 |
ສຳລັບປີ GDPພາຍໃນປີ 2025 ລວມຍອດມູນຄ່າເພີ່ມລາຄາ ໃນປີ 365,435 ຕື້ກີບ,ການຂະຫຍາຍຕົວ ຂອງເສດ ຖະກິດ 4.8%; GDPຕໍ່ຫົວຄົນ 2,176 ໂດລາສະຫະລັດ,GNIຕໍ່ຫົວຄົນ 2,029 ໂດລາສະຫະລັດ.ໃນນີ້:ດ້ານກະສິກຳ ຂະຫຍາຍຕົວຢູ່ລະດັບ 3.5% ກວມເອົາ 20.3% ຂອງ GDP(ຂະແໜງການປູກຝັງຂະຫຍາຍຕົວ ເພີ່ມຂຶ້ນ 2.3%,ຂະແໜງການລ້ຽງສັດ ຂະຫຍາຍຕົວ ເພີ່ມຂຶ້ນ 5.6%,ຂະແໜງການປ່າໄມ້ ຂະຫຍາຍຕົວ ເພີ່ມຂຶ້ນ 5.5%ແລະຂະ ແໜງການປະມົງຂະຫຍາຍຕົວ ເພີ່ມຂຶ້ນ 5.3%).ດ້ານອຸດສາຫະກຳ ຂະຫຍາຍຕົວຢູ່ລະດັບ 5.1% ກວມເອົາ 32.0% ຂອງ GDP(ຂະແໜງການພະລັງງານໄຟຟ້າຂະຫຍາຍຕົວ ເພີ່ມຂຶ້ນ6.5%, ຂະແໜງການບໍ່ແຮ່ຂະຫຍາຍຕົວ ເພີ່ມຂຶ້ນ 2.6%, ຂະແໜງການອຸດສາຫະກຳປຸງແຕ່ງຂະຫຍາຍຕົວ ເພີ່ມຂຶ້ນ 5.9%ແລະ ຂະແໜງການກໍ່ສ້າງ ເພີ່ມຂຶ້ນ 5.4%).ດ້ານບໍລິການ ຂະຫຍາຍຕົວຢູ່ລະດັບ 5.2% ກວມເອົາ36.3% ຂອງ GDP(ຂະແໜງການບໍລິການ, ທີ່ພັກອາໄສ ແລະ ຮ້ານອາຫານຂະຫຍາຍຕົວ ເພີ່ມຂຶ້ນ 8.5%, ຂະແໜງການຂົນສົ່ງ ແລະສາງຂະຫຍາຍຕົວ ເພີ່ມຂຶ້ນ 10.3%, ຂະແໜງ ການຂາຍຍົກ-ຂາຍຍ່ອຍ ເພີ່ມຂຶ້ນ 5.4%ແລະຂະແໜງການອື່ນໆ ຍັງສືບຕໍ່ຂະຫຍາຍຕົວ).
ຕໍ່ບັນຫານີ້; ລັດຖະບານ ໄດ້ສຸມໃສ່ການແກ້ໄຂບັນຫາດັ່ງກ່າວ ໂດຍນໍາໃຊ້ມາດຕະການຈັດຕັ້ງປະຕິບັດໃນການສ້າງຄວາມເຂັ້ມແຂງ ໃຫ້ແກ່ການຜະລິດພາຍໃນ, ສຸມໃສ່ການຜະລິດທີ່ເປັນທ່າແຮງ ເພື່ອທົດແທນການນໍາເຂົ້າ, ສົ່ງເສີມການສົ່ງອອກສີນຄ້າ ຕິດພັນກັບການຂົນສົ່ງໂດຍສານ ຜ່ານເສັ້ນທາງລົດໄຟລາວ-ຈີນ, ສຸມໃສ່ສ້າງສະຖຽນລະພາບທາງດ້ານເງິນຕາ, ປັບປຸງນະໂຍບາຍເສດຖະກິດ-ການເງິນ, ກົນໄກການຊື້-ຂາຍເງິນຕາຕ່າງປະເທດ ຂອງລະບົບທະນາຄານ ແລະ ນະໂຍບາຍ ອື່ນໆ.
