ທ່ານນາງ ອຳໄພວັນ ແກ້ວປະດິດຮອງຫົວໜ້າກົມຂົນສົ່ງ ກະຊວງໂຍທາທິການ ແລະ ຂົນສົ່ງ (ຍທຂ) ໄດ້ກ່າວມີຄຳເຫັນກ່ຽວກັບນະໂຍບາຍໃນການສ້າງໂຄງການຂົນສົ່ງແບບຍືນຍົງໃນຕົວເມືອງ ນວ ກໍຄືແຜນການສະໜອງລົດເມດ່ວນ BRT ວ່າ: ລົດເມດ່ວນ BRTແມ່ນໜຶ່ງໃນປະເພດລົດຂົນສົ່ງໂດຍສານທີ່ຈະແລ່ນໃຫ້ບໍລິການມວນຊົນໃນ ນວ ເພີ່ມຕື່ມຈາກຈຳນວນລົດເມທີ່ພວກເຮົາມີໃນປັດຈຸບັນທັງໝົດ 13 ສາຍທາງແລ່ນອ້ອມຮອບຕົວເມືອງຄື: ອອກຈາກສະຖານີລົດເມໄປຫາຂົວມິດຕະພາບ, ດົງຄຳຊ້າງ, ທ່າງ່ອນ, ດົງໂດກ,ທົ່ງປົ່ງ, ໄອເຕັກ-ດົງໂດກ, ດອນປ່າໃໝ່, ໜອງທາ-ດົງໂດກ, ໜອງແຕ່ງ, ສະຖານີລົດໂດຍສານສາຍເໜືອ, ນໍ້າຊວງ, ໃນຕົວເມືອງ-ແຄມຂອງ, ເພຍລາດຊຶ່ງສະເລ່ຍມີຜູ້ໂດຍສານຊົມໃຊ້ລົດເມສາທາລະນະປະມານ1.000-2.000 ເທື່ອຄົນ/ມື້ແຕ່ເຫັນວ່າຍັງບໍ່ພຽງພໍກັບຄວາມຕ້ອງການໃນການເດີນທາງຂອງປະຊາຊົນໃນ ນວ, ເນື່ອງຈາກອັດຕາການນໍາໃຊ້ລົດສ່ວນຕົວໃນການເດີນທາງຍັງນັບມື້ຍັງສູງຂຶ້ນເລື້ອຍໆ.
ປັດຈຸບັນຕາມສະຖິຕິການຂຶ້ນທະບຽນຍານພາຫະນະທາງບົກທົ່ວປະເທດໃນປີ 2023ມີຍານພາຫະນະຂຶ້ນທະບຽນທັງໝົດ 2.705.538 ຄັນ, 43% ແມ່ນຍານພາຫະນະຂຶ້ນທະບຽນໃນ ນວ.ໃນນີ້, ມີລົດຈັກສອງລໍ້ກວມເອົາ67%, ລົດກະບະ 14%, ລົດເກັງ 6% ແລະອື່ນໆ 13%, ຖ້າທຽບໃສ່ອັດຕາການເຕີບໂຕຂອງປະຊາກອນເຫັນວ່າອັດຕາການຂຶ້ນທະບຽນຂອງຍານພາຫະນະໃນ ນວເກີນຈໍານວນປະຊາກອນ. ສະນັ້ນ,ບັນຫາການນໍາໃຊ້ຍານພາຫະນະໃນຕົວເມືອງຈຳນວນຫຼາຍຈຶ່ງມີຜົນກະທົບອັນໃຫຍ່ຫຼວງຕໍ່ສັງຄົມເປັນຕົ້ນສະພາບການສັນຈອນແອອັດຕາມເສັ້ນທາງ 3 ແຍກ, 4 ແຍກໃນຕົວເມືອງ, ຕອນເຊົ້າ-ຕອນແລງໃນຊົ່ວໂມງເລັ່ງດ່ວນ, ສ້າງມົນລະພິດທາງອາກາດແລະທາງສຽງເພີ່ມຂຶ້ນເຮັດໃຫ້ຄົນເຈັບປວຍໄດ້ງ່າຍ. ນອກນັ້ນ, ອັດຕາການເກີດອຸບັດເຫດທາງຖະໜົນຍັງສູງ ເຫັນວ່າໃນປີ 2023 ທົ່ວປະເທດມີອຸບັດເຫດເກີດຂຶ້ນ 6.806 ກໍລະນີກວມເອົາ 17,4%.
