ຄໍາມ່ວນ ປ່ອຍປາ ລົງສູ່ວັງສະຫງວນແມ່ນໍ້າຂອງ ບໍລິເວນ ໜ້າພຣະທາດສີໂຄດຕະບອງ

ທ່ານ ແກ້ວບຸນຂວັນ ໄຊຍະວົງສາ ຫົວໜ້າພະແນກກະສິກໍາ ແລະ ສິ່ງແວດລ້ອມແຂວງຄໍາມ່ວນໄດ້ກ່າວວ່າ: ປັດຈຸບັນ ຈໍານວນປາ ແລະ ສັດນໍ້າແມ່ນກຳລັງຖືກຄຸກຄາມ ຈາກທຳມະຊາດ ແລະ ຄົນ, ເຊິ່ງເຮັດໃຫ້ສັດນ້ຳ ນັບມື້ນັບຫຼຸດໜ້ອຍຖອຍລົງ, ຈາກເຫດຜົນດັ່ງກ່າວ ພັກ-ລັດ ຈຶ່ງໄດ້ສ້າງກົດໝາຍ, ລະບຽບ ແລະ ມາດຕະການຕ່າງໆ ໂດຍສຸມໃສ່ໃນການປົກປັກຮັກສາສັດນ້ຳ ແລະ ສັດປ່າໃຫ້ຄົງຢູ່ກັບທຳມະຊາດແບບຍືນຍົງ, ຄຽງຄູ່ກັນນັ້ນກໍໄດ້ສົມທົບກັບທຸກພາກສ່ວນທັງພາຍໃນ ແລະ ຕ່າງປະເທດຂົນຂວາຍຫຼາຍໆດ້ານ ເພື່ອຊ່ວຍໃນການປົກປັກຮັກສາ ແລະ ພັດທະນາສັດນ້ຳໃຫ້ນັບມື້ນັບເພີ່ມຫຼາຍຂຶ້ນ, ເຊິ່ງໃນໄລຍະຜ່ານມາກໍໄດ້ມີການປະກາດ, ສ້າງຕັ້ງ ຫຼື ກຳນົດເຂດອະນຸລັກ (ສ້າງວັງສະຫງວນ) ໄດ້ 113 ແຫ່ງ ເພື່ອເປັນບ່ອນແຜ່ພັນ, ນອກນັ້ນກໍໄດ້ສ້າງຂະບວນການປ່ອຍປາລົງໜອງ, ລົງອ່າງ, ແມ່ນ້ຳຕາມທຳມະຊາດ.

ສຳລັບປີນີ້ ທາງພະແນກກະສິກຳ ແລະ ສິ່ງແວດລ້ອມແຂວງ ໄດ້ອອກແຈ້ງການກ່ຽວກັບການສ້າງຂະບວນການເຖິງ ຫ້ອງການກະສິກຳ ແລະ ສິ່ງແວດລ້ອມເມືອງ, ລົງສູ່ທ້ອງຖິ່ນຂັ້ນບ້ານຄື: ຫ້າມນຳໃຊ້ທາດເບື່ອ, ລະເບີດ, ອາວຸດ, ເຄື່ອງໄຟຟ້າ, ຄື້ນ, ເຄື່ອງແສງ, ສຽງເພື່ອຫາ ຫຼື ຈັບສັດນ້ຳ ແບບດັບສູນ; ຫ້າມນຳໃຊ້ເຄື່ອງມືຫາທີ່ມີຄວາມສ່ຽງໃຫ້ສັດນ້ຳສູນພັນ ເຊັນ: ອວນ, ລີ່, ມອງຕາຖີ່, ໂຕ່ງ, ລອບຂະໜາດໃຫຍ່ ແລະ ອື່ນໆ; ຫ້າມຫາສັດນ້ຳຈາກແຫຼ່ງທຳມະຊາດດ້ວຍການ ຕັນຫ້ວຍ, ໂສກ, ບຸ່ງ, ຄອງນ້ຳ, ຂຸດໜອງ ຫຼື ດູດໜອງທຳມະຊາດ ທີ່ມີນນ້ຳຕະຫຼອດປີ; ຫ້າມ ຮັບເອົາ, ຊື້ຂາຍ, ຄອບຄອງ ຫຼື ຂົນສົ່ງ ສັດນ້ຳບັນຊີ 1 ໂດຍບໍ່່ໄດ້ຮັບອະນຸຍາດ; ຫ້າມສ້າງສິ່ງກີດຂວາງທາງເດີນ ຂອງສັດນ້ຳໂດຍບໍ່່ໄດ້ຮັບອະນຸຍາດ; ຫ້າມ ລ້ຽງ ຫຼື ປ່ອຍສັດນ້ຳ ຕ່າງຖິ່ນທີ່ມີຄວາມສ່ຽງທຳລາຍສັດນ້ຳພື້ນເມືອງ ແລະ ລະບົບນິເວດ; ຫ້າມ ປູກພືດນ້ຳທີ່ຈະເປັນການທຳລາຍ ລະບົບນິເວດ ຫຼື ແຫຼ່ງລ້ຽງສັດ ໂດຍບໍ່ໄດ້ຮັບອະນຸຍາດ; ຫ້າມ ບຸກລຸກ ວັງສະຫງວນ ຫຼື ເຂດອະນຸລັກພັນສັດນ້ຳ, ເຂດປາອໍ, ແຫຼ່ງສັດນ້ຳວາງໄຂ່, ເຂດຈຳເລີນ ເຕີບໂຕຂອງລູກສັດນ້ຳໄວອ່ອນ; ຫ້າມ ຫາສັດນ້ຳ ໃນລະດູວາງໄຂ່ ; ຫ້າມ ບໍລິໂພກ, ຊື້-ຂາຍ ສັດນ້ຳ ທີ່ຕາຍບໍ່ຮູ້ສາເຫດ, ເປັນພະຍາດ ຫຼື ປົນເປື້ອນສານເຄມີຕົກຄ້າງ ແລະ ຫ້າມ ມີພຶດຕິກຳອື່ນໆ ທີ່ເປັນການລະເມີດກົດໝາຍ.

