 |
ໃນພິທີ ທ່ານ ນາງ ບັງອອນ ສຸກສາບັນ ຜູ້ອໍານວຍການສູນການສຶກສານອກໂຮງຮຽນແຂວງໄດ້ລາຍງານການກະກຽມ ແລະ ຄວາມພ້ອມໃນການຈັດຕັ້ງປະຕິບັດການສອບເສັງຈົບຊັ້ນມັດທະຍົມຕອນປາຍ ( ມ.7 ) ລະບົບບໍາລຸງເອກະພາບທົ່ວປະເທດ ປະຈໍາສົກຮຽນ 2025 – 2026 . ສູນການສຶກສານອກໂຮງຮຽນ ແຂວງຄໍາມ່ວນຕັ້ງຢູ່ບ້ານ ສົມສະນຸກ ເມືອງທ່າແຂກ ແຂວງຄໍາມ່ວນ ໄດ້ຈັດຕັ້ງປະຕິບັດການຮຽນ-ການສອນ ຄວບຄູ່ກັບການຝຶກອົບຮົມດ້ານວິຊາຊີບຂັ້ນພື້ນຖານ ຊຶ່ງຢູ່ພາຍໃຕ້ການຄຸ້ມຄອງຂອງພະແນກສຶກສາທິການ ແລະ ກິລາແຂວງ ຊຶ່ງໄດ້ເຄື່ອນໄຫວຕາມໜ້າທີ່ , ພາລະບົດບາດຢູ່ໃນ 3 ໜ່ວຍງານຄື : ໜ່ວຍງານບໍລິຫານ - ວັດ ແລະ ປະເມີນຜົນ, ໜ່ວຍງານບໍາລຸງຍົກລະດັບການສຶກສາ ແລະ
ໜ່ວຍງານວິຊາຊີບຂັ້ນພື້ນຖານ, ພະນັກງານພາຍໃນສູນມີທັງໝົດ 16 ຄົນ,ຍິງ 11 ຄົນ . ໃນນັ້ນ ມີລັດຖະກອນ 7 ຄົນ, ຍິງ 5 ຄົນ .
ກົມການສຶກສານອກໂຮງຮຽນໄດ້ເປີດການຮຽນ-ການສອນໃນວັນທີ 1 ເດືອນຕຸລາ ສົກຮຽນ 2025 – 2026 ທົ່ວປະເທດມີນັກຮຽນບໍາລຸງຕົ້ນປີທັງໝົດ 735 ຄົນ,ຍິງ 290 ຄົນ ; ນັກຮຽນບໍາລຸງທ້າຍປີທັງໝົດ 725 ຄົນ,ຍິງ 289 ຄົນ ; ແຂວງທີ່ໄດ້ຈັດການຮຽນ-ການສອນທັງໝົດມີ 12 ແຂວງ ແລະ 1 ນະຄອນຫຼວງ , ລວມມີທັງໝົດ 26 ສູນ. ໃນນັ້ນ ແຂວງທີ່ມີການຈັດການຮຽນ-ການສອນ 1 ສູນມີ 11 ແຂວງຄື : ບໍ່ແກ້ວ, ຫຼວງພະບາງ, ໄຊຍະບູລີ,ຊຽງຂວາງ, ວຽງຈັນ, ບໍລິຄໍາໄຊ, ຄໍາມ່ວນ, ສາລະວັນ ແລະ ຈໍາປາສັກ ; 2 ສູນຄື ແຂວງຫົວພັນ ; 4 ສູນຄືແຂວງຊຽງຂວາງ , 6 ສູນຄືແຂວງສະຫວັນນະເຂດ ແລະ ນະຄອນຫຼວງວຽງຈັນ .
