ຄໍາມ່ວນເປີດງານບຸນອອກພັນສາແລະແຂ່ງຂັນຊ່ວງເຮືອປະຈໍາປີ2023

ແຂວງຄຳມ່ວນໄດ້ຈັດພິທີເປີດງານບຸນອອກພັນສາປະວໍລະນາແລະຊ່ວງເຮືອປະຈໍາປີ2023ຂຶ້ນໃນວັນທີ27ຕຸລານີ້ ທີ່ຜາມໄຊແຄມຂອງເທດສະບານເມືອງທ່າແຂກໂດຍການເຂົ້າຮ່ວມຂອງມີທ່ານບຸນມີພິມມະສອນຮອງເລຂາພັກແຂວງປະທານສະພາປະຊາຊົນແຂວງ, ມີທ່ານແກ້ວອຸດອນບຸດສິງຂອນຮອງເຈົ້າແຂວງຄໍາມ່ວນປະທານຈັດງານບຸນອອກພັນສາແລະຊ່ວງເຮືອປະຈໍາປີ2023ພ້ອມດ້ວຍພາກ ສ່ວນກ່ຽວຂ້ອງເຂົ້າຮ່ວມ.
    ທ່ານແກ້ວລັນດອນຈັນທະປານີເຈົ້າເມືອງທ່າແຂກທັງເປັນຄະນະປະທານຈັດງານ ກ່າວວ່າ: ເພື່ອເຮັດໃຫ້ງານບຸນເຕັມໄປດ້ວຍບັນຍາກາດຟົດຟື້ນເບີກບານມ່ວນຊື່ນຮັບປະກັນໄດ້ຄວາມສະຫງົບ, ຄວາມເປັນລະບຽບຮຽບຮ້ອຍ,ຮັກສາໄດ້ຮີດຄອງປະເພນີອັນດີງາມຂອງຊາດກໍຄືຂອງທ້ອງຖິ່ນເພື່ອຕອບສະໜອງກັບຈຸດປະສົງ, ເປົ້າໝາຍຂອງການທ່ອງທ່ຽວ3ຍອດຍິ່ງທີ່ແຂວງໄດ້ກໍານົດຂຶ້ນຄື: ຍອດຍິ່ງທາງສິລະປະ-ວັດທະນະທຳ-ຮີດຄອງປະເພນີອັນດີງາມ, ຍອດຍິ່ງທາງດ້ານທຳມະຊາດທີ່ສວຍສົດງົດງາມແລະຍອດຍິ່ງທາງດ້ານປະຫວັດສາດອັນເປັນມູນເຊື້ອພິລະອາດຫານພາຍໃນງານໄດ້ຈັດຫຼາຍກິດຈະກຳເຊັ່ນ: ການແຂ່ງຂັນຊ່ວງເຮືອ, ໄຫຼເຮືອໄຟ, ການປ່ອຍກະໂທງສາຍ, ການສະແດງສິລະປະ-ວັນນະຄະດີ, ລຳຜະຫຍາມະຫາໄຊທີ່ເປັນເອກະລັກຂອງແຂວງ, ການວາງສະແດງຈໍາໜ່າຍສິນຄ້າໂອດັອບແລະການແລກປ່ຽນຊື້-ຂາຍສິນຄ້າຂອງພໍ່ແມ່ປະຊາຊົນດ້ວຍກັນ.ສະເພາະກິດຈະກຳແຂ່ງຂັນຊ່ວງເຮືອໄດ້ມີເຮືອເຂົ້າຮ່ວມແຂ່ງຂັນທັງໝົດ32ລໍາ, ມີປະເພດ50-55ສີພາຍຈຳນວນ 8ລໍາ, ເຮືອ30-35ສີພາຍຈຳນວນ 10ລໍາແລະຊ່ວງເຮືອມິດຕະພາບ14ລໍາຊຶ່ງມາຈາກຈັງຫວັດນະຄອນພະນົມຣາຊະອານາຈັກໄທຈຳນວນ 4ລໍາ, ນອກນີ້ຍັງມີກິດຈະກຳການໄຫຼເຮືອໄຟ ແລະ ອື່ນໆຕື່ມອີກ. ງານບຸນດັ່ງກ່າວຈະໄດ້ດໍາເນີນເປັນເວລາ3 ວັນນັບແຕ່ວັນທີ 27-29 ຕຸລານີ້.
    ດັ່ງນັ້ນ, ຂໍເຊີນຊວນທຸກພາກສ່ວນຕະຫຼອດເຖິງພໍ່ແມ່ປະຊາຊົນບັນດາເຜົ່າເຂົ້າມາທ່ຽວຊົມແລະໃຫ້ການປະກອບສ່ວນໃນດ້ານຕ່າງໆເພື່ອເຮັດໃຫ້ງານດັ່ງກ່າວໄດ້ຮັບການຈັດຕັ້ງປະຕິບັດສຳເລັດໄປດ້ວຍດີ, ຮຽກຮ້ອງມາຍັງທຸກພາກສ່ວນຈົ່ງປະຕິບັດຕາມຂໍ້ກຳນົດ, ກົດລະບຽບຕ່າງໆທີ່ຄະນະກຳມະການຈັດງານບຸນວາງອອກຢ່າງເຂັ້ມງວດເພື່ອຄວມສະຫງົບ, ຄວາມປອດໄພແລະເປັນຄວາມລະບຽບຮຽບຮ້ອຍຕະຫຼອດການຈັດງານ.
ຂ່າວ-ພາບ: ກອງຄຳ