1. ຂໍໃຫ້ທ່ານ ຍົກໃຫ້ເຫັນຜົນສຳເລັດ ແລະ ການເຕີບໃຫຍ່ຂະຫຍາຍຕົວ ຂອງຂະແໜງການຕ່າງປະເທດ ໃນສາຍພັກ ຕະຫຼອດໄລຍະຜ່ານມາ.
· ຂະແໜງການຕ່າງປະເທດໃນສາຍພັກ ເປັນຂະແໜງການທີ່ມີບົດບາດສຳຄັນ ໃນດ້ານວຽກງານການທູດ ກໍຄືການຕ່າງປະເທດ ຂອງພັກ, ຂອງຊາດລາວ ທັງໃນອະດີດຜ່ານມາ ກໍຄືປັດຈຸບັນ.
· ບົນເສັ້ນທາງແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງພັກປະຊາຊົນ ປະຕິວັດລາວ, ວຽກງານຕ່າງປະເທດຂອງພັກ ໄດ້ຜ່ານວິວັດທະນາການທາງດ້ານປະຫວັດສາດອັນສໍາຄັນທີ່ຕິດພັນກັບການ ນໍາພາຂອງພັກ ປະຊາຊົນ ປະຕິວັດລາວ ໃນຂະບວນການຕໍ່ສູ້ກູ້ຊາດຕັ້ງແຕ່ເລີ່ມຕົ້ນ ຈົນເຖິງການສະ ຖາປະນາ ສປປ ລາວ ໃນປີ 1975.
· ໃນຍຸກໃໝ່, ການເຄື່ອນໄຫວວຽກງານການຕ່າງປະເທດຂອງພັກ ແມ່ນການຈັດຕັ້ງປະຕິບັດແນວທາງ ແລະ ຍຸດທະສາດການຕ່າງປະເທດຂອງພັກຕິດແໜ້ນກັບຍຸດທະສາດລວມຂອງພັກ-ລັດເຮົາຄື: ປົກປັກຮັກສາ ແລະ ພັດທະນາປະເທດຊາດຍາດແຍ່ງເອົາຄວາມເຫັນໃຈ, ສະໜັບສະໜູນ, ຊ່ວຍເຫຼືອທາງດ້ານທຶນ ແລະ ວັດຖຸເຕັກນິກຈາກສາກົນ ແລະ ຍົກສູງບົດບາດຂອງພັກ ແລະ ລັດເຮົາ ໃຫ້ສູງເດັ່ນຂຶ້ນ ໃນເວທີພາກພື້ນ ແລະ ສາກົນ.
· ດ້ານກົງຈັກ, ກ່ອນການສະຖາປະນາ ສປປ ລາວ, ອົງການທີ່ເຮັດວຽກງານຕ່າງປະເທດ ທັງສາຍພັກ ແລະ ສາຍລັດ ໄດ້ລວມສູນຢູ່ບ່ອນດຽວຄື: ຫ້ອງການຕໍ່ສູ້ການເມືອງ ແລະ ຕ່າງປະເທດຂອງແນວລາວຮັກຊາດ ທີ່ມີສໍານັກງານຕັ້ງຢູ່ ເມືອງວຽງໄຊ ແຂວງຫົວພັນ.
- ພາຍຫຼັງການສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975, ວຽກງານພົວພັນຕ່າງປະເທດທັງສາຍພັກ, ລັດ ແລະ ອົງການຈັດຕັ້ງມະຫາຊົນ ແມ່ນຂຶ້ນກັບກະຊວງການຕ່າງປະເທດຮັບຜິດຊອບ.
- ເນື່ອງຈາກການພົວພັນຕ່າງປະເທດຂອງພັກ ແລະ ລັດເຮົານັບມື້ນັບເປີດກວ້າງ, ໃນປີ 1983 ຄະນະພົວພັນຕ່າງປະເທດສູນກາງພັກ ຈຶ່ງໄດ້ຖືກສ້າງຕັ້ງຂຶ້ນຢ່າງເປັນທາງການ, ແຕ່ຂຶ້ນກັບອົງຄະນະພັກ ກະຊວງການຕ່າງປະເທດ, ຈົນເຖິງປີ 2016 ຈຶ່ງໄດ້ແຍກເປັນອົງຄະນະພັກຂອງຄະນະພົວພັນຕ່າງປະເທດສູນກາງພັກຕ່າງຫາກ ຈົນເຖິງປັດຈຸບັນ.
