ຄະນະນໍາ ສພຊ ຕິດຕາມກວດກາການຈັດຕັ້ງປະຕິບັດຄຳຕັດສິນຂອງສານຢູ່ແຂວງຈຳປາສັກ

ສພຊ ໃນວັນທີ 8 ເມສານີ້, ຄະນະນໍາຂັ້ນສູງຂອງສະພາແຫ່ງຊາດ (ສພຊ) ນຳໂດຍທ່ານ ນາງ ສູນທອນ ໄຊຍະຈັກ ຮອງປະທານ ຄະນະປະປະຈຳສະພາແຫ່ງຊາດ ພ້ອມດ້ວຍຄະນະ ໄດ້ລົງເຄື່ອນໄຫວເຮັດວຽກຢູ່ແຂວງຈຳປາເພື່ອເຂົ້າຮ່ວມກອງປະຊຸມຕິດຕາມກວດກາການຈັດຕັ້ງປະຕິບັດຄຳຕັດສິນຂອງສານ ທີ່ຫ້ອງປະຊຸມສະພາປະຊາຊົນແຂວງ ໂດຍມີທ່ານ ຮອງປະທານສະພາປະຊາຊົນແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 15, ຕາງໜ້າຈາກສານປະຊາຊົນແຂວງ, ໄອຍະການປະຊາຊົນແຂວງ, ກອງບັນຊາການປ້ອງກັນຄວາມສະຫງົບແຂວງ, ບັນດາພະແນກການທີ່ກ່ຽວຂ້ອງຂອງແຂວງເຂົ້າຮ່ວມ
ກອງປະຊຸມໄດ້ຮັບຟັງການລາຍງານຂອງພະແນກຍຸຕິທໍາແຂວງກ່ຽວກັບການຈັດຕັ້ງຜັນຂະຫຍາຍກົດໝາຍວ່າດ້ວຍການຈັດຕັ້ງປະຕິບັດຄໍາຕັດສິນຂອງສານສະບັບປັບປຸງປີ 2021 ແລະສະພາບການຈັດຕັ້ງປະຕິບັດວຽກງານປະຕິບັດຄໍາຕັດສິນຂອງສານແຕ່ລະຂັ້ນ,ການລາຍງານກ່ຽວກັບສະພາບການຈັດຕັ້ງປະຕິບັດດໍາລັດຂອງລັດຖະບານວ່າດ້ວຍຊັບສິນທີ່ຖືກຢຶດ, ອາຍັດແລະຮິບເປັນຂອງລັດສະບັບເລກທີ 280/ນຍ, ລົງວັນທີ09/8/2022ຈາກບັນດາພະແນກການກ່ຽວຂ້ອງຂອງແຂວງ ເຊິ່ງບັນດາທ່ານຜູ້ເຂົ້າຮ່ວມກອງປະຊຸມໄດ້ຍົກໃຫ້ເຫັນຂໍ້ສະດວກ, ດ້ານດີ, ຂໍ້ຫຍຸ້ງຍາກ, ດ້ານຄົງຄ້າງ, ສາເຫດທີ່ພາໃຫ້ມີການແກ່ຍາວ, ບໍ່ສາມາດຈັດຕັ້ງປະຕິບັດໄດ້, ສິ່ງທ້າທາຍຕ່າງໆ, ບາງບົດຮຽນທີ່ຖອດຖອນໄດ້ແລະ ທິດທາງແກ້ໄຂວຽກງານດັ່ງກ່າວໃນຕໍ່ໜ້າ.
ໃນກອງປະຊຸມ, ທ່ານ ນາງ ສູນທອນ ໄຊຍະຈັກ ໄດ້ເນັ້ນໜັກໃຫ້ບັນດາອົງການກ່ຽວຂ້ອງສືບຕໍ່ສູ້ຊົນປະຕິບັດກົດໝາຍວ່າດ້ວຍການຈັດຕັ້ງປະຕິບັດຄໍາຕັດສິນຂອງສານ;ດໍາລັດວ່າດ້ວຍຊັບສິນທີ່ຖືກຢຶດ, ອາຍັດ ແລະ ຮິບເປັນຂອງລັດ; ສະພາບການຈັດຕັ້ງປະຕິບັດວຽກງານປະຕິບັດຄໍາຕັດສິນຂອງສານແຕ່ລະຂັ້ນໃຫ້ເຂັ້ມງວດ ແລະ ເດັດຂາດ, ສະເໜີໃຫ້ຄະນະພັກ, ຄະນະນຳແຕ່ລະຂັ້ນ ເປັນເຈົ້າການນຳພາ-ຊີ້ນຳການຈັດຕັ້ງຜັນຂະຫຍາຍກົດໝາຍວ່າດ້ວຍການຈັດຕັ້ງປະຕິບັດຄຳຕັດສິນຂອງສານໃຫ້ເຂົ້າສູ່ລວງເລິກ ແລະ ເປັນຮູບປະທຳເທື່ອລະກ້າວ, ໂຄສະນາເຜີຍແຜ່ສ້າງຄວາມຮັບຮູ້ກົດໝາຍໃຫ້ແກ່ສັງຄົມ, ປັບປຸງກົນໄກການຈັດຕັ້ງປະຕິບັດຄຳຕັດສິນຂອງສານ ໃຫ້ຖືກຕ້ອງຕາມກົດໝາຍໄດ້ກຳນົດໄວ້, ສຶກສາອົບຮົມພະນັກງານເພີ່ມຄວາມຮັບຜິດຊອບການເມືອງສູງຂຶ້ນກວ່າເກົ່າ ມີຈັນຍາບັນ, ຈັນຍາທຳໃນການຈັດຕັ້ງປະຕິບັດວຽກງານດັ່ງກ່າວໃຫ້ມີປະສິດທິພາບ ແລະ ປະສິດທິຜົນ.
ໂອກາດດັ່ງກ່າວ, ຄະນະຍັງໄດ້ພົບປະກັບທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ທີ່ໄດ້ລາຍງານກ່ຽວກັບສະພາບການພັດທະນາທີ່ພົ້ນເດັ່ນຂອງແຂວງໄລຍະຜ່ານມາ ແລະ ໄດ້ຢ້ຽມຢາມພື້ນຖານການຜະລິດຈຳນວນໜຶ່ງ ຢູ່ເມືອງປາກຊ່ອງ.
(ຂ່າວ ແລະ ພາບ: ນາງ ກຸກກິກ ບຸດດາໄຊ)