 |
ທ່ານ ພອນໄຊ ສີສະແຫວງສຸກ ຫົວໜ້າຫ້ອງການອຸດສາຫະກຳ ແລະ ການຄ້າ ເມືອງໄຊເສດຖາ ເປີດເຜີຍຕໍ່ສື່ມວນຊົນເມື່ອ 23 ກໍລະກົດ 2026 ນີ້ວ່າ: ໃນໄລຍະ 6 ເດືອນຕົ້ນປີນີ້, ເມືອງໄຊເສດຖາ ມີມູນຄ່າການສົ່ງອອກ14.9 ຕື້ກີບ (ປະລິມານ 221,024 ໂຕນ/ແມັດກ້ອນ) ໂດຍມີ ສສ ຫວຽດນາມ ເປັນຕະຫຼາດຫຼັກ, ສິນຄ້າສົ່ງອອກຕົ້ນຕໍ ແມ່ນ ຜະລິດຕະພັນໄມ້, ເຄື່ອງປ່າຂອງດົງ ມີ: ໝາກຈອງ, ຂີ້ຊີ, ສ່ວນແຮ່ທາດ ມີ: ຫີນກາວແລັງ, ຫີນປາໂກໄດ.
ໃນຂະນະທີ່ ການປົກປ້ອງຜູ້ຊົມໃຊ້ ໄດ້ລົງກວດກາມາດຕະຖານຊິງຊັ່ງ, ປ້ຳນ້ຳມັນ ແລະ ກວດກາສິນຄ້າໝົດອາຍຸ-ນອກລະບົບ ບັນລຸໄດ້ 100% ຂອງແຜນການ, ພ້ອມທັງຄຸ້ມຄອງລາຄາສິນຄ້າອຸປະໂພກ-ບໍລິໂພກ ໃຫ້ຢູ່ໃນເກນປົກກະຕິ ເຊັ່ນ: ຊີ້ນໝູໜ້າຟາມ 50,000 ກີບ/ກິໂລ ແລະ ລາຄາຢູ່ຕະຫຼາດ 85,000 ກີບ/ກິໂລ, ການສົ່ງເສີມ 1 ບ້ານ 1 ຜະລິດຕະພັນ (ODOP) ສາມາດຍົກລະດັບພູມປັນຍາທ້ອງຖິ່ນເປັນສິນຄ້າ, ໂດຍມີ 3 ຜະລິດຕະພັນໄດ້ຮັບຮອງເປັນສິນຄ້າໂອດັອບແລ້ວ ໄດ້ແກ່: ເຫຼົ້າຂາວບ້ານຊ້າຍ, ເຫຼົ້າດອງໂສມ ເອີເລີຊາ ແລະ ໝາກພິກໄທ, ພ້ອມນີ້ ກໍກຳລັງສືບຕໍ່ປັບປຸງອີກ 6 ຜະລິດຕະພັນ ເພື່ອກ້າວໄປສູ່ການສົ່ງອອກ.
ສ່ວນວຽກງານພະລັງງານ ແລະ ບໍ່ແຮ່, ໄດ້ເພີ່ມມາດຕະການສະກັດກັ້ນການລັກລອບຂຸດຄົ້ນແຮ່ທາດຢ່າງເດັດຂາດ, ສາມາດກັກໂຕ ແລະ ສຶກສາອົບຮົມຜູ້ກະທຳຜິດໄດ້ຫຼາຍກວ່າ 70 ຄົນ ພ້ອມຍຶດຂອງກາງຈໍານວນໜຶ່ງ.
ທ່ານ ພອນໄຊ ສີສະແຫວງສຸກ ກ່າວອີກວ່າ: ເຖິງແມ່ນວ່າຈະມີຜົນສຳເລັດຫຼາຍດ້ານ ແຕ່ກໍເຫັນວ່າ ຍັງມີຂໍ້ຫຍຸ້ງຍາກທີ່ພົບເຫັນ ເປັນຕົ້ນແມ່ນ ການຄຸ້ມຄອງລາຄາສິນຄ້າ ແລະ ຄ່າບໍລິການຍັງມີຄວາມທ້າທາຍ ຍ້ອນຜົນກະທົບຈາກເສດຖະກິດມະຫາພາກ, ບັນຫາການລັກລອບຂຸດຄົ້ນແຮ່ທາດຍັງມີລັກສະນະຊ້ຳເຮື້ອ, ນອກຈາກນີ້ ຍັງມີຫົວໜ່ວຍທຸລະກິດນອກລະບົບ ບໍ່ມີທະບຽນວິສາຫະກິດ ເຖິງ 391 ຫົວໜ່ວຍ.
