ແຂວງໄຊສົມບູນ ສະເຫຼີມສະຫຼອງ ຫໍຫຼັກເມືອງ 

ແຂວງໄຊສົມບູນ ຈັດພິທີສະເຫຼີມສະຫຼອງ ຫໍຫຼັກເມືອງ ປີທີ 2 ໃນວັນທີ 10 ມັງກອນ ນີ້ ຢູ່ຫໍຫຼັກເມືອງ ເມືອງອະນຸວົງ ໂດຍມີ ພະອາຈານໃຫຍ່ ຖາວອນ ຕາພອນປະເສີດ ຜູ້ຊ່ວຍປະທານສົງ ເຂດ 6 ແຂວງພາກກາງ, ທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ, ມີຄະນະສົງຈາກ ອົງການພຸດທະສາສະໜາສຳພັນລາວ ຂັ້ນສູນກາງ ພ້ອມດ້ວຍຄະນະສົງ ອົງການພຸດທະສາສະໜາສຳພັນລາວ,  ປະຊາຊົນບັນດາເຜົ່າ ເຂົ້າຮ່ວມ.
ການສະເຫຼີມສະຫຼອງ ຫໍຫຼັກເມືອງຄັ້ງນີ້, ກໍເພື່ອເປັນສີລິມຸງຄຸນ, ເປັນສູນລວມທາງດ້ານຈິດໃຈ ຂອງປະຊາຊົນ ແຂວງໄຊສົມບູນ, ເປັນການຮັກສາມູນເຊື້ອວັດທະນະທຳ, ຮີດຄອງປະເພນີອັນດີງາມຂອງຊາດ, ຂອງເຜົ່າ, ທັງເປັນສັນຍາລັກແຫ່ງການພັດທະນາ, ເປັນບ່ອນເຕົ້າໂຮມຄວາມສາມັກຄີ ແລະ ເປັນສະຖານທີ່ສັກສິດປະຈຳແຂວງ, ເປັນບ່ອນກາບໄຫວ້ບູຊາ ຂອງແຂກຄົນທີ່ເດີນທາງເຂົ້າມາທ່ຽວຊົມ ແຂວງໄຊສົມບູນ ແລະ ຍັງເປັນສະຖານທີ່ທ່ອງທ່ຽວ ທາງດ້ານວັດທະນະທຳ ຂອງແຂວງນຳອີກ. 
ຫໍຫຼັກເມືອງແຫ່ງນີ້, ຍັງໄດ້ຢັ້ງຢືນເຖິງແນວທາງອັນຖືກຕ້ອງຂອງພັກ ແລະ ລັດຖະບານ ໃນການສືບທອດມູນເຊື້ອອັນດີງາມກໍຄືການສົ່ງເສີມສິລະປະວັດທະນະທໍາ ທີ່ເປັນເອກະລັກຂອງຊາດ ແລະ ຍັງເປັນສັນຍາລັກແຫ່ງຄວາມສາມັກຄີປອງດອງ ຂອງປະຊາຊົນແຂວງໄຊສົມບູນ, ຫໍຫຼັກເມືອງແຫ່ງນີ້ ໄດ້ກາຍເປັນສັນຍາລັກ ແຫ່ງຍຸກສະໄໝຂອງຄວາມຈະເລີນສີວິໄລ ພາຍໃຕ້ແສງສະຫວ່າງແຫ່ງການນໍາພາຂອງພັກປະຊາຊົນ ປະຕິວັດລາວ. ສະນັ້ນ ຈົ່ງພ້ອມກັນເອົາໃຈໃສ່ປົກປັກຮັກສາຫໍຫຼັກເມືອງ ໃຫ້ມີຄວາມໂດດເດັ່ນ, ສວຍງາມ ແລະ ໝັ້ນຄົງຂະໜົງແກ່ນ ຢູ່ຄຽງຄູ່ກັບແຂວງໄຊສົມບູນ ຕະຫຼອດໄປ.  
(ຂ່າວ-ພາບ: ສີລິພອນ ສົງຄຳ)