ທ່ານ ພູວົງ ບຸນຊູ ປະທານຄະນະກຳມະການປົກຄອງແຂວງ ຂຶ້ນລາຍງານຕໍ່ກອງປະຊຸມຄັ້ງນີ້ວ່າ:ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ VI (2021-2025) ຂອງແຂວງ ໄດ້ດໍາເນີນໄປໃນທ່າມກາງທີ່ມີທັງກາລະໂອກາດທີ່ເອື້ອຍອຳນວຍ ແລະ ທ່າແຮງບົ່ມຊ້ອນໃນແຕ່ລະດ້ານ ທີ່ເປັນປັດໃຈຕົ້ນຕໍໃຫ້ແກ່ການຜະລິດ, ການບໍລິການ, ການລົງທຶນ, ການຄ້າ, ການຂົນສົ່ງ ແລະ ການທ່ອງທ່ຽວ, ພາຍໃຕ້ຄວາມເອົາໃຈໃສ່ນໍາພາ-ຊີ້ນໍາຂອງຄະນະບໍລິຫານງານພັກແຂວງ, ການຈັດຕັ້ງພັກ-ລັດ ທຸກຂັ້ນຕໍ່ການພັດທະນາເສດຖະກິດ-ສັງຄົມ ໄດ້ເຮັດໃຫ້ເສດຖະກິດຂອງແຂວງຍັງສືບຕໍ່ຂະຫຍາຍຕົວສະເລ່ຍໃນລະດັບ 4.8%, ເທົ່າກັບ 80% ຂອງແຜນການ ຄິດເປັນມູນຄ່າລວມ 5 ປີແມ່ນ 56,455 ຕື້ກີບ ເທົ່າກັບ 96.15% ຂອງແຜນການ. ໃນປີ 2025 ຂະຫຍາຍຕົວ 5.7% ທຽບໃສ່ປີ 2021 ເພີ່ມຂຶ້ນ 1.7% (ປີ 2021 ຂະຫຍາຍຕົວ 4%), ລາຍໄດ້ສະເລ່ຍຕໍ່ຫົວຄົນ 34.29 ລ້ານກີບ ຫຼື 1,594 ໂດລາສະຫະລັດ. ການເກັບລາຍຮັບງົບປະມາມໄດ້ 2,906.22 ຕື້ກີບ, ລື່ນແຜນການ 2 ເທົ່າ. ໃນນີ້, ພູດສູນກາງ 356.35 ຕື້ກີບ ແລະ ພູດທ້ອງຖິ່ນ 2,549.87 ຕື້ກີບ, ການຄຸ້ມຄອງລາຍຈ່າຍງົບປະມານໄດ້ 3,845.89 ຕື້ກີບ, ລື່ນແຜນການ 20.25%. ອັນພົ້ນເດັ່ນ ແມ່ນການຫັນເປັນກຸ້ມຕົນເອງດ້ານງົບປະມານຂອງແຂວງ ແລະ ການທົດລອງຢູ່ເມືອງວັງວຽງ, ເມືອງຊະນະຄາມໃນປິ 2025 ຄາດວ່າຈະເກັບລາຍຮັບໄດ້ 1,273.82 ຕື້ກີບ ແລະ ຄຸ້ມຄອງລາຍຈ່າຍໄດ້ໃນລະດັບ 1,096.01 ຕື້ກີບ ຊຶ່ງເປັນຄັ້ງທໍາອິດທີ່ແຂວງສາມາດເກັບລາຍຮັບໄດ້ເກີນດຸນລາຍຈ່າຍ.
