດົງ, ປາກຊີມັງ, ດອນເຄື່ອນຊ້າງ, ສົມສະນຸກ, ໜອງບົວຄໍາ, ທ່າແຂກໃຕ້, ມ່ວງສຸມ, ນາບວບ, ດອນມ່ວງ, ຈອມທອງ, ໂພນສະອາດ, ໂພນ ສະໜາມ, ວຽງວິໄລ, ສີວິໄລ, ໂພນພິມ, ສັນຕິສຸກ, ສຸກສະຫວັນ, ນາບົງ, ດົງມ່ວງໄຂ່, ຕານ, ເລົ່າງົວ, ທ່າແຂກກາງ, ນາໂບ, ຈອມແກ້ວ, ຈອມເພັດ, ນາເມືອງ, ສົມສະອາດ, ທ່າແຂກເໜືອ, ຫ້ວຍນາງລື້, ນາຫຍ້າຫວາຍ ແລະ ບ້ານ ໂພສີທ່າ. ສ່ວນຕາແສງນາເສ ປະກອບ ມີ 11 ບ້ານຄື: ບ້ານຜາແຫຼມ, ດ່ອຍ, ນາໂພນດູ, ນາເສ, ນາຂ້າງຊ້າງ, ທ່າແຄ, ຊຽງແຫວນ, ຖໍ້າ, ກວນຜາວັງ, ພີນ ແລະ ບ້ານທອກນາຍໍ. ມີພົນລະເມືອງທັງຫມົດ 7,395 ຄົນ ຍິງ 3,691 ຄົນ, ເປັນເຂດທີ່ມີພູມສັນຖານທໍາມະຊາດໂດດເດັ່ນ ມີແຫຼ່ງທ່ອງທ່ຽວຊື່ດັງຫຼາຍແຫ່ງ ເຊັ່ນ: ຖໍ້ານາງແອ່ນ, ຖໍ້າຊ້າງ ແລະ ທ່າຝຣັ່ງ. ຊຶ່ງການສ້າງຕັ້ງຕາແສງໃນຄັ້ງນີ້, ຖືເປັນບາດກ້າວສໍາຄັນ ໃນການເສີມສ້າງການບໍລິຫານລັດໃຫ້ມີຄວາມເຂັ້ມແຂງ, ທັນສະໄໝ ແລະ ໃກ້ຊິດປະຊາຊົນຫຼາຍຂຶ້ນ ພ້ອມທັງຊ່ວຍໃຫ້ການແກ້ໄຂບັນຫາສັງຄົມ, ການຄຸ້ມຄອງທີ່ດິນ, ການປ້ອງກັນຢາເສບຕິດ ແລະ ການຮັກສາຄວາມສະຫງົບ ຢູ່ຂັ້ນຮາກຖານໄດ້ດີຂຶ້ນ.
(ຂ່າວ: ມະນີວັນ)
ຄໍາເຫັນ