 |
ບົດລາຍງານການເມືອງຂອງ ຄະນະບໍລິຫານງານພັກແຂວງ ສະໄໝທີ X ຕໍ່ກອງປະຊຸມໃຫຍ່ຜູ້ແທນອົງຄະນະພັກແຂວງຄໍາມ່ວນ ຄັ້ງທີ XI ໂດຍ ສະຫາຍ ວັນໄຊ ພອງສະຫວັນ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຄໍາມ່ວນ ຂຶ້ນລາຍງານ ໄດ້ໃຫ້ຮູ້ວ່າ: ທ່າມກາງສະພາບຄວາມຫຍຸ້ງຍາກ, ແຂວງຄໍາມ່ວນ ໄດ້ສຸມໃສ່ນໍາພາຈັດຕັ້ງປະຕິບັດເຜີຍແຜ່ເຊື່ອມຊຶມ ມະຕິກອງປະຊຸມໃຫຍ່ຜູ້ແທນຄັ້ງທີ X ຂອງອົງຄະນະພັກແຂວງຄໍາມ່ວນ ແລະ ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ແລະ ມະຕິ, ຄໍາສັ່ງຕ່າງໆຂອງພັກ-ລັດ ຢ່າງກວ້າງຂວາງ, ສ້າງເປັນໂຄງການດຳເນີນງານ ໂດຍກຳນົດເປັນ 6 ເປົ້າໝາຍ 25 ແຜນງານ 699 ໂຄງການ; ໄດ້ພ້ອມກັນຈັດຕັ້ງປະຕິບັດ ແທດເໝາະກັບສະພາບຕົວຈິງ ແລະ ມີຜົນສຳເລັດຫຼາຍແຜນງານ, ໂຄງການທີ່ກໍານົດໄວ້.
ຜົນສຳເລັດ ແລະ ອັນພົ້ນເດັ່ນມີຫຼາຍດ້ານ ເປັນຕົ້ນດ້ານວຽກງານປ້ອງກັນຊາດ-ປ້ອງກັນຄວາມສະຫງົບ ໄດ້ນໍໍາພາ-ຊີ້ນໍາ ຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານຂອງກະຊວງປ້ອງກັນປະເທດ ແລະ 4 ຄາດໝາຍ 4 ແຜນງານໃຫຍ່ 41 ໂຄງການຂອງກະຊວງປ້ອງກັນຄວາມສະຫງົບ ຢ່າງແຂງແຮງ; ຈັດຕັ້ງວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຢ່າງເປັນເຈົ້າການ; ຫັນເອົານາຍທະຫານ-ນາຍຕໍາຫຼວດ ລົງກໍ່ສ້າງຮາກຖານການເມືອງ ນໍາພາກໍ່ສ້າງປັບປຸງກຳລັງ ໃຫ້ໜັກແໜ້ນເຂັ້ມແຂງ, ສ້າງບ້ານປ້ອມໝັ້ນ-ກຸ່ມບ້ານສູ້ຮົບຕິດລຽນ, ສ້າງບ້ານ-ຄອບຄົວປ້ອງກັນຊາດເຂັ້ມແຂງ ແລະ ສ້າງບ້ານ-ຄອບຄົວ ປ້ອງກັນຄວາມສະຫງົບດີເພີ່ມຂຶ້ນ; ເປັນເຈົ້າການສະກັດກັ້ນ-ທັບມ້າງກົນອຸບາຍຫັນປ່ຽນໂດຍສັນຕິຂອງສັດຕູ, ກຸ່ມຄົນບໍ່ດີ ແລະ ແກ້ໄຂປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນສັງຄົມຢ່າງຕັ້ງໜ້າ ເຮັດໃຫ້ແຂວງຄໍາມ່ວນ ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ, ຄວາມປອດໄພ ແລະ ເປັນລະບຽບຮຽບຮ້ອຍ ໂດຍພື້ນຖານ.
ຂະນະທີ່ດ້ານເສດຖະກິດ ກໍມີການຂະຫຍາຍຕົວຢ່າງຕໍ່ເນື່ອງ ຊຶ່ງເສດຖະກິດຂອງແຂວງຄໍາມ່ວນ ຂະຫຍາຍຕົວໃນລະດັບ 6.2% ລວມຍອດຜະລິດຕະພັນພາຍໃນບັນລຸໄດ້ 96,119 ຕື້ກີບ, ລາຍຮັບສະເລ່ຍຕໍ່ຫົວຄົນ ເພີ່ມຂຶ້ນເປັນ 2,701 ໂດລາ/ຄົນ/ປີ; ໄດ້ປັບປຸງລະບອບ ລະບຽບການ ກົນໄກການຄຸ້ມຄອງ, ຕັ້ງໜ້າແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ໄດ້ເອົາໃຈໃສ່ລະດົມທຶນເພື່ອການພັດທະນາຢ່າງແຂງແຮງ, ຕິດຕາມ, ກວດກາ ປະເມີນການຈັດຕັ້ງປະຕິບັດບັນດາໂຄງການລົງທຶນຕ່າງໆ ເປັນປົກກະຕິ, ລຶບລ້າງໂຄງການທີ່ບໍ່ມີປະສິດທິຜົນ; ປະຕິບັດວິໄນແຜນການ-ການເງິນຢ່າງເຂັ້ມງວດ, ສ້າງຖານລາຍຮັບໃໝ່ທີ່ໝັ້ນຄົງ, ນໍາໃຊ້ເຄື່ອງມືທັນສະໄໝ, ເພີ່ມທະວີຄວາມເຂັ້ມງວດ, ອັດການຮົ່ວໄຫຼ ເຮັດໃຫ້ການຈັດເກັບລາຍຮັບເຂົ້າງົບປະມານໄດ້ເກີນແຜນຢ່າງຕໍ່ເນື່ອງ ກາຍເປັນແຂວງເກີນດູນ.
