ຄະນະຜູ້ແທນສະພາແຫ່ງຊາດລາວ ເຂົ້າຢ້ຽມຂໍ່ານັບປະທານສະພາແຫ່ງຊາດຫວຽດນາມ

(ສພຊ) ໃນໂອກາດເດີນທາງໄປຢ້ຽມຢາມ ແລະ ເຮັດວຽກ ຢູ່ ສສຫວຽດນາມ ໃນວັນທີ 4 ມັງກອນ ຜ່ານມາ, ສະຫາຍ ຈະເລີນ ເຢຍປາວເຮີ ກຳມະການສູນກາງພັກຮອງປະທານສະພາແຫ່ງຊາດປະທານກຳມາທິການກົດໝາຍຫົວໜ້າຄະນະຮັບຜິດຊອບຄົ້ນຄວ້າ ແລະ ຮຽບຮຽງປະຫວັດຄວາມເປັນມາຂອງສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບສະຫາຍ ເວືອງ ດິ່ງ ເຫວ້ກໍາມະການກົມການເມືອງສູນກາງພັກປະທານສະພາແຫ່ງຊາດ ທີ່ຫໍສະພາແຫ່ງຊາດນະຄອນຫຼວງຮ່າໂນ້ຍ.
ປະທານສະພາແຫ່ງຊາດຫວຽດນາມ ສະແດງຄວາມຊົມເຊີຍຕໍ່ການພັດທະນາອັນຈົບງາມໃນການພົວພັນລະຫວ່າງສອງພັກ, ສອງລັດ ແລະ ປະຊາຊົນສອງຊາດ; ຕີລາຄາສູງຕໍ່ຜົນສຳເລັດຂອງກອງປະຊຸມສຸດຍອດລັດຖະສະພາກຳປູເຈຍ-ລາວ-ຫວຽດນາມ (CLV) ຄັ້ງທີ 1 ທີ່ໄດ້ຈັດຂຶ້ນຢູ່ນະຄອນຫຼວງວຽງຈັນໃນຕົ້ນເດືອນທັນວາ 2023 ໂດຍສະພາແຫ່ງຊາດລາວເປັນເຈົ້າພາບ, ພາຍໃຕ້ການເປັນປະທານຮ່ວມຂອງ 3 ປະທານສະພາແຫ່ງຊາດ 3ປະເທດ; ອວຍພອນໃຫ້ຄະນະຜູ້ແທນສະພາແຫ່ງຊາດລາວ ປະສົບຜົນສຳເລັດຫຼາຍດ້ານໃນການຢ້ຽມຢາມຄັ້ງນີ້.
ສະຫາຍ ຈະເລີນ ເຢຍປາວເຮີ ສະແດງຄວາມຂອບໃຈປະທານສະພາແຫ່ງຊາດຫວຽດນາມ ທີ່ໄດ້ເສຍສະຫຼະເວລາອັນມີຄ່າຕ້ອນຮັບແລະ ມີການຕີລາຄາອັນຈົບງາມກ່ຽວກັບສາຍພົວພັນມິດຕະພາບທີ່ມີມູນເຊື້ອອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານລະຫວ່າງ 2 ພັກ 2 ລັດ ແລະ ປະຊາຊົນ 2 ປະເທດ ກໍຄືຜົນສໍາເລັດຂອງກອງປະຊຸມສຸດຍອດລັດຖະສະພາ ກຳປູເຈຍ-ລາວ-ຫວຽດນາມ, ເນັ້ນໜັກວ່າຜົນສຳເລັດຂອງກອງປະຊຸມແມ່ນມີການປະກອບສ່ວນອັນໃຫຍ່ຫຼວງ ແລະ ມີຄຸນຄ່າຈາກສະພາແຫ່ງຊາດຫວຽດນາມ.ໃນໂອກາດນີ້, ຮອງປະທານສະພາແຫ່ງຊາດລາວ ໄດ້ສົ່ງຄຳຢ້ຽມຢາມຖາມຂ່າວ ແລະ ຄໍາອວຍພອນອັນຈົບງາມຂອງປະທານສະພາແຫ່ງຊາດ ສະຫາຍໄຊສົມພອນ ພົມວິຫານ ທີ່ຝາກເຖິງປະທານສະພາແຫ່ງຊາດ ສະຫາຍ ເວືອງ ດິ່ງ ເຫວ້ ແລະ ບັນດາການນຳຂອງສະພາແຫ່ງຊາດຫວຽດນາມ.