· ດ້ານແນວທາງນະໂຍບາຍ, ສູນກາງພັກໄດ້ກຳນົດແນວທາງນະໂຍບາຍອັນຖືກຕ້ອງ ແລະ ສອດຄ່ອງກັບສະພາບການຕົວຈິງຂອງພາຍໃນ ແລະ ສາກົນ ໃນແຕ່ລະໄລຍະ.ໂດຍເລີ່ມຈາກແນວທາງ ຜູກມິດກັບທຸກປະເທດ, ບໍ່ຮ່ວມກຸ່ມ ແລະ ສັງຄົມນິຍົມ ໃນເມື່ອກ່ອນຈົນມາຮອດແນວທາງປ່ຽນແປງໃໝ່ ໂດຍເປີດກວ້າງການຮ່ວມມືກັບຕ່າງປະເທດ ທີ່ກອງປະຊຸມໃຫຍ່ ຄັ້ງທີ IV ຂອງພັກ ໃນປີ 1986.
· ຜົນການເຄື່ອນໄຫວຕ່າງປະເທດຂອງພັກ, ມາຮອດປັດຈຸບັນ ພັກເຮົາ ໄດ້ມີການພົວພັນກັບ 145 ພັກການເມືອງ ໃນ 82 ປະເທດທົ່ວໂລກ:
- ໃນຂອບ 2 ຝ່າຍ, ພັກໄດ້ຖືເອົາພັກເພື່ອນມິດຍຸດທະສາດຮ່ວມອຸດົມການເປັນບູລິມະສິດໃນການພົວພັນຮ່ວມມື ໂດຍໄດ້ສືບຕໍ່ເສີມຂະຫຍາຍ ສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ກັບພັກກອມມູນິດຫວຽດນາມ, ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄູ່ຮ່ວມມືຍຸດທະສາດຮອບດ້ານ ໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກຳດຽວກັນ ກັບພັກກອມມູນິດຈີນ, ເສີມຂະຫຍາຍການພົວພັນກັບບັນດາພັກເພື່ອນມິດຍຸດທະສາດ ແລະ ພັກເພື່ອນມິດອື່ນໆ ຢ່າງກວ້າງຂວາງ.
- ໃນຂອບຫຼາຍຝ່າຍ, ພັກເຮົາ ໄດ້ມີການເຄື່ອນໄຫວຢ່າງຫ້າວຫັນ ເພື່ອເຊີດຊູຖານະບົດບາດຂອງພັກໃນເວທີ ພາກພື້ນ ແລະ ສາກົນ ເປັນຕົ້ນແມ່ນ ໄດ້ເຂົ້າຮ່ວມບັນດາກອງປະຊຸມພາກພື້ນ ແລະ ສາກົນຂອງບັນດາພັກການເມືອງເຊັ່ນ:
+ ກອງປະຊຸມສາກົນຂອງບັນດາພັກກອມມູນິດ ແລະ ກຳມະກອນສາກົນ (IMCWP),
+ ກອງປະຊຸມສາກົນຂອງບັນດາພັກການເມືອງອາຊີ (ICAPP),
+ ກອງປະຊຸມພັກກອມມູນິດຈີນກັບບັນດາພັກການເມືອງສາກົນ,
+ ພັກກອມມູນິດຈີນກັບພັກການເມືອງອາຊຽນ,
+ ກອງປະຊຸມໂຕະມົນພັກຣັດເຊຍເອກະພາບກັບພັກການເມືອງປະເທດອາຊຽນ,
+ ເວທີສຳມະນາສັງຄົມນິຍົມ (ລາວ, ຫວຽດນາມ, ຈີນ, ສປປ ເກົາຫຼີ, ກູບາ),
+ ກອງປະຊຸມບັນດາພັກການເມືອງ, ຄັງປັນຍາ ແລະ ອົງການຈັດຕັ້ງພົນລະເຮືອນກຸ່ມປະເທດອຸດສາຫະກຳທັນສະໄໝ,
+ ເວທີປຶກສາຫາລືຊາວປາວໂລ.
