ສໍຳລັບຢູ່ນະຄອນຫຼວງວຽງຈັນ, ນອກຈາກມີການບໍລິການນໍ້າມັນເຊື້ອໄຟ ຢູ່ປໍ້າບໍລິການແລ້ວ, ບໍລິສັດ ເອັນທີພີ (NTP) ໄດ້ເລີ່ມບໍລິການນໍ້າມັນເຄື່ອນທີ່ ຢູ່ເຂດເສດຖະກິດບຶງທາດຫຼວງ ເພື່ອອໍານວຍຄວາມສະດວກໃຫ້ແກ່ສັງຄົມ ໃນວັນທີ 18 ມີນາ ຜ່ານມາ, ໂດຍເປີດໃຫ້ບໍລິການຢ່າງເຕັມທີ່ ຕັ້ງແຕ່ເວລາ 8:00 ໂມງເຊົ້າ ຫາ 18:00 ໂມງແລງ ຊຶ່ງທາງບໍລິສັດໄດ້ເປີດກວ້າງໃຫ້ປະຊາຊົນ ສາມາດເຕີມນ້ຳມັນໄດ້ເຕັມຖັງໂດຍບໍ່ຈຳກັດວົງເງິນ ເພື່ອຮັບປະກັນໃຫ້ທຸກຄົນມີນ້ຳມັນພຽງພໍຕໍ່ການເດີນທາງ ແລະ ແກ້ໄຂຄວາມຈຳເປັນໃນຊີວິດປະຈຳວັນ. ແນວໃດກໍຕາມ, ເພື່ອປ້ອງກັນການສວຍໂອກາດກັກຕຸນສິນຄ້າ ແລະ ເພື່ອຮັບປະກັນຄວາມປອດໄພສູງສຸດ, ທາງບໍລິສັດໄດ້ວາງມາດຕະການຢ່າງເຂັ້ມງວດຄື "ຫ້າມຂາຍໃສ່ຕຸກ ຫຼື ພາຊະນະອື່ນໆເດັດຂາດ" ໂດຍຈະເຕີມໃສ່ສະເພາະຖັງນໍ້າມັນຂອງຍານພາຫະນະເທົ່ານັ້ນ.
ໃນວັນທີ 19 ມີນາ ນີ້ ບໍລິສັດດັ່ງກ່າວ ຍັງສືບຕໍ່ໃຫ້ບໍລິການຢູ່ຈຸດເຂດເສດຖະກິດພິເສດບຶງທາດຫຼວງ ນັບແຕ່ເວລາ 8:00 ໂມງເຊົ້າ ຫາ 18:00 ໂມງແລງ ໂດຍແຍກຈຸດຈ່າຍນໍ້າມັນ ເປັນ 4 ຈຸດ ຄື: ນໍ້າມັນກາຊວນ 2 ຈຸດ ແລະ ນໍ້າມັນແອັດຊັງ 2 ຈຸດ (ສໍາລັບລົດຈັກ 1 ຈຸດ ແລະ ລົດໃຫຍ່ 1 ຈຸດ).
ສະນັ້ນ, ຂໍແນະນຳມາຍັງພໍແມ່ປະຊາຊົນ ຜູ້ທີ່ມີຈຸດປະສົງ ຢາກເຕີມນໍ້າມັນເຊື້ອໄຟພາຫະນະຂອງທ່ານ ແມ່ນສາມາດເຂົ້າໄປໃຊ້ບໍລິການ ຢູ່ສະຖານທີ່ດັ່ງກ່າວ ຕາມເວລາທີ່ກຳນົດໄດ້.
ຄໍາເຫັນ