ສະຫາຍ ຈະເລີນ ເຢຍປາວເຮີ ລາຍງານໃຫ້ຮູ້ວ່າ: ໃນການຢ້ຽມຢາມຄັ້ງນີ້, ຄະນະຜູ້ແທນສະພາແຫ່ງຊາດລາວ ໄດ້ພົບປະສອງຝ່າຍທີ່ໄດ້ຮັບຜົນສຳເລັດຢ່າງສູງກັບຮອງປະທານສະພາແຫ່ງຊາດ ສະຫາຍ ຫງວຽນ ຄັກ ດິ້ງ, ພົບປະແລກປ່ຽນຢ່າງມີປະສິດທິຜົນກັບສະຫາຍ ບຸ່ຍ ວັນ ເກື່ອງ ເລຂາທິການສະພາແຫ່ງຊາດ ຫົວໜ້າຫ້ອງວ່າການສະພາແຫ່ງຊາດ;ເຮັດວຽກກັບສະຖາບັນຄົ້ນຄວ້ານິຕິບັນຍັດ ເພື່ອແລກປ່ຽນປະສົບການໃນການເຄື່ອນໄຫວວຽກງານ, ພິເສດແມ່ນບົດຮຽນໃນການເຄື່ອນໄຫວນິຕິບັນຍັດ, ຮຽບຮຽງປຶ້ມປະຫວັດສະພາແຫ່ງຊາດ ໃນສະພາບການທີ່ສະພາແຫ່ງຊາດລາວກະກຽມດຳເນີນການປັບປຸງລັດຖະທຳມະນູນປີ 2015 ແລະ ຮຽບຮຽງປຶ້ມປະຫວັດ50 ປີສະພາແຫ່ງຊາດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.
ຜ່ານບັນດາການພົບປະເຮັດວຽກ, ຮອງປະທານສະພາແຫ່ງຊາດລາວ ເນັ້ນໜັກວ່າ ສອງຝ່າຍຢືນຢັນອີກເທື່ອໜຶ່ງວ່າຈະສືບຕໍ່ຮ່ວມກັນປົກປັກຮັກສາ, ເພີ່ມພູນຄູນສ້າງ ແລະ ຊຸກຍູ້ສົ່ງເສີມສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດນາມ-ລາວ. ນີ້ແມ່ນຊັບສິນອັນລ້ຳຄ່າຂອງສອງຊາດອ້າຍນ້ອງທີ່ໄດ້ສ້າງຕັ້ງຂຶ້ນໂດຍປະທານໂຮ່ ຈິ ມິ່ງ, ປະທານໄກສອນ ພົມວິຫານ, ປະທານສຸພານຸວົງ; ໄດ້ຮັບການເພີ່ມພູນຄູນສ້າງ,ປົກປັກຮັກສາ ແລະ ທະນຸຖະໜອມຈາກການນຳຮຸ່ນຕ່າງໆຂອງພັກ, ລັດ ແລະ ປະຊາຊົນສອງປະເທດຕະຫຼອດໄລຍະທີ່ຜ່ານມາ ເພື່ອໃຫ້ສາຍພົວພັນລະຫວ່າງສອງພັກ, ສອງປະເທດ ແລະ ປະຊາຊົນສອງຊາດ “ຂຽວສົດງົດງາມ, ໝັ້ນຄົງຂະໜົງແກ່ນຊົ່ວກາລະນານ”. ໃນໂອກາດນີ້, ສະຫາຍ ຈະເລີນ ເຢຍປາວເຮີ ກໍໄດ້ສະເໜີໃຫ້ສະພາແຫ່ງຊາດລາວ ແລະ ສະພາແຫ່ງຊາດຫວຽດນາມ ຮ່ວມມືກັນຈັດຕັ້ງຮຽບຮຽງປຶ້ມປະຫວັດສາດກ່ຽວກັບການພົວພັນຮ່ວມມືລະຫວ່າງສະພາແຫ່ງຊາດສອງປະເທດ.