+ ກອງປະຊຸມສາກົນຂອງບັນດາພັກການເມືອງກຸ່ມ BRICs,
+ ກອງປະຊຸມເວທີປຶກສາຫາລືຂອງບັນດາຝ່າຍສະໜັບສະໜູນການຕ້ານລັດທິລ່າເມືອງຂຶ້ນແບບ ໃໝ່ໃນສະໄໝໃໝ່-ຂະບວນການ “ເພື່ອເສລີພາບຂອງບັນດາຊາດ” ແລະ ອື່ນໆ.
+ ພັກ ປປ ລາວ ຍັງໄດ້ເຂົ້າເປັນ ສະມາຊິກໜ່ວຍງານວິຊາການ ຂອງ ກອງປະຊຸມສາກົນ ຂອງບັນດາພັກ ກອມມູນິດ ແລະ ກຳມະກອນ (IMCWP) ໃນປີ 2022.
ສະຫຼຸບລວມແລ້ວ, ການເຄື່ຶອນໄຫວວຽກງານຕ່າງປະເທດຂອງພັກ ໄດ້ປະກອບສ່ວນອັນສຳຄັນເຂົ້າໃນການເພີ່ມທະວີການພົວພັນກັບບັນດາປະເທດເພື່ອນມິດຍຸດທະສາດ, ບັນດາພັກການເມືອງນັບທັງພັກກຳອຳນາດ ແລະ ບໍ່ກຳອຳນາດຂອງປະເທດຕ່າງໆໃນໂລກ ໂດຍບໍ່ຈຳແນກລະບອບການເມືອງທີ່ແຕກຕ່າງກັນ, ອັນໄດ້ເປັນການປະກອບສ່ວນອັນສຳຄັນເຂົ້າໃນການສ້າງສະພາບແວດລ້ອມພາຍນອກທີ່ເອື້ອອຳນວຍໃຫ້ແກ່ການຈັດຕັ້ງປະຕິບັດສອງໜ້າທີ່ຍຸດທະສາດ ແລະ ຍົກສູງບົດບາດຂອງພັກເຮົາ ໃນເວທີພາກພື້ນ ແລະ ສາກົນ, ທັງເປັນການປະກອບສ່ວນເຂົ້າໃນພາລະກິດສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.
2. ຜົນສຳເລັດ ໃນວຽກງານການທູດປະຊາຊົນ ໃນໄລຍະຜ່ານມາ.
ວຽກງານການທູດປະຊາຊົນ ເປັນ 1 ໃນ 3 ອົງປະກອບສຳຄັນຂອງວຽກງານການຕ່າງປະເທດ ແລະ ເປັນເຄື່ອງທາງການທູດ ທີ່ມີບົດບາດສຳຄັນໃນການພົວພັນປະສານງານ, ສ້າງຄວາມເຂົ້າອົກເຂົ້າໃຈ, ສ້າງເງື່ອນໄຂໃນການໄປມາຫາສູ່ ສານສຳພັນອັນດີ ລະຫວ່າງປະຊາຊົນລາວ ກັບບັນດາປະເທດອ້ອມຂ້າງ ລວມໄປເຖິງ ການເປັນເຄື່ອງມືໃນການໄກ່ເກ່ຍຄວາມບໍ່ເຂົ້າໃຈ, ຂໍ້ຂັດແຍ່ງ ແລະ ຫຼຸດຜ່ອນຄວາມເຄັ່ງຕຶງ ໃນໄລຍະທີ່ສະພາບການສາກົນ ພວມເຄັ່ງຮ້ອນ ເປັນຕົ້ນ.ຂະແໜງການທີ່ຮັບຜິດຊອບວຽກງານການທູດປະຊາຊົນ ກໍຈະປະກອບດ້ວຍ ສູນກາງສະຫະພັນກໍາມະບານລາວ, ສູນກາງຊາວໜຸ່ມ ປະຊາຊົນ ປະຕິວັດລາວ, ສູນກາງສະຫະພັນແມ່ຍິງລາວ, ສູນກາງແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດລາວ, ສະມາຄົມມິດຕະ ພາບລາວກັບຕ່າງປະເທດ, ຄະນະສັນຕິພາບ ແລະ ສາມັກຄີ ຂອງລາວ ເປັນຜູ້ຈັດຕັ້ງປະຕິບັດວຽກງານຕົວຈິງ ໂດຍມີ ຄະນະພົວພັນຕ່າງປະເທດສູນກາງພັກ ພວກຂ້າພະເຈົ້າ ເປັນຜູ້ຕິດຕາມຊຸກຍູ້, ປະສານງານ ແລະ ຄຸ້ມຄອງ.