ນອກນີ້, ໃນດ້ານວັດທະນະທໍາ-ສັງຄົມ ກໍໄດ້ມີການພັດທະນາຢ່າງກວ້າງຂວາງ ເປັນຕົ້ນ ສຶກສາທິການ ແລະ ກິລາ ບັນລຸ 9 ຄາດໝາຍ; ສາທາລະນະສຸກ ບັນລຸ 9 ຄາໝາຍ ແລະ ອີກ 2 ຄາດໝາຍ ມີທ່າອ່ຽງດີຂຶ້ນ, ໄດ້ຂະຫຍາຍຫ້ອງຜ່າຕັດຢູ່ໂຮງໝໍເມືອງຈໍານວນໜຶ່ງ ສຸມໃສ່ວຽກໂຄສະນາສຸຂະອານາໄມ, ການປ້ອງກັນພະຍາດ ແລະ ຕອບໂຕ້ພະຍາດໂຄວິດ-19 ໄດ້ເປັນຢ່າງດີ.... ວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ແກ້ໄຂຄວາມທຸກຍາກ ກໍມີອັນພົ້ນເດັ່ນ ກໍຄືການສ້າງຕົວແບບພັດທະນາຊົນນະບົດ ແລະ ແກ້ໄຂຄວາມທຸກຍາກ ຢູ່ບ້ານຊຽງແຫວນ ເມືອງທ່າແຂກ, ບ້ານ-ຄອບຄົວພັດທະນາ ແລະ ບ້ານ-ຄອບຄົວພົ້ນທຸກໄດ້ເພີ່ມຂຶ້ນ, ປະກາດເມືອງພົ້ນທຸກໄດ້ 7 ເມືອງ ແລະ ປະກາດເມືອງທ່າແຂກ ເປັນເມືອງເຂັ້ມແຂງຮອບດ້ານ. ພ້ອມນີ້, ກໍໄດ້ຮັບຮອງການສ້າງຄອບຄົວ ແລະ ບ້ານສາມັກຄີປອງດອງສຳເລັດ 10 ເມືອງ ໃນທົ່ວແຂວງ.
ບັນດາຜົນສຳເລັດ ແລະ ອັນພົ້ນເດັ່ນຂ້າງເທິງ ແມ່ນບາງສ່ວນຈາກຜົນງານຂອງການນໍາພາ-ຊີ້ນໍາ ຂອງອົງຄະນະພັກແຂວງຄໍາມ່ວນ ໃນຕະຫຼອດ 5 ປີ ຊຶ່ງສັງລວມແລ້ວ ແຂວງຄໍາມ່ວນ ແມ່ນມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເສດຖະກິດ-ສັງຄົມ ໄດ້ຮັບການພັດທະນາດີຂຶ້ນເປັນກ້າວໆ, ຄວາມທຸກຍາກຂອງປະຊາຊົນ ໄດ້ຮັບການແກ້ໄຂຢ່າງຕັ້ງໜ້າ. ຜົນສຳເລັດດັ່ງກ່າວ, ເປັນການຢັ້ງຢືນໃຫ້ເຫັນເຖິງຄວາມເປັນເຈົ້າການ ແລະ ຄວາມຮັບຜິດຊອບຕໍ່ໜ້າທີ່ການເມືອງຂອງຄະນະພັກ-ອົງການປົກຄອງແຕ່ລະຂັ້ນ ສະມາຊິກພັກ, ພະນັກງານ-ລັດຖະກອນ, ກຳລັງປະກອບອາວຸດ ແລະ ການປະກອບສ່ວນຢ່າງຕັ້ງໜ້າຂອງທຸກຊັ້ນຄົນ ແລະ ປະຊາຊົນບັນດາເຜົ່າໃນທົ່ວແຂວງຄໍາມ່ວນ ແລະ ໄດ້ຮັບການຊີ້ນໍາຢ່າງໃກ້ຊິດຈາກສູນກາງພັກ ແລະ ລັດຖະບານ.
ຄໍາເຫັນ