ປັດຈຸບັນຢູ່ພາຍໃນແຂວງມີຖັນແຖວພະນັກງານນໍາພາ-ຄຸ້ມຄອງ ແລະພະນັກງານວິຊາການໃນແຕ່ລະຂົງເຂດ ບໍ່ໜ້ອຍ, ທີ່ໄດ້ຜ່ານການກໍ່ສ້າງ, ພັດທະນາຍົກລະດັບດ້ວຍການລົງທຶນອັນຫຼວງຫຼາຍ, ຕ້ອງເຮັດໃຫ້ພະນັກງານແຕ່ລະຄົນໄດ້ຮັບການຊັບຊ້ອນເຂົ້າໃນຕໍາແໜ່ງງານ, ທັງມອບໝາຍໜ້າທີ່ ແລະຄວາມຮັບຜິດຊອບຕົວຈິງ, ເຮັດໃຫ້ທຸກການຈັດຕັ້ງ ແລະພະນັກງານທີ່ຮັບຜິດຊອບແຕ່ລະວຽກ ເຄື່ອນໄຫວຢ່າງເປັນຕ໋ອງໂສ້ ຮັບປະກັນຂັບເຄື່ອນນະໂຍບາຍທີ່ວາງອອກ ຢ່າງເປັນລະບົບມີປະສິດທິພາບ, ແກ້ໄຂເດັດຂາດສະພາບພະນັກງານ “ເຫຼືອບໍ່ພໍ”, ຕີຖອຍປະກົດການຈຸ້ມເຈື້ອ, ເຊື້ອສາຍ ຫຼື ການສະແຫວງຫາຜົນປະໂຫຍດ ໃນການສັບຊ້ອນຈັດວາງ, ບໍ່ປ່ອຍໃຫ້ມີການເລືອກວຽກ, ແລ່ນນໍາຜົນປະໂຫຍດໃນຖັນແຖວພະນັກງານ, ກໍາແໜ້ນສະພາບພະນັກງານ, ປະຕິບັດເຂັ້ມງວດຫຼັກການ “ມີເຂົ້າມີອອກ, ມີຂຶ້ນມີລົງ”. ພ້ອມນີ້ ຕ້ອງຖືເອົາການຕິດຕາມ-ກວດກາ ຄວາມຮັບຜິດຊອບການເມືອງ, ການປະຕິບັດລະບຽບວິໄນ ແລະຂໍ້ຫ້າມຕໍ່ສະມາຊິກພັກ, ພະນັກງານ-ລັດຖະກອນ ເປັນທັງຫຼັກການ, ເປັນທັງມາດຕະການອັນຈໍາເປັນ ເພື່ອປັບປຸງພັກ ແລະລະບົບການເມືອງ ໃຫ້ມີຄວາມປອດໃສ ເຂັ້ມແຂງ ແລະໜັກແໜ້ນ, ເຄື່ອນໄຫວມີຄຸນນະພາບ, ມີປະສິດທິພາບ ແລະມີປະສິດທິຜົນ. ຄະນະພັກແຕ່ລະຂັ້ນ ຕ້ອງເອົາໃສໃສ່ນໍາພາປັບປຸງຄວາມເຂັ້ມແຂງ ຂອງຄະນະກວດກາພັກ, ອົງການກວດກາລັດ ໃຫ້ທິດທາງ, ໃຫ້ການຊີ້ນໍາຢ່າງໃກ້ສິດ ຕໍ່ອົງການກວດກາ ເພື່ອກວດກາການເມືອງ ແລະຮັດແໜ້ນລະບຽບວິໄນຢູ່ພາຍໃນ, ຮັບປະກັນການນໍາພາການເມືອງຂອງພັກ, ສ້າງຄວາມໂປ່ງໃສ ແລະມີປະສິດທິພາບໃນການຄຸ້ມຄອງລັດ. ພິເສດ ກວດກາ ແລະແກ້ໄຂສະພາບພະນັກ ງານສວຍໃຊ້ໜ້າທີ່ກົດໜ່ວງຖ່ວງດຶງ ເພື່ອຕໍ່ລອງຜົນປະໂຫຍດນໍາຜູ້ໃຊ້ບໍລິການຂອງລັດ ແລະການສວຍໃຊ້ໜ້າທີ່ເພື່ອຍັກຍອກ, ກອບໂກຍເງິນຄໍາ, ຊັບສິນຂອງລັດ, ຂອງລວມໝູ່ ແລະຂອງປະຊາຊົນ. ທັງໝົດນັ້ນ ເພື່ອຮັບປະກັນຄວາມສັດທາ ແລະການສະໜັບສະໜູນ ຂອງປະຊາຊົນ ຕໍ່ພັກ, ສາມາດປຸກລຸດົມປະຊາຊົນ ເຂົ້າຮ່ວມການຈັດຕັ້ງປະຕິບັດມະຕິກອງປະຊຸມໃຫຍ່ ຢ່າງກວ້າງຂວາງ ແລະແຂງແຮງ.
ສະຫາຍ ຄໍາພັນ ພົມມະທັດ ເນັ້ນຕື່ມວ່າ: ສຳລັບບັນດາສະຫາຍ ຜູ້ແທນສົມບູນ ທີ່ຈະໄປຮ່ວມກອງປະຊຸມໃຫຍ່ ຄັ້ງທີ XII ຂອງພັກ ຕ້ອງທຸ້ມເທຄວາມຮູ້, ສະຕິປັນຍາ ເພື່ອຄົ້ນຄວ້າ ປະກອບຄໍາເຫັນ ຕໍ່ບັນດາເອກະສານກອງປະຊຸມໃຫຍ່, ເລືອກເຟັ້ນ ແລະລົງຄະແນນສຽງ ເລືອກຕັ້ງຜູ້ຈະເຂົ້າໃນ ຄະນະບໍລິຫານງານສູນກາງພັກ ສະໄໝທີ XII, ປະກອບສ່ວນໂດຍກົງ ໃນການປັບປຸງຍົກລະດັບຄຸນນະພາບ ແລະຄວາມສາມາດນໍາພາ ຂອງຄະນະບໍລິຫານງານສູນກາງພັກ ສະໄໝທີ XII ໃຫ້ສູງຂຶ້ນ.
(ຂ່າວ: ອາພຸດເດດ ບຸບຜາ, ພາບ: ດາວອນ ມະນີວັນ)
ຄໍາເຫັນ