ຄະນະປະຈໍາສະພາທິດສະດີສູນກາງພັກ-ຄະນະຈັດຕັ້ງສູນກາງພັກ ຈັດກອງປະຊຸມຮ່ວມ

ກອງປະຊຸມໄດ້ເປີດຂຶ້ນພາຍໃຕ້ບັນຍາກາດແຫ່ງຄວາມຮັບຜິດຊອບສູງ ຊຶ່ງຜູ້ຕາງໜ້າຄະນະຮັບຜິດຊອບກະກຽມຮ່າງມະຕິຂອງຄະນະຈັດຕັ້ງສູນກາງພັກໄດ້ນໍາສະເໜີເນື້ອໃນສໍາຄັນຂອງຮ່າງມະຕິ ໂດຍໄດ້ຊີ້ແຈງຈຸດປະສົງ, ຄວາມຈໍາເປັນ, ພື້ນຖານທາງທິດສະດີ ແລະ ພຶດຕິກໍາ, ພ້ອມທັງທິດທາງ ແລະ ມາດຕະການສໍາຄັນໃນການສົ່ງເສີມ, ບໍາລຸງສ້າງ, ຄຸ້ມຄອງ ແລະ ນໍາໃຊ້ຖັນແຖວປັນຍາຊົນທີ່ມີຄຸນນະພາບ ໃຫ້ສອດຄ່ອງກັບການພັດທະນາປະເທດໃນໄລຍະໃໝ່.

ບັນດາຜູ້ເຂົ້າຮ່ວມແມ່ນໄດ້ປະກອບຄໍາເຫັນຢ່າງກວ້າງຂວາງ ແລະ ມີເນື້ອໃນເລິກເຊິ່ງ ໂດຍສຸມໃສ່ການກໍານົດແນວຄິດ, ຈຸດປະສົງ, ຂອບເຂດຂອງປັນຍາຊົນທີ່ມີຄຸນນະພາບ, ກົນໄກການຄົ້ນຄວ້າ, ດຶງດູດ, ບໍາລຸງສ້າງ, ນໍາໃຊ້ ແລະ ຍ້ອງຍໍຜູ້ມີຄວາມຮູ້, ຄວາມສາມາດ ພ້ອມທັງສະເໜີໃຫ້ມີການກໍານົດນະໂຍບາຍທີ່ເປັນຮູບປະທໍາ ແລະ ສາມາດນໍາໄປຈັດຕັ້ງປະຕິບັດໄດ້ຢ່າງມີປະສິດທິຜົນ.

ບັນດາຄໍາເຫັນຂອງຜູ້ເຂົ້າຮ່ວມກອງປະຊຸມຍັງໄດ້ເນັ້ນໜັກໃຫ້ຮ່າງມະຕິສືບຕໍ່ຢຶດໝັ້ນແນວທາງຂອງພັກ ໃນການຖືເອົາຄົນເປັນໃຈກາງຂອງການພັດທະນາ, ສ້າງສະພາບແວດລ້ອມ ແລະ ເງື່ອນໄຂທີ່ເອື້ອອໍານວຍໃຫ້ປັນຍາຊົນສາມາດພັດທະນາຕົນເອງຢ່າງຮອບດ້ານ ແລະ ປະກອບສ່ວນຕໍ່ການຄົ້ນຄວ້າວິທະຍາສາດ, ພັດທະນາເຕັກໂນໂລຊີ, ນະວັດຕະກໍາ ແລະ ການພັດທະນາເສດຖະກິດ-ສັງຄົມຂອງປະເທດ.

ໃນຕອນທ້າຍປະທານກອງປະຊຸຸມໄດ້ເນັ້ນໜັກວ່າ: ຄໍາເຫັນທີ່ປະກອບມານັ້ນລ້ວນແຕ່ເປັນຂໍ້ຄິດເຫັນທີ່ສໍາຄັນ ແລະ ຈະປະກອບສ່ວນໃນການປັບປຸງຮ່າງມະຕິໃຫ້ສົມບູນຍິ່ງຂຶ້ນ, ກ່ອນຈະນໍາສະເໜີຕໍ່ຄະນະບໍລິຫານງານສູນກາງພັກ ສະໄໝທີ XII ພິຈາລະນາຮັບຮອງຕາມຂັ້ນຕອນ. ຜົນສໍາເລັດຂອງກອງປະຊຸມໃນຄັ້ງນີ້ ຈະປະກອບສ່ວນສໍາຄັນໃນການຍົກສູງຄຸນນະພາບຂອງຮ່າງມະຕິ ແລະ ສ້າງພື້ນຖານໃຫ້ແກ່ການກໍານົດນະໂຍບາຍດ້ານການພັດທະນາປັນຍາຊົນຂອງປະເທດໃນໄລຍະໃໝ່. (ຂ່າວ: ແສງຈັນ)