ຕະຫຼອດໄລຍະຜ່ານມາ ພັກໄດ້ໃຫ້ຄວາມສຳຄັນຕໍ່ວຽກງານດັ່ງກ່າວ ແລະ ໄດ້ຊຸກຍູ້ໃຫ້ການທູດປະຊາ ຊົນໃຫ້ສືບຕໍ່ເຕີບໃຫຍ່ຂະຫຍາຍຕົວເປັນກ້າວໆມາ ແລະ ຖືເປັນອີກວຽກງານປາຍແຫຼມ ໃນການຕໍ່ສູ້ຂົນຂວາຍ, ຍາດແຍ່ງການຮ່ວມມື ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນ ຊຶ່ງມາຮອດປັດຈຸບັນ ພັກ ປປ ລາວ ໄດ້ສ້າງຕັ້ງສະມາຄົມມິດຕະພາບກັບຕ່າງປະເທດທັງໝົດມີ 20 ສະມາຄົມ ແລະ 1 ຄະນະສັນຕິພາບ ແລະ ສາມັກຄີຂອງລາວ ກັບຕ່າງປະເທດ; ສ່ວນຢູ່ຂັ້ນທ້ອງຖິ່ນ ຍັງໄດ້ສ້າງຕັ້ງສະມາຄົມມິດຕະພາບ ລາວ-ຫວຽດ ນາມ, ລາວ-ຈີນ ຢູ່ 18 ແຂວງຂອງລາວ ແລະ ສະມາຄົມມິດຕະພາບ ລາວ-ກຳປູເຈຍ ຢູ່ແຂວງຈຳປາສັກ ແລະ ອັດຕະປື.
ພ້ອມດຽວກັນນັ້ນ, ວຽກງານການທູດປະຊາຊົນ ຍັງໄດ້ປະກອບສ່ວນສຳຄັນໃນການຂົນຂວາຍການຮ່ວມ ມືຊ່ວຍເຫຼືອຈາກ ບັນດາອົງການຈັດຕັ້ງມາຫາຊົນ ຂອງບັນດາປະເທດເພື່ອມິດໄດ້ເປັນຈຳນວນຫຼວງຫຼາຍ ຊຶ່ງໄດ້ປະກອບສ່ວນສຳຄັນໃນການສ້າງສາພັດທະນາເສດຖະກິດ-ສັງຄົມຂອງລາວ ເປັນຕົ້ນແມ່ນ ດ້ານການກໍ່ສ້າງພື້ນ ຖານໂຄງລ່າງ, ໂຮງຮຽນ, ໂຮງໝໍ ຕະຫຼອດຮອດ ບັນດາກິດຈະກຳທາງດ້ານວັດທະນະທຳ, ຮີດຄອງປະເພນີ ແລະ ການສະເຫຼີມສະຫຼອງວັນສຳຄັນຂອງບັນດາປະເທດ.