ການລະດົມທຶນເພື່ອພັດທະນາໃນ 5 ປີ (2021-2025) ຕາມທິດ 4 ສຸມ 2 ຮັບ 1 ເອື້ອອຳນວຍໄດ້ 18,634.62 ຕື້ກີບ, ລື່ນແຜນການ 81.13%, ສະເພາະປີ 2025 ໄດ້ 5,428.13 ຕື້ກີບ, ລື່ນແຜນການ 92.50%,ຊຶ່ງໄດ້ສຸມໃສ່ປັບປຸງກໍ່ສ້າງພື້ນຖານໂຄງລ່າງ ເປັນຕົ້ນ ຂົວ-ທາງ, ຊົນລະປະທານ, ໄຟຟ້າ, ແຫຼ່ງທ່ອງທ່ຽວ ແລະ ອື່ນໆ ເພືີ່ອສ້າງພື້ນຖານເອື້ອອຳນວຍຄວາມສະດວກໃຫ້ແກ່ການພັດທະນາ. ພ້ອມກັນນີ້, ຫົວໜວ່ຍຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງກໍມີຈຳນວນເພີ່ມຂຶ້ນ.
ສຳລັບທິດທາງແຜນພັດທະນາເສດຖະກິດ-ສັງຄົມ 5 ປີຄັ້ງທີ VII (2026-2030) ສູ້ຊົນເຮັດໃຫ້ເສດຖະກິດຂອງແຂວງຂະຫຍາຍຕົວສະເລ່ຍ 6% ຕໍ່ປີ ແລະ ຮອດປີ 2030 ໃຫ້ໄດ້ 6.2%, ຄິດເປັນມູນຄ່າລວມ 5 ປີໃຫ້ໄດ້ 107,207 ຕື້ກີບ, ລາຍໄດ້ສະເລ່ຍຕໍ່ຫົວຄົນໃຫ້ໄດ້ 48.37 ລ້ານກີບ ຫຼື 2,304ໂດລາສະຫະລັດ. ໃນນີ້, ຂະແໜງກະສິກໍາຂະຫຍາຍ 4.5%, ຂະແໜງອຸດສາຫະກໍາຂະຫຍາຍຕົວ 6.7%, ຂະແໜງບໍລິການຂະຫຍາຍຕົວ 7.3% ແລະ ພາສີ-ອາກອນຂະຫຍາຍຕົວ 4.5%. ສູ້ຊົນເກັບລາຍຮັບເຂົ້າງົບປະມານໃຫ້ເພີ່ມຂຶ້ນໃນແຕ່ລະປີສະເລ່ຍ 6%-14% ທຽບໃສ່ຖານປີ 2025 ລວມ 5 ປີ ໃຫ້ບັນລຸໄດ້ 7,428.63 ຕື້ກີບ. ໃນນີ້, ພູດສູນກາງ 1,044.27 ຕື້ກີບ ແລະ ພູດທ້ອງຖິ່ນ 6,384.36 ຕື້ກີບ, ຄຸ້ມຄອງລາຍຈ່າຍມີຄວາມຮັດກຸມເພີ່ມຂຶ້ນບໍ່ເກີນ 7%/ປີ ລວມ 5 ປີໃຫ້ຢູ່ໃນລະດັບ 5,927.55 ຕື້ກີບ, ພ້ອມທັງສູ້ຊົນສ້າງເມືອງກຸ້ມຕົນເອງດ້ານງົບປະມານໃຫ້ໄດ້ 5 ເມືອງຄື: ເມືອງໂພນໂຮງ, ທຸລະຄົມ, ຫີນເຫີບ, ເຟືອງ ແລະ ເມືອງແກ້ວອຸດົມ. ສູ້ຊົນລະດົມການລົງທຶນຕາມທິດ ໃຫ້ໄດ້ 19,426 ຕື້ກີບ, ກວມເອົາ 18.12% GDP. ໃນນັ້ນ, ການລົງທຶນລັດ1,166 ຕື້ກີບ, ກວມ 6%, ທຶນຊ່ວຍເຫຼືອເພື່ອການພັດທະນາ 1,360 ຕື້ກີບ, ກວມ 7% ແລະ ການລົງທຶນເອກະຊົນພາຍໃນ ແລະ ຕ່າງປະເທດ 16,901 ຕື້ກີບ, ກວມ 87% ຂອງຄວາມຕ້ອງການທຶນທັງໝົດ.
(ແຫຼ່ງຂ່າວ: ແຂວງວຽງຈັນ)
ຄໍາເຫັນ