ທ່ານນາງ ອຳໄພວັນ ແກ້ວປະດິດ ໃຫ້ຮູ້ຕື່ມວ່າ: ໃນໄລຍະຜ່ານມາພວກເຮົາມີນິຕິກຳແລະລະບຽບການຕ່າງໆເພື່ອຫຼຸດຜ່ອນບັນຫາແຕ່ຍັງບໍ່ສາມາດແກ້ໄດ້ໝົດເຊັ່ນ: ສ້າງຍຸດທະສາດຄວາມປອດໄພທາງຖະໜົນກຳນົດໃນປີ 2030ໃຫ້ອັດຕາການເສຍຊີວິດຈາກອຸບັດເຫດຕາມຖະໜົນຫຼຸດລົງ 50% ເພື່ອຮັກສາຊີວິດແລະຊັບສິນຂອງປະຊາຊົນເພື່ອຕອບສະໜອງກັບຄວາມຮຽກຮ້ອງຕ້ອງການຂອງສັງຄົມໃນການແກ້ໄຂບັນຫາລົດແອອັດໃນຕົວເມືອງ, ການຈອດລົດຊະຊາຍແລະການຫຼຸດຜ່ອນມົນລະພິດຈາກຍານພາຫະນະ. ໃນນັ້ນ, ລັດຖະບານກໍຄືການນໍາກະຊວງຍທຂແລະການນໍານວໄດ້ຂົນຂວາຍແຫຼ່ງທຶນຫຼາຍແຫຼ່ງມາຈັດຕັ້ງປະຕິບັດໂຄງການດັ່ງກ່າວເຊັ່ນ:ADB, EIB, OPEC ລວມທັງງົບປະມານຂອງລັດຖະບານ ແລະ ອື່ນໆ ລວມມູນຄ່າເບື້ອງຕົ້ນ 99 ລ້ານໂດລາເພື່ອປັບປຸງລະບົບການຂົນສົ່ງມວນຊົນໃນຕົວເມືອງວຽງຈັນໃຫ້ໄດ້ມາດຕະຖານສາກົນຊຶ່ງນໍາໃຊ້ລົດເມໄຟຟ້າໃຫ້ມີຄວາມສະດວກ, ສະບາຍ, ສະອາດ-ສວຍງາມແລະປອດໄພໃຫ້ປະຊາຊົນໄດ້ຊົມໃຊ້.ຄຽງຄູ່ກັນນັ້ນ, ໄດ້ປັບປຸງເສັ້ນທາງຊອຍເພື່ອອໍານວຍຄວາມສະດວກໃຫ້ກັບຜູ້ຄົນສາມາດຍ່າງໄປມາໄດ້ສະດວກແລະປອດໄພ, ປັບປຸງເສັ້ນທາງບາງເສັ້ນສໍາລັບລົດຖີບ ແລະ ປັບປຸງລະບົບການຈອດລົດແຄມທາງ ພ້ອມເຊື່ອໝັ້ນວ່າພາຍຫຼັງໂຄງການດັ່ງກ່າວສໍາເລັດ ນວ ຈະມີໃບໜ້າໃໝ່ກ່ຽວກັບການຈະລາຈອນທາງບົກດີຂຶ້ນ.
ທ່ານນາງ ອຳໄພວັນ ແກ້ວປະດິດຮຽກຮ້ອງມາຍັງທຸກຄົນໃນສັງຄົມ ຈົ່ງຮ່ວມຈິດຮ່ວມໃຈກັນຫັນມານໍາໃຊ້ລົດເມສາທາລະນະໃນ ນວ ໃຫ້ຫຼາຍຂຶ້ນເພື່ອຫຼຸດຜ່ອນການນໍາໃຊ້ລົດສ່ວນຕົວແລະເພີ່ມການນໍາໃຊ້ລົດຖີບໃນເຂດຊຸມຊົນເພື່ອໃຫ້ຕົວເມືອງຂອງເຮົາກາຍເປັນຕົວເມືອງທີ່ໜ້າຢູ່ ແລະມີຊິວິດຊີວາເຕັມໄປດ້ວຍຜູ້ຄົນອອກມາພັກຜ່ອນທ່ຽວຊົມ.
ຄໍາເຫັນ