3. ສະແດງຄວາມຮູ້ສຶກ ຕໍ່ວັນການທູດລາວ ຄົບຮອບ 80 ປີ (12/10/1945-12/10/2025)
ດັ່ງທີ່ ຂ້າພະເຈົ້າໄດ້ກ່າວໄປກ່ອນນັ້ນ, ວຽກງານການທູດ ກໍຄື ວຽກງານການຕ່າງປະເທດ ຖືເປັນຂະ ແໜງການທີ່ໄດ້ປະກອບສ່ວນສຳຄັນ ເຂົ້າໃນພາລະກິດຂອງຊາດ ແລະ ຢູ່ຄຽງຂ້າງທຸກໄຊຊະນະຂອງຊາດລາວ; ວັນທີ 12 ຕຸລາ 1945 ເປັນວັນທີ່ມີຄວາມໝາຍສຳຄັນຍິ່ງຕໍ່ປະຊາຊົນລາວ ແລະ ຖືເປັນວັນແຫ່ງໄຊຊະນະທີ່ສຳຄັນ ຂອງວຽກງານການຕ່າງປະເທດຂອງລາວ ຈຶ່ງໄດ້ຖືເອົາວັນນີ້ ເປັນວັນການທູດລາວ ແລະ ປີນີ້ ເປັນປີຄົບຮອບ 80 ປີພໍດີ.
ໃນນາມທີ່ ຂ້າພະເຈົ້າເປັນບຸກຄົນໜຶ່ງ ທີ່ໄດ້ເຕີບໃຫຍ່ມາໃນຂະແໜງການທູດ, ໄດ້ພົບເຫັນປະຈັກຕາ ແລະ ຜ່ານປະສົບການຕົວຈິງ ຂອງການເຕີບໃຫຍ່ຂະຫຍາຍຕົວຂອງວຽກງານການທູດ ແລະ ບົດບາດ ໃນການປະກອບສ່ວນຂອງວຽກງານການທູດ ຕໍ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃນໄລຍະຜ່ານມາ; ຂ້າພະເຈົ້າ ມີຄວາມພາກພູມໃຈເປັນຢ່າງຍິ່ງ ແລະ ຮູ້ສຶກຕື້ນຕັນໃຈທີ່ສຸດ ທີ່ເຫັນວ່າ ຕະຫຼອດ 80 ປີ ຜ່ານມາ ວຽກງານການທູດ ກໍຄືການຕ່າງປະເທດ ໄດ້ຮັບການເຊີດຊູ ແລະ ຊຸກຍູ້ໃຫ້ເຕີບໃຫຍ່ຂະຫຍາຍ ຕົວເປັນກ້າວໆມາ.
ຂ້າພະເຈົ້າ ມີຄວາມເຊື່ອໝັ້ນເປັນຢ່າງຍິ່ງວ່າ ພາຍໃຕ້ການນຳພາຢ່າງໃກ້ຊິດ ຂອງສູນກາງພັກ ກໍຄື ຄວາມເອົາໃຈໃສ່ ຍົກສູງຄວາມຮັບຜິດຊອບ ຂອງຄະນະພົວພັນຕ່າງປະເທດສູນກາງພັກ, ກະຊວງການຕ່າງ ປະເທດ ແລະ ບັນດາຂະແໜງການທີ່ກ່ຽວຂ້ອງ; ວຽກງານການທູດ ຈະສືບຕໍ່ໄດ້ຮັບການຊຸກຍູ້ໃຫ້ເຕີບໃຫຍ່ຂະຫຍາຍຕົວ ແລະ ນັບມື້ນັບເຂັ້ມແຂງ, ສືບຕໍ່ເປັນກຳລັງແຮງໃຫ້ແກ່ສູນກາງພັກ ໃນການພົວພັນປະສານງານ, ປົກປ້ອງຜົນປະໂຫຍດແຫ່ງຊາດ ແລະ ຍາດແຍ່ງການຮ່ວມມືທີ່ມີປະສິດທິຜົນ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນລາວ ກໍຄື ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ກ້າວຂຶ້ນ ຢ່າງບໍ່ຢຸດຢັ້ງ.
ຄໍາເຫັນ