ຄໍາມ່ວນ ປາຖະກະຖາ 2 ວັນປະຫວັດສາດ

ໃນພິທີ, ທ່ານ ນວນຕາ ແກ້ວນະວົງ ຫົວໜ້າຄະນະໂຄສະນາອົບຮົມແຂວງ ໄດ້ເປັນກຽດ ຂຶ້ນປາຖະກະຖາ 2 ວັນສໍາຄັນທາງປະຫວັດສາດ ໂດຍສະເພາະແມ່ນ ຫວນຄືນໃຫ້ເຫັນວິລະກຳການໂຕນຄຸກຢ່າງມະຫັດສະຈັນ ຂອງບັນດາຜູ້ນຳພັກ ແລະ ແນວລາວຮັກຊາດ ອອກຈາກຄຸກໂພນເຄັງ ໄປສູ່ເຂດທີ່ໝັ້ນປະຕິວັດຢ່າງປອດໄພ ເຊິ່ງເຫດການດັ່ງກ່າວ ສະແດງໃຫ້ເຫັນເຖິງຄວາມກ້າຫານ, ຄວາມສາມັກຄີ, ຄວາມຈົງຮັກພັກດີ ແລະ ນໍ້າໃຈຮັກຊາດອັນແຮງກ້າ ຂອງບັນດາຜູ້ນຳ ແລະ ກຳລັງປະຕິວັດລາວ, ທັງສະແດງໃຫ້ເຫັນເຖິງການນໍາພາອັນສະຫຼາດສ່ອງໃສ ຂອງປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຂອງປວງຊົນລາວທັງຊາດ, ເຊິ່ງເປັນບົດຮຽນ ສໍາຄັນອັນລໍ້າຄ່າ ທາງປະຫວັດສາດ ໃຫ້ແກ່ຄົນຮຸ່ນຫຼັງ ໃນການສືບທອດແນວຄິດປະຕິວັດ, ນ້ຳໃຈຮັກຊາດ ແລະ ຄວາມເສຍສະຫຼະ ເພື່ອປະເທດຊາດ. ພ້ອມກັນນັ້ນ, ກໍໄດ້ຍົກໃຫ້ເຫັນເຖິງມູນເຊື້ອອັນພິລະອາດຫານ ຂອງກອງພັນທີ 2 ວິລະຊົນ ໃນການຜ່າວົງປິດລ້ອມຂອງສັດຕູ ຢູ່ທົ່ງໄຫຫີນ ແຂວງຊຽງຂວາງ ເປັນໄຊຊະນະອັນຍິ່ງໃຫຍ່ ຂອງກອງທັບ ແລະ ຂະບວນການປະຕິວັດລາວ ພາຍໃຕ້ການນໍາພາອັນຖືກຕ້ອງຂອງພັກ.

ໂອກາດດຽວກັນນີ້ ຜູ້ເຂົ້າຮ່ວມຍັງໄດ້ຮັບຟັງການເຜີຍແຜ່ ແລະ ເຊື່ອມຊຶມມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ແລະ ມະຕິກອງປະຊຸມໃຫຍ່ ຜູ້ແທນອົງຄະນະພັກແຂວງຄໍາມ່ວນ ສະໄໝທີ XI ໂດຍການເປັນປະທານເຜີຍແຜ່ຂອງ ທ່ານ ສົມໃຈ ພານີຈັນ ຮອງເລຂາຄະນະບໍລິຫານງານພັກແຂວງ, ຜູ້ຊີ້ນໍາວຽກງານການເມືອງແນວຄິດ ແລະ ວຽກພັກ-ພະນັກງານ. ທັງນີ້ກໍເພື່ອເພີ່ມທະວີຄວາມຮັບຮູ້ເຂົ້າໃຈ ຢ່າງເລິກເຊິ່ງ, ໃຫ້ແກ່ພະນັກງານ, ສະມາຊິກພັກ, ກຳລັງປ້ອງກັນຊາດ-ປ້ອງກັນຄວາມສະຫງົບ ໃນທົ່ວແຂວງ ກຳແໜ້ນເນື້ອໃນມະຕິດັ່ງກ່າວ ແລະ ນໍາໄປຜັນຂະຫຍາຍໃຫ້ເປັນແຜນງານ, ໂຄງການ ເພື່ອນໍາພາຈັດຕັ້ງປະຕິບັດໃຫ້ເປັນຮູບປະທໍາຢ່າງມີປະສິດທິຜົນ.

ຂ່າວ : ມະນີວັນ