ເພື່ອແກ້ໄຂບັນຫາດັ່ງກ່າວ, ຫ້ອງການອຸດສາຫະກຳແລະການຄ້າຈະເພີ່ມທະວີການປະສານງານກັບອົງການປົກຄອງເມືອງ ແລະ ແຂວງ ເພື່ອປັກຫຼັກໝາຍເຂດສຳຫຼວດແຮ່ທາດໃຫ້ຈະແຈ້ງ, ດຳເນີນມາດຕະການທາງກົດໝາຍຢ່າງເຄັ່ງຄັດ, ພ້ອມທັງລົງຕິດແທດ, ອຳນວຍຄວາມສະດວກ ແລະ ສຶກສາອົບຮົມໃຫ້ຜູ້ປະກອບການນອກລະບົບ ເຂົ້າມາຈົດທະບຽນໃຫ້ຖືກຕ້ອງ.
ສຳລັບແຜນການ 6 ເດືອນທ້າຍປີ 2026 ນີ້, ເມືອງໄຊເສດຖາ ໄດ້ຕັ້ງເປົ້າໝາຍຊຸກຍູ້ທຸລະກິດໃໝ່ໃຫ້ຂຶ້ນທະບຽນຕື່ມອີກຢ່າງໜ້ອຍ 25 ຫົວໜ່ວຍ, ອອກໃບອະນຸຍາດ ແລະ ຕິດຕາມການຜະລິດໂຮງງານຂະໜາດນ້ອຍ, ເລັ່ງຂະຫຍາຍໂຄງການ ODOP ໃຫ້ກວມທັງ 22 ບ້ານ. ນອກຈາກນີ້ ຍັງຈະຕິດຕາມການກໍ່ສ້າງຕາຂ່າຍໄຟຟ້າຢູ່ເຂດການຜະລິດກະສິກຳບ້ານໂພໄຊ, ບໍ່ຄຳບ້ານນ້ຳຊວນ, ເກັບກູ້ໜີ້ສິນຄ່າໄຟຟ້າ ແລະ ສະກັດກັ້ນການລັກລອບຂຸດຄົ້ນແຮ່ທາດຢ່າງຕໍ່ເນື່ອງ.
ທ່ານ ພອນໄຊ ສີສະແຫວງສຸກໄດ້ຮຽກຮ້ອງມາຍັງພາກສ່ວນຕ່າງໆ ຮ່ວມກັນສ້າງສາແລະພັດທະນາເສດຖະກິດຂອງເມືອງໄຊເສດຖາໃຫ້ເຂັ້ມແຂງ ແລະ ຍືນຍົງ ໂດຍພ້ອມກັນນຳເອົາທຸລະກິດເຂົ້າສູ່ລະບົບ, ພ້ອມທັງຮຽກຮ້ອງໃຫ້ຜູ້ປະກອບການ 391 ຫົວໜ່ວຍທີ່ຍັງຢູ່ນອກລະບົບ ຮີບຮ້ອນມາຂຶ້ນທະບຽນວິສາຫະກິດໃຫ້ຖືກຕ້ອງຕາມກົດໝາຍ ເພື່ອຮັບປະກັນສິດທິປະໂຫຍດ ແລະ ການເຂົ້າເຖິງການສະໜັບສະໜູນຈາກພາກລັດ;ສົ່ງເສີມໃຫ້ຜູ້ປະກອບການຂະໜາດນ້ອຍ ແລະ ຄອບຄົວ ຫັນເອົາທ່າແຮງທາງດ້ານກະສິກຳ ແລະ ພູມປັນຍາ ເຂົ້າຮ່ວມໂຄງການ 1 ບ້ານ 1 ຜະລິດຕະພັນ, ໂດຍພາກລັດພ້ອມສະໜັບສະໜູນດ້ານວິຊາການ, ທຶນຮອນ ແລະ ຕະຫຼາດ; ຂໍໃຫ້ຊາວຄ້າຂາຍ ແລະ ປ້ຳນ້ຳມັນ ປະຕິບັດຕາມມາດຕະຖານການຊັ່ງ-ຕວງ-ວັດ, ບໍ່ສວຍໂອກາດກັກຕຸນ ຫຼື ຂຶ້ນລາຄາສິນຄ້າແລະ ໃຫ້ຢຸດຕິການນຳເຂົ້າສິນຄ້າທີ່ບໍ່ໄດ້ມາດຕະຖານ.
ດ້ວຍທ່າແຮງຂອງເສັ້ນທາງຫຼວງ 18B ເຊື່ອມຕໍ່ໃສ່ ສສ ຫວຽດນາມ, ເມືອງໄຊເສດຖາ ພ້ອມອຳນວຍຄວາມສະດວກຢ່າງເຕັມທີ່ ໃຫ້ນັກລົງທຶນທີ່ສົນໃຈເຂົ້າມາຕັ້ງໂຮງງານປຸງແຕ່ງ ແລະ ອຸດສາຫະກຳບໍລິການ ບົນພື້ນຖານຄວາມຖືກຕ້ອງ ແລະ ເປັນມິດກັບສິ່ງແວດລ້ອມ.
ຂ່າວ: ຫັດສະດີສຸດທິວົງ
ຄໍາເຫັນ