ສະຫາຍ ເວືອງ ດິ່ງ ເຫວ້ ກ່າວວ່າ:ສະພາແຫ່ງຊາດ ແລະ ໃນນາມປະທານສະພາແຫ່ງຊາດ ຍາມໃດກໍຕິດຕາມຢ່າງໃກ້ຊິດ, ຕີລາຄາສູງຄວາມພະຍາຍາມ ແລະ ບັນດາຜົນງານຂອງສະພາແຫ່ງຊາດລາວ ທີ່ໄດ້ປະກອບສ່ວນສຳຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ; ຊົມເຊີຍ ສປປລາວ ບັນລຸໄດ້ໝາກຜົນດີຫຼາຍດ້ານໃນການຈັດຕັ້ງປະຕິບັດ 2ວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ.ສະຫາຍຢືນຢັນວ່າ, ສະພາແຫ່ງຊາດຫວຽດນາມ ພ້ອມແລ້ວທີ່ຈະແລກປ່ຽນປະສົບການກັບສະພາແຫ່ງຊາດລາວໃນທຸກຂົງເຂດການຮ່ວມມື;ພິເສດແມ່ນການປັບປຸງລັດຖະທຳມະນູນ, ສ້າງ ແລະ ປັບປຸງລະບົບກົດໝາຍໃຫ້ສົມບູນແບບ, ແລະ ຮຽບຮຽງປຶ້ມປະຫວັດສະພາແຫ່ງຊາດ. ປັດຈຸບັນ, ສະພາແຫ່ງຊາດຫວຽດນາມ ກໍພວມຕັ້ງໜ້າຮຽບຮຽງປຶ້ມ “ປະຫວັດສາດ80 ປີສະພາແຫ່ງຊາດຫວຽດນາມ” ມີຈຸດປະສົງເພື່ອສະເຫຼີມສະຫຼອງຄົບ ຮອບ80 ປີແຫ່ງວັນເລືອກຕັ້ງທົ່ວໄປຄັ້ງທຳອິດເພື່ອເລືອກຕັ້ງສະພາແຫ່ງຊາດຫວຽດນາມ (6/1/1946-6/1/2026)ໃນນັ້ນມີການຈັດຕັ້ງປະຕິບັດໂຄງການຄົ້ນຄວ້າຫົວຂໍ້ວິທະຍາສາດຂັ້ນກະຊວງ ເພື່ອເປັນພື້ນຖານທາງດ້ານວິທະຍາສາດໃຫ້ແກ່ການຮຽບຮຽງປຶ້ມປະຫວັດສາດ 80 ປີຂອງສະພາແຫ່ງຊາດຫວຽດນາມ.
ສະຫາຍ ເວືອງ ດິ່ງ ເຫວະ ສະແດງຄວາມເຫັນດີເປັນເອກະພາບກັບຂໍ້ສະເໜີ ແລະ ຂໍ້ລິເລີ່ມຂອງຮອງປະທານສະພາແຫ່ງຊາດລາວ ກ່ຽວກັບການຮຽບຮຽງປຶ້ມປະຫວັດສາດການພົວພັນລະຫວ່າງສະພາແຫ່ງຊາດສອງປະເທດ ແລະຈະລາຍງານຕໍ່ຄະນະພັກສະພາແຫ່ງຊາດໂດຍໄວກ່ຽວກັບວຽກນີ້,ເຊື່ອໝັ້ນວ່າ ຖ້າປຶ້ມຫົວນີ້ໄດ້ຈັດພິມຈະມີຄວາມໝາຍອັນໃຫຍ່ຫຼວງເນື່ອງໃນໂອກາດສະເຫຼີມສະຫຼອງຄົບຮອບ50 ປີແຫ່ງວັນສ້າງຕັ້ງ ແລະ ການພັດທະນາສະພາແຫ່ງຊາດລາວທັງເປັນປະຫວັດສາດເຄິ່ງສະຕະວັດແຫ່ງການຮ່ວມມືລະຫວ່າງສະພາແຫ່ງຊາດຂອງສອງປະເທດ.
ໂດຍເນັ້ນຢ້ຳວ່າໃນປີ 2024 ສປປລາວຈະຮັບໜ້າທີ່ເປັນປະທານອາຊຽນ ແລະ ປະທານໄອປາ, ປະທານສະ ພາແຫ່ງຊາດຫວຽດນາມຢືນຢັນວ່າ: ຫວຽດນາມ ຍາມໃດກໍສະໜັບສະໜູນ ແລະ ຈະຊ່ວຍເຫຼືອລາວ ໃນການປະຕິບັດໜ້າທີ່ທີ່ສຳຄັນໃຫ້ປະສົບຜົນສໍາເລັດຢ່າງຈົບງາມ;ສະແດງຄວາມຂອບໃຈຢ່າງຈິງໃຈຕໍ່ຄຳຢ້ຽມຢາມຖາມຂ່າວ ແລະ ຄໍາອວຍພອນອັນຈົບງາມຂອງປະທານສະພາແຫ່ງຊາດລາວ, ສະຫາຍ ເວືອງ ດິ່ງ ເຫວະ ໄດ້ຝາກຄຳຢ້ຽມຢາມຖາມຂ່າວ ແລະ ຄຳອວຍພອນອັນຈົບງາມ ໄປຍັງປະທານສະພາແຫ່ງຊາດ ສະຫາຍ  ໄຊສົມພອນ ພົມວິຫານ ແລະ ບັນດາການນຳຂອງສະພາແຫ່ງຊາດລາວ.