 |
ໃນໄລຍະ 7 ເດືອນຜ່ານມາ, ຄະນະສະເພາະກິດຂັ້ນແຂວງ ໄດ້ສຸມໃສ່ປະສານສົມທົບກັບ ບັນດາພະແນກການອ້ອມຂ້າງແຂວງ, ເມືອງ ແລະ ນະຄອນ ຈັດຕັ້ງປະຕິບັດບັນດາວຽກຈຸດສຸມ ແລະ ແກ້ໄຂບັນດາບັນຫາເຄັ່ງຮ້ອນ ຢູ່ພາຍໃນແຂວງຢ່າງຕັ້ງໜ້າ ເຮັດໃຫ້ເສດຖະກິດຂອງແຂວງ ຂະຫຍາຍຕົວຢ່າງຕໍ່ເນື່ອງ ມາຮອດວັນທີ 12 ສີງຫາ 2025 ສາມາດຈັດເກັບລາຍຮັບທັງໝົດ 1,108 ຕື້ກວ່າກີບ ເທົ່າກັບ 92.20% ຂອງແຜນປີ, ຕົວເລກນັກທ່ອງທ່ຽວພາຍໃນ 7 ເດືອນຕົ້ນປີ 2025 ມີນັກທ່ອງທ່ຽວທັງໝົດ 2,155,994 ເທື່ອຄົນ ທຽບໃສ່ໄລຍະດຽວກັນ ຂອງປີຜ່ານມາ ເພີ່ມຂຶ້ນ 983,483 ເທື່ອຄົນ ເທົ່າກັບ 83.8%, ນອກນັ້ນ, ໄດ້ສຸມໃສ່ແກ້ໄຂບັນດາໂຄງ ການຂຸດຄົ້ນບໍ່ແຮ່ ຕາມການຊີ້ນໍາ ຂອງລັດຖະບານ. ສຳລັບແຜນການ 5 ເດືອນທ້າຍປີ 2025, ຄະນະສະເພາະກິດຂັ້ນແຂວງ ຈະໄດ້ສຸມໃສ່ຊຸກຍູ້ການແກ້ໄຂ ສ້ອມແປງຮີບດ່ວນ ເປັນຕົ້ນ ການແກ້ໄຂບັນຫາເສັ້ນທາງເປ່ເພ ພາຍໃນ ນະຄອນ-ຫຼວງພະບາງ ເມືອງມໍລະດົກໂລກ, ເພື່ອກະກຽມຮອງຮັບລະດູການທ່ອງທ່ຽວທີ່ຈະມາເຖິງ ແລະ ຕ້ອນຮັບການ ສະເຫຼີມສະຫຼອງ ມໍລະດົກໂລກ ຄົບຮອບ 30 ປີ ແລະ ວັນສຳຄັນຂອງຊາດ; ພ້ອມທັງເປີດຂະບວນການເດີນສຳຫຼວດຖານ ຂໍ້ມູນລາຍຮັບຢູ່ນະຄອນ-ຫຼວງພະບາງ ແລະ ເມືອງນ້ຳບາກ; ເຮັດໃຫ້ການຈັດຕັ້ງປະຕິບັດແຜນຈັດເກັບລາຍຮັບງົບປະມານແຫ່ງລັດ ປະຈຳປີ 2025 ບັນລຸໄດ້ຕາມແຜນການ ຫຼື ລື່ນແຜນ ການ; ສືບຕໍ່ຕິດຕາມ, ຊຸກຍູ້ການຈັດຕັ້ງ ປະຕິບັດ ບົດບັນທຶກການຮ່ວມມື ລະຫວ່າງບັນດາຂະແໜງການອ້ອມຂ້າງແຂວງ ກ່ຽວກັບ ວຽກງານຄຸ້ມຄອງຈັດເກັບ ລາຍຮັບງົບປະມານ ແລະ ສຸມໃສ່ແກ້ໄຂ ປະກົດການຫຍໍ້ທໍ້ທາງດ້ານ ເສດຖະກິດ-ສັງຄົມພາຍໃນແຂວງ ເປັນຕົ້ນ ສະກັດກັ້ນ ແລະ ແກ້ໄຂບັນຫາລົດເຖື່ອນ, ການຄ້ານອກລະບົບ, ການລັກລອບຂຸດຄົ້ນ ແຮ່ທາດ ແລະ ບັນຫາຊັບພະຍາກອນປ່າໄມ້ ໃນທົ່ວແຂວງ.
(ແຫຼ່ງຂ່າວ: ຫຼວງພະບາງ)
ຄໍາເຫັນ