ສໍາລັບປາທີ່ນໍາມາປ່ອຍໃນພິທີປ່ອຍປາ ແລະ ອະນຸລັກສັດນໍ້າແຫ່ງຊາດຢູ່ທີ່ທ່ານໍ້າໜ້າພຣະທາດສີໂຄດຕະບອງ ( ແຄມຂອງ ) ບ້ານມ່ວງສຸມ ເມືອງທ່າແຂກ ລວມມີປາທັງ ໝົດຈໍານວນ 20,000 ກວ່າໂຕ, ມີ 2 ຊະນິດຄື : ປາປາກ ແລະ ປາມະນີການ.

ນອກຈາກນັ້ນທາງຫ້ອງ ການກະສິກໍາ ແລະ ປ່າໄມ້ເມືອງທ່າແຂກຍັງໄດ້ຜ່ານຂໍ້ຕົກລົງວ່າດ້ວຍການອະນຸມັດໃຫ້ບ້ານມ່ວງສຸມ ສ້າງວັງສະຫງວນຂຶ້ນເພື່ອຄຸ້ມຄອງ ແລະ ນໍາໃຊ້ຊັບພະຍາກອນສັດນໍ້າຂອງບ້ານ ເຊິ່ງປະທານຄະນະກໍາມະການປົກຄອງເມືອງທ່າແຂກ ຕົກລົງເຫັນດີອະນຸມັດໃຫ້ບ້ານມ່ວງສຸມ ສ້າງຕັ້ງວັງສະຫງວນຂຶ້ນ 01 ແຫ່ງ ຢູ່ສາຍນໍ້າຂອງ ເຂດຄຸ້ມຄອງ ແລະ ນໍາໃຊ້ຊັບພະຍາກອນສັດນໍ້າຂອງບ້ານ ໂດຍມີຊື່ວັງວ່າ : “ວັງສະຫງວນພຣະທາດສີໂຄດຕະບອງ” ມີທີ່ຕັ້ງທິດເໜືອຕິດກັບສາຍນໍ້າຂອງບ້ານມ່ວງສຸມ, ທິດໃຕຕິດກັບສາຍນໍ້າຂອງມ່ວງສຸມ, ທິດຕາເວັນອອກຕິດກັບຕະຝັ່ງພຣະທາດສີໂຄດຕະບອງ, ທິດຕາເວັນຕົກຕິດກັບນໍ້າຂອງ; ມີລວງກວ້າງຂອງວັງ 50 ແມັດ, ລວງຍາວ 200 ແມັດ, ບ່ອນເລິກສຸດ 09 ແມັດ (ໃນລະດູແລ້ງ).