ພາຍໃຕ້ການເປັນປະທານຂອງທ່ານ ກົງແກ້ວ ມີວໍລະຈັກ ສສຊ ປະຈຳເຂດເລືອກຕັ້ງທີ 13 ປະທານສະພາປະຊາຊົນແຂວງ. ໃຫ້ກຽດເຂົ້າຮ່ວມໂດຍ ທ່ານ ນາງ ສູນທອນ ໄຊຍະຈັກ ຄະນະເລຂາທິການສູນກາງພັກ ຮອງປະທານສະພາແຫ່ງຊາດ, ທ່ານ ບຸນໂຈມ ອຸບົນປະເສີດ ກໍາມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ກົງແກ້ວ ມີວໍລະຈັກ ໄດ້ຍົກໃຫ້ຮູ້ວ່າ: ຕະຫຼອດ 1 ປີ ຜ່ານມາ, ດ້ວຍຄວາມເອົາໃຈໃສ່ນໍາພາ-ຊີ້ນໍາຂອງຄະນະປະຈໍາສະພາແຫ່ງຊາດ, ຄະນະສະມາຊິກສະພາແຫ່ງຊາດ ປະສານສົມທົບກັບຄະນະປະຈໍາສະພາປະຊາຊົນແຂວງ ເຮັດວຽກຮ່ວມກັບອົງການປົກຄອງແຂວງ ດ້ວຍຮູບການຕິດຕາມ, ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ສາມາດບັນລຸໄດ້ຕາມແຜນການ ແລະ ຈໍານວນໜຶ່ງສາມາດປະຕິບັດໄດ້ລື່ນແຜນ ເຮັດໃຫ້ແຂວງພວກເຮົາ ສືບຕໍ່ມີສະຖຽງລະພາບທາງດ້ານການເມືອງ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍໂດຍພື້ນຖານ.
ກອງປະຊຸມຄັ້ງນີ້, ພວກເຮົາຈະໄດ້ສຸມໃສ່ຮັບຟັງ ແລະ ພິຈາລະນາຮັບຮອງເອົາບັນດາເນື້ອໃນຕົ້ນຕໍຈຳນວນໜຶ່ງເຊັ່ນ: 1. ພິຈາລະນາ ແລະ ຮັບຮອງເອົາບົດສະຫຼຸບການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ປະຈໍາປີ 2024 ແລະ ທິດທາງແຜນການວຽກງານປະຈໍາປີ 2025; 2. ບົດລາຍງານຂອງທ່ານຫົວໜ້າພະແນກພະລັງງານ ແລະ ບໍ່ແຮ່ແຂວງ ກ່ຽວກັບການຂຸດຄົ້ນແຮ່ທົດລອງ ພາຍໃນແຂວງສະຫວັນນະເຂດ ແລະ ການຈັດຕັ້ງປະຕິບັດໂຄງການກໍ່ສ້າງໄຟຟ້າພະລັງງານລົມຢູ່ແຂວງ; 3. ບົດລາຍງານຂອງທ່ານ ວ່າການຫົວໜ້າພະແນກພາຍໃນແຂວງ ກ່ຽວກັບການຈັດຕັ້ງປະຕິບັດວຽກງານ 3 ສ້າງພາຍໃນແຂວງໄລຍະຜ່ານມາ; 4. ພິຈາລະນາບັນຫາສໍາຄັນອື່ນໆ ທີ່ສະມາຊິກສະພາແຫ່ງຊາດປະຈໍາເຂດເລືອກຕັ້ງ ໄດ້ພົບເຫັນໃນໄລຍະທີ່ລົງເຄື່ອນໄຫວຕິດຕາມກວດກາ ທີ່ເປັນບັນຫາເຄັ່ງຮ້ອນໃນສັງຄົມ ແລະ ໄດ້ຍົກຂຶ້ນໃນກອງປະຊຸມ.
ໂອກາດນີ້, ບັນດາ ສສຊ ພ້ອມດ້ວຍພາກສ່ວນຕ່າງໆທີ່ເຂົ້າຮ່ວມ ໄດ້ປະກອບຄຳຄິດຄຳເຫັນໃສ່ວຽກງານຕ່າງໆທີ່ໄດ້ນຳເຂົ້າສະເໜີຕໍ່ກອງປະຊຸມ ເພື່ອໃຫ້ມີເນື້ອໃນໜັກແໜ້ນ, ສົມບູນ ແລະ ຮັບປະກັນໃຫ້ການຈັດຕັ້ງປະຕິບັດມີຜົນສຳເລັດຕາມແຜນການທີ່ວາງໄວ້.
(ຂ່າວ: ສະຫວັນນະເຂດ)
ຄໍາເຫັນ