ທ່ານ ພົນຈັດຕະວາ ສຸກພະຈັນ ສີລາເພັດ ກ່າວວ່າ: ບັນຫາການຄ້າມະນຸດເປັນອາຊະຍາກຳທີ່ຮ້າຍແຮງ ທີ່ເກີດຂຶ້ນຢູ່ພາຍໃນ ແລະ ຂ້າມຊາດ, ເປັນອາຊະຍາກໍາທີ່ລະເມີດສິດທິພື້ນຖານຂອງຄວາມເປັນມະນຸດຢ່າງຮ້າຍແຮງ ສົ່ງຜົນກະທົບໂດຍກົງທາງດ້ານຮ່າງກາຍ ແລະ ຈິດໃຈ ຂອງຜູ້ຖືກເຄາະຮ້າຍ ແລະ ຄອບຄົວ, ເປັນປະກົດການຫຍໍ້ທໍ້ໜຶ່ງທີ່ເກີດຂຶ້ນໃນສັງຄົມ ແລະ ສົ່ງຜົນກະທົບຕໍ່ສັງຄົມ ກໍຄືການພັດທະນາສ້າງສາປະເທດຊາດ. ການຄ້າມະນຸດ ເປັນທຸລະກິດຜິດກົດໝາຍທີ່ມີຜົນກຳໄລມະຫາສານເປັນອັນດັບສອງຂອງໂລກ ຮອງຈາກການຄ້າຂາຍຢາເສບຕິດ. ຕາມການຄາດຄະເນຂອງບັນດາອົງການສາກົນທີ່ເຮັດວຽກຕ້ານອາດຊະຍາກຳດັ່ງກ່າວ. ໃນປັດຈຸບັນ, ມີຜູ້ຖືກເຄາະຮ້າຍຈາກການຄ້າມະນຸດໃນທົ່ວໂລກຫຼາຍກ່ວາ 40 ລ້ານຄົນ. ໃນນີ້, ຜູ້ຍິງ ແລະ ເດັກນ້ອຍແມ່ນກວມເອົາ 71%. ເຂດທີ່ມີຜູ້ຖືກເຄາະຮ້າຍຫຼາຍທີ່ສຸດໃນໂລກ ແມ່ນເຂດພາກພື້ນອາຊີ ແລະ ປາຊີຟິກ ກວມເອົາ 65% ຂອງຈຳນວນຜູ້ຖືກເຄາະຮ້າຍໃນທົ່ວໂລກ.
ສະເພາະ ສປປ ລາວ ໃນຊຸມປີຜ່ານມາ, ການຄ້າມະນຸດ ທີ່ພົ້ນເດັ່ນແມ່ນຮູບແບບໄປອອກແຮງງານແບບຜິດກົດໝາຍ ແລະ ຂົນຂວາຍເອົາແມ່ຍິງລາວໄປແຕ່ງງານກັບຄົນຕ່າງປະເທດ ດ້ວຍຮູບການໝັ້ນໝາຍແອບແຝງ, ແຕ່ງດອງແອບແຝງ ແລະ ອື່ນໆ. ສຳລັບປີ 2024 ບັນຫາການຄ້າມະນຸດ ອັນທີ່ພົ້ນເດັ່ນ ແມ່ນການໃຫ້ຮັບຈ້າງຖືພາ, ເຜີຍແຜ່ພາບສິ່ງລາມົກອານາຈານ, ເຜີຍແຜ່ພາບສິ່ງລາມົກຜ່ານສື່ສັງຄົມອ່ອນລາຍ ແລະ ອື່ນໆ.