 |
ສະເພາະແຂວງຄໍາມ່ວນວຽກງານຍົກລະດັບການສຶກສາຊັ້ນມັດທະຍົມຕອນປາຍ ສົກຮຽນ 2025 – 2026 ນີ້ແມ່ນໄດ້ເປີດການຮຽນ - ການສອນນັບແຕ່ວັນທີ 1 ຕຸລາ 2025 ເປັນຕົ້ນມາ , ນັກຮຽນທີ່ມາຍົກລະດັບການສຶກສາ ລະດັບຊັ້ນມັດທະຍົມປາຍແມ່ນມາຈາກພາກສ່ວນ ພຣະສົງສໍາມະເນນ, ພະນັກງານ , ກໍາລັງປ້ອງກັນຊາດ-ປ້ອງກັນຄວາມສະຫງົບ ແລະ ປະຊາຊົນບັນດາເຜົ່າທີ່ພາດໂອກາດຈາກການຮຽນສາຍສາມັນ , ໄດ້ຈັດການຮຽນ-ການສອນໃນພາກປົກກະຕິ ຜ່ານທາງລະບົບອອນລາຍ ( ຊ່ອງທາງ ອີດີແອັບ ) ແລະ ພາກວັນເສົາ - ອາທິດ ຮູບແບບເຊິ່ງໜ້າ ອີງຕາມເງື່ອນໄຂຂອງຜູ້ຮຽນ , ໄດ້ຮຽນ-ສອນທັງໝົດ 9 ວິຊາຄື : ພາສາລາວ-ວັນນະຄະດີ, ຄະນິດສາດ, ຟີຊິກສາດ, ເຄມີສາດ, ຊີວະສາດ,ພູມສາດ, ປະຫວັດສາດ, ສຶກສາພົນລະເມືອງ ແລະ ພາສາອັງກິດ . ມາເຖິງປະຈຸບັນແມ່ນໄດ້ປະຕິບັດຕາມຫຼັກສູດໂຄງການການຮຽນ-ການສອນໄດ້ຕາມຄາດໝາຍຂອງກະຊວງສຶກສາທິການ ແລະ ກິລາກໍານົດໄວ້ທຸກວິຊາ . ອີງຕາມການຂຶ້ນທະບຽນ ແລະ ສະຖິຕິຄວາມເປັນຈິງຂອງນັກຮຽນລະບົບບໍາລຸງຊັ້ນມັດທະຍົມຕອນປາຍຂອງສູນການສຶກສານອກໂຮງຮຽນແຂວງຄໍາມ່ວນມີທັງໝົດ 77 ຄົນ, ຍິງ 39 ຄົນ , ໃນນີ້ຈໍານວນນັກຮຽນ ( ມ.5 ) ມີ 16 ຄົນ,ຍິງ 10 ຄົນ ; ( ມ.6 ) ມີ 20 ຄົນ , ຍິງ 12 ຄົນ ໄດ້ສອບເສັງໄປແລ້ວ ແລະ ສອບໄດ້ 100 % . ສໍາລັບນັກຮຽນ ( ມ.7 ) ມີສິດສອບເສັງທັງໝົດ 41 ຄົນ, ຍິງ 17 ຄົນ ແລະ ກໍານົດຫ້ອງສອບເສັງຄື : ມີ 1 ສູນສອບເສັງ, 1 ຫ້ອງປະທານ , 1 ຫ້ອງກວດບົດ ແລະ 2 ຫ້ອງສອບເສັງ . ພ້ອມກັນນັ້ນຍັງໄດ້ຍົກໃຫ້ເຫັນເຖິງວຽກງານການກະກຽມ ແລະ ຄວາມພ້ອມຕ່າງໆເປັນຕົ້ນແມ່ນ : ການຈັດຕັ້ງປະຕິບັດ , ດ້ານຫຼັກສູດ ແລະ ການທວນຄືນໃຫ້ນັກຮຽນ , ດ້ານສະຖານທີ່ ແລະ ອຸປະກອນການສອບເສັງ ລວມໄປເຖິງຂໍ້ສະດວກ ແລະ ຂໍ້ຫຍຸ້ງຍາກຕ່າງໆ .
ໃນພິທີອັນມີຄວາມໝາຍສໍາຄັນທ່ານ ບຸນປອນ ທອງສຸວັນນະລາດ ແລະ ທ່ານ ນາງ ບຸນເພັງ ປະທໍາມະວົງ ກໍໄດ້ຜັດປ່ຽນກັນມີຄໍາເຫັນ . ຫຼັງຈາກນັ້ນປະທານ ແລະ ຄະນະຊີ້ນໍາສູນການສອບເສັງຕະຫຼອດເຖິງຄູ-ອາຈານ, ນັກຮຽນທັງໝົດກໍ່ໄດ້ຮ່ວມກັນຕັດຫົວບົດສອບເສັງທາງເປັນທາງການ , ສໍາລັບການສອບເສັງຈົບຊັ້ນມັດທະຍົມປອຍ ( ມ.7 ) ລະບົບບໍາລຸງ ປະຈໍາ ສົກຮຽນ 2025 – 2026 ແມ່ນຈະໃຊ້ເວລາ 02 ວັນຄືນັບແຕ່ວັນທີ 7 – 8 ກໍລະກົດ 2026 ລວມມີວິຊາສອບເສັງທັງໝົດ 4 ວິຊາຫຼັກຄື : ພາສາລາວ-ວັນນະຄະດີ, ຄະນິດສາດ , ຊີວະສາດ ແລະ ສຶກສາພົນລະເມືອງ .(ຂ່າວ:ແຂວງ ຄຳມ່ວນ)
ຄໍາເຫັນ