 |
ໃນວັນທີ 4 ຕຸລາ 2025 ລະດັບນໍ້າງື່ມຢູ່ລະດັບ 11:34 ແມັດ ຊຶ່ງຖ້າທຽບໃສ່ລະດັບເຕືອນໄພແມ່ນ 12 ແມັດ ແລະ ລະດັບອັນຕະລາຍ 13 ແມັດ ເຫັນວ່າລະດັບນໍ້າງື່ມແມ່ນມີທ່າອ່ຽງເພີ່ມຂຶ້ນຢ່າງຕໍ່ເນື່ອງ, ເຮັດໃຫ້ນ້ຳໄຫຼຜ່ານເຂົ້າປະຕູນ້ຳ, ຫ້ວຍທຳມະຊາດ, ໄຫຼເຂົ້າຖ້ວມເຮືອນຊານ, ຮົ້ວສວນ ແລະ ພື້ນທີ່ການຜະລິດຂອງປະຊາຊົນ, ເປັນຕົ້ນ: ກຸ່ມບ້ານເວີນຄຳ, ກຸ່ມທ່າງ່ອນ, ກຸ່ມດົງ ແລະ ກຸ່ມຫ້ວຍຈຽມ ສຳລັບເຮືອນປະຊາຊົນທີ່ໄດ້ຮັບຜົນກະທົບນໍ້າຖ້ວມທັງໝົດ ມີ 12 ບ້ານ, ມີ 252 ຄອບຄົວ, ມີພື້ນທີ່ການຜະລິດຖືກຖ້ວມປະກອບມີ ເນື້ອທີ່ການຜະລິດເຂົ້າ 87.6 ຮຕ ຈໍານວນ 49 ຄອບຄົວ, ສວນມັນຕົ້ນ 4.5 ຮຕ ຈໍານວນ 7 ຄອບຄົວ, ພືດຜັກ 1 ຮຕ, ໄມ້ໃຫ້ໝາກ 3.2 ຮຕ ຈໍານວນ 2 ຄອບຄົວ, ສວນໝາກພ້າວ 4 ຮຕ ຈໍານວນ 4 ຄອບຄົວ, ໜອງປາ 27 ໜອງ ເນື້ອທີ່ 2.4 ຮຕ ຈຳນວນ 11 ຄອບຄົວ. ຕໍ່ມາທາງຄະນະໄດ້ເດີນທາງໄປຕິດຕາມສະພາບນ້ຳ ທີ່ອ່າງເກັບນ້ຳ ນໍ້າຫຸມ-ນ້ຳຊ່ວງ, ເຂດເມືອງນາຊາຍທອງ ຊຶ່ງໄດ້ຮັບຟັງການລາຍງານ ໂດຍການນຳເມືອງນາຊາຍທອງ ໃຫ້ຮູ້ວ່າ ໃນລະຫວ່າງວັນທີ 24 ກັນຍາ - 3 ຕຸລາ 2025 ໄດ້ມີຝົນຕົກໜັກ ຢູ່ພື້ນທີ່ ເມືອງນາຊາຍທອງ ຈຶ່ງເຮັດໃຫ້ນໍ້າຫຸມ, ນໍ້າຊ່ວງ ສົມທົບກັບມວນນໍ້າ ສາຍນ້ຳຕ່າງໆ ທີ່ໄຫຼມາຈາກພູພະນັງ, ອ່າງເກັບນໍ້າວັງຍິ່ງ, ບວກກັບມີການລະບາຍນໍ້າຈາກເຂື່ອນຕ່າງໆທີ່ປ່ອຍນໍ້າລົງມາ ເຮັດໃຫ້ລະດັບນໍ້າງື່ມຂຶ້ນສູງ, ຍູ້ດັນມວນນໍ້າທີ່ໄຫຼລົງສູ່ນໍ້າງື່ມ ເຮັດໃຫ້ນໍ້າໄຫຼຊ້າ ຈຶ່ງເປັນສາເຫດເຮັດໃຫ້ມີສະພາບນໍ້າຖ້ວມທີ່ຢູ່ອາໄສຂອງປະຊາຊົນ ແລະ ເນື້ອທີ່ທໍາການຜະລິດ, ໜອງປາປະຊາຊົນທີ່ຢູ່ພື້ນທີ່ຕໍ່າ ຊຶ່ງຈຳນວນບ້ານທີ່ຖືກເສຍຫາຍ ມີ 6 ບ້ານ, ນາເຂົ້າຖືກຜົນກະທົບລວມ 240 ຮຕ, ສວນສາລີຫວານ 38 ໄຮ່, ສາລີອາຫານສັດ 30 ໄຮ່, ສວນໝາກເພັດ 57 ໄຮ່, ສວນໝາກຮຸ່ງ 19 ໄຮ່, ສວນໝາກແຕງ 7 ໄຮ່.
 |
ໂອກາດນີ້, ທ່ານລັດຖະມົນຕີ ກໍໄດ້ຊີ້ນຳພາກສ່ວນກ່ຽວຂ້ອງ ແລະ ການນຳຂອງທັງສອງເມືອງ ໃຫ້ເລັ່ງເກັບກຳຂໍ້ມູນ ສະພາບນ້ຳຖ້ວມໃຫ້ລະອຽດຂຶ້ນຕື່ມ, ໂດຍສະເພາະໃນຈຸດທີ່ແກ້ໄຂໄດ້ກ່ອນ ເພື່ອຮັບປະກັນໃຫ້ສົ່ງຜົນກະທົບໜ້ອຍທີ່ສຸດ ຕໍ່ການດຳລົງຊີວິດຂອງປະຊາຊົນໃນເຂດເມືອງຂອງຕົນ. ການລົງຕິດຕາມກວດກາໃນຄັ້ງນີ້, ເຫັນວ່າມີຫຼາຍຈຸດ ຍັງພົບກັບບັນຫານ້ຳຖ້ວມຂັງຢູ່, ທ່ານລັດຖະມົນຕີ ກໍໄດ້ມີຄວາມເປັນຫ່ວງເປັນໄຍ ແລະ ໃຫ້ທິດຊີ້ນຳໃນການແກ້ໄຂບັນຫານີ້ ໂດຍໃຫ້ປະສານກັບກົມວິຊາການຂອງກະຊວງ, ໃນການສະໜອງແນວພັນເຂົ້າ, ແນວພັນພືດ, ແນວພັນສັດນ້ຳ ພ້ອມດ້ວຍປະສານກັບໜ່ວຍງານໄພພິພັດຂັ້ນສູນກາງ ຊ່ວຍເລັ່ງແກ້ໄຂສິ່ງທີ່ຈໍາເປັນ ຮີບດ່ວນໃຫ້ກັບປະຊາຊົນ ໃນເຂດສອງເມືອງດັ່ງກ່າວໃຫ້ທັນສະພາບການ.
(ຂ່າວ: ກະຊວງກະສິກຳ ແລະ ສິ່ງແວດລ້ອມ)
ຄໍາເຫັນ