ສຳລັບສະພາບການຄ້າມະນຸດຢູ່ ແຂວງຈຳປາສັກ, ໃນ 01 ປີຜ່ານມາ ພົບເຫັນຜູ້ຖືກເຄາະຮ້າຍຈາກການຄ້າມະນຸດ ຢູ່ພາຍໃນ ສປປ ລາວ ໂດຍສະເພາະສາມລ່ຽມຄໍາ (ແຂວງບໍ່ແກ້ວ) ດ້ວຍກໍລະນີຂູດຮີດແຮງງານ ແລະ ຂູດຮີດທາງເພດທີ່ເປັນແມ່ຍິງ, ມີອາຍຸຕໍ່າກວ່າ 18 ປີ, ນອກນັ້ນ ຍັງໄດ້ພົບເຫັນກຸ່ມສ່ຽງຈໍານວນໜຶ່ງໂດຍສະເພາະແມ່ນແມ່ຍິງ ແລະ ເດັກນ້ອຍຖືກລ່ວງລະເມີດທາງເພດ, ຖືກຊັກຊວນ, ແນະນໍາຈາກບັນດາແຂວງພາກເໜືອ ແລະ ພາກກາງ ໃຫ້ມາຂາຍບໍລິການທາງເພດແບບແອບແຝງຢູ່ຕາມສະຖານທີ່ ທີ່ມີການລົງທຶນຂອງຕ່າງປະເທດ ແລະ ສະຖານທີ່ທ່ອງທ່ຽວຕ່າງໆ ນໍາບັນດາເມືອງ ແລະ ນະຄອນ ຢູ່ພາຍໃນແຂວງພວກເຮົາ. ໃນນັ້ນ, ສະພາບທີ່ພົ້ນເດັ່ນກວ່າໝູ່ມີແມ່ຍິງ ແລະ ເດັກນ້ອຍ ຖືກຕົວະຍົວະໃຫ້ໄປເຮັດວຽກຕອບແຊັດ ຢູ່ເຂດເສດຖະກິດພິເສດສາມລ່ຽມຄໍາ (ແຂວງບໍ່ແກ້ວ) ວ່າ: ຈະໄດ້ເງິນເດືອນ 5 ລ້ານກີບ ຫາ 10 ລ້ານກີບ. ນອກນີ້ຍັງມີແຮງງານລາວຈໍານວນໜຶ່ງຖືກຂົນຂວາຍໄປອອກແຮງງານຢູ່ຕ່າງປະເທດແບບຜິດກົດໝາຍ ໂດຍບໍ່ຜ່ານພະແນກແຮງງານ ແລະ ສະຫັວດດີການສັງຄົມ.
ທ່ານ ພັທ ອາລຸນ ບົວລະພາພັນ ຫົວ ໜ້າກອງເລຂາຄະນະກຳມະການຕ້ານການຄ້າມະນຸດຂັ້ນແຂວງ,ໄດ້ຜ່ານຂໍ້ຕົກລົງວ່າດ້ວຍການອະນຸມັດເປີດກອງປະຊຸມ,ບົດສະຫຼຸບຕີລາຄາສະພາບການເຄື່ອນໄຫວຂອງຄະນະກຳມະການຕ້ານການຄ້າມະນຸດ ແຂວງຈໍາປາສັກ ໃນ ປີ 2024 ແລະ ທິດທາງແຜນການ ປີ 2025. ຈາກນັ້ນ, ບັນດາທ່ານຄະນະກຳມະການຂັ້ນແຂວງ, ນະຄອນ, ເມືອງ ໄດ້ຜັດປ່ຽນກັນ ປະກອບຄໍາເຫັນ ຢ່າງກົງໄປກົງມາ ຊຶ່ງໄດ້ຍົກໃຫ້ເຫັນດ້ານດີທີ່ຕັ້ງໜ້າ, ຈຸດອ່ອນຂໍ້ຄົງຄ້າງ ພ້ອມບັນດາບົດຮຽນທີ່ຖອດຖອນໄດ້ ແລະ ທິດທາງຈະແກ້ໄຂໃນຕໍ່ໜ້າ ເພື່ອແນໃສ່ເຮັດໃຫ້ການຈັດຕັ້ງເຄື່ອນໄຫວວຽກງານຕ້ານການຄ້າມະນຸດພາຍໃນແຂວງມີປະສິດທິຜົນສູງຂຶ້ນກວ່າເກົ່າ.
(ຂ່າວ: ເກດສະໜາ ແກ້ວສຸວັນນະແສງ)
ຄໍາເຫັນ