 |
ບໍລິສັດ ຮຸ້ນສ່ວນ ໂກໂກ ຫວຽດນາມ ພາຍໃຕ້ກຸ່ມ Vinacoco / GC Food ແມ່ນຜູ້ຜະລິດວຸ້ນໝາກພ້າວ (Nata de Coco) ຂະໜາດໃຫຍ່ຂອງຫວຽດນາມ ທີ່ມີກຳລັງການຜະລິດຫຼາຍໝື່ນໂຕນຕໍ່ປີ ແລະ ສົ່ງອອກໄປຫຼາຍກວ່າ 20 ປະເທດທົ່ວໂລກ. ໃນຂະນະທີ່ ບໍລິສັດ ວີນາ ຈຳກັດ ເປັນຜູ້ຜະລິດ ແລະ ຈຳໜ່າຍອາຫານສັດ (ໄກ່, ໝູ, ງົວ, ເປັດ ແລະ ສັດລ້ຽງອື່ນໆ) ທີ່ມີກຳລັງການຜະລິດຫຼາຍກວ່າ 500,000 ໂຕນຕໍ່ປີ, ໄດ້ຮັບມາດຕະຖານ ISO 9001:2015 ແລະ ມີຕະຫຼາດສົ່ງອອກຫຼັກ ເປັນຕົ້ນແມ່ນ ສະຫະລັດອາເມຣິກາ, ໄທ, ຈີນ ແລະ ປະເທດອື່ນໆ.
ການລົງຢ້ຽມຢາມຄັ້ງນີ້, ຜູ້ບໍລິຫານຂອງທັງສອງບໍລິສັດໄດ້ລາຍງານພາບລວມກ່ຽວກັບການດຳເນີນທຸລະກິດ, ຂະບວນການຜະລິດ, ການພັດທະນາຂີດຄວາມສາມາດ ແລະ ທິດທາງການເຕີບໂຕ ທີ່ເນັ້ນໃສ່ຄວາມທັນສະໄໝ, ການນຳໃຊ້ເຕັກໂນໂລຊີຂັ້ນສູງ ເພື່ອຍົກລະດັບຄຸນນະພາບ ແລະ ພັດທະນາຢ່າງຍືນຍົງ. ພ້ອມນີ້, ຍັງໄດ້ສະແດງທັດສະນະວ່າ ສາຍພົວພັນມິດຕະພາບອັນດີງາມລະຫວ່າງ ຫວຽດນາມ ແລະ ລາວ ແມ່ນຮາກຖານອັນສຳຄັນ ໃນການຊຸກຍູ້ໃຫ້ວິສາຫະກິດຂອງທັງສອງປະເທດ ເພີ່ມທະວີການເຊື່ອມໂຍງ, ຂະຫຍາຍການລົງທຶນ ແລະ ການຄ້າຮ່ວມກັນ.
 |
ໂອກາດດັ່ງກ່າວ, ທ່ານ ອາລຸນໄຊ ສູນນະລາດ ໄດ້ສະແດງຄວາມຊົມເຊີຍຕໍ່ຜົນສຳເລັດ, ຂີດຄວາມສາມາດການຜະລິດ, ການນຳໃຊ້ເຕັກໂນໂລຊີທີ່ທັນສະໄໝ ແລະ ທິດທາງການພັດທະນາຢ່າງຍືນຍົງຂອງທັງສອງບໍລິສັດ. ການຢ້ຽມຢາມຄັ້ງນີ້ ບໍ່ພຽງແຕ່ເປັນການຮັບຊາບຂໍ້ມູນດ້ານການຜະລິດທີ່ມີມາດຕະຖານເທົ່ານັ້ນ, ແຕ່ຍັງເປັນການຮັດແໜ້ນການແລກປ່ຽນ ແລະ ສ້າງຄວາມເຂົ້າໃຈເຊິ່ງກັນ ແລະ ກັນ ເພື່ອເປີດໂອກາດໃຫ້ບັນດາບໍລິສັດຢູ່ນະຄອນດົ່ງນາຍ ທີ່ມີຄວາມສົນໃຈ ເຂົ້າມາຂະຫຍາຍການລົງທຶນ ແລະ ການຄ້າ ຢູ່ແຂວງຈຳປາສັກ ທີ່ມີທ່າແຮງບົ່ມຊ້ອນສອດຄ່ອງກັບການດຳເນີນທຸລະກິດ.
ທ່ານ ອາລຸນໄຊ ສູນນະລາດ ຫວັງຢ່າງຍິ່ງວ່າ ທັງສອງບໍລິສັດຈະສືບຕໍ່ເສີມສ້າງການຮ່ວມມື ແລະ ຂະຫຍາຍກິດຈະການມາຍັງແຂວງຈຳປາສັກ, ເຊິ່ງຈະເປັນການປະກອບສ່ວນຢ່າງເປັນຮູບປະທຳ ເຂົ້າໃນການເສີມສ້າງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ລາວ - ຫວຽດນາມ ເວົ້າລວມ, ເວົ້າສະເພາະ ແມ່ນລະຫວ່າງ ແຂວງຈຳປາສັກ ກັບ ນະຄອນດົ່ງນາຍ ໃຫ້ເລິກເຊິ່ງຍິ່ງໆຂຶ້ນ.
(ພາບ-ຂ່າວ: ສົມວິຈິດ ໄຊມົນຕີ)
ຄໍາເຫັນ