ພ້ອມນັ້ນ, ຍັງມີບັນດາແຜນງານຈຸດສຸມສ້າງພື້ນຖານໂຄງລ່າງອື່ນໆ ເພື່ອສົ່ງເສີມການຜະລິດອຸດສາຫະກໍາ ເພື່ອສົ່ງອອກ ຊຶ່ງເຮັດໃຫ້ເສດຖະກິດຂອງລາວ ໂດຍລວມຍັງມີການຂະຫຍາຍຕົວ; GDPປີ 2025 ຂະຫຍາຍຕົວຢູ່ໃນລະດັບ 4.8%, (ປີ 2024 ຂະຫຍາຍຕົວ 4.3%)ແລະ ຄາດຄະເນເບື້ອງຕົ້ນຂອງຕົວເລກ GDP 2026 ຄາດວ່າຈະຂະຫຍາຍຕົວ ຢູ່ໃນລະດັບ 5.1%.
ເພື່ອບັນລຸຄາດໝາຍ GDPໃນລະດັບ 5.1%,ໃນວັນທີ 30.1.26,ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ຊີ້ໃຫ້ເຫັນບັນດາສິ່ງທ້າທາຍ ທີ່ຕ້ອງໄດ້ສືບຕໍ່ແກ້ໄຂຢ່າງຈິງຈັງ ຕໍ່ອັດຕາເງິນເຟີ້ ແລະ ລາຄາສິນຄ້າທີ່ຍັງສູງ, ອັດຕາແລກປ່ຽນທີ່ຜັນຜວນ, ຍັງມີການຮົ່ວໄຫຼ ແລະ ການຍົກເວັ້ນ ພາສີ-ອາກອນ ທີ່ບໍ່ຖືກຕ້ອງ ຕາມກົດໝາຍ, ລະດັບໜີ້ສິນສາທາລະນະ ຍັງສູງ ແລະ ການປະຕິຮູບລັດວິສາຫະກິດ ຍັງຊັກຊ້າ.
ສະນັ້ນ,ເພື່ອເປັນບ່ອນອີງໃນການເລີ່ມຕົ້ນແຜນພັດທະນາເສດຖະກິດ-ສັງຄົມ5 ປີ ຄັ້ງທີ X (2026- 2030)ທ່ານນາຍົກ ໄດ້ເນັ້ນໜັກວຽກງານບູລິມະສິດ ສ້າງເສດຖະກິດ ເອກະລາດເປັນເຈົ້າຕົນເອງ (ສອຈ):1. ຕ້ອງຜັນຂະຫຍາຍມະຕິ 04/ກມສພ ໃຫ້ເປັນຮູບປະທຳ ໂດຍການຊຸກຍູ້ການຜະລິດພາຍໃນເພື່ອທົດແທນການນຳເຂົ້າ ແລະ ສ້າງມູນຄ່າເພີ່ມໃຫ້ແກ່ສິນຄ້າສົ່ງອອກປະຕິຮູບການເກັບລາຍຮັບສູ່ດີຈີຕອນ;2. ເລັ່ງຫັນເປັນທັນສະໄໝຢ່າງຮອບດ້ານ ເຊື່ອມຕໍ່ຖານຂໍ້ມູນ ລະຫວ່າງ ຂະແໜງການ ເລັ່ງເກັບອາກອນຈາກທຸລະກິດດີຈີຕອນຂ້າມຊາດ ແລະການຄ້າອອນລາຍ ພ້ອມທັງຄົ້ນຄວ້າເກັບອາກອນສິ່ງແວດລ້ອມ ແລະ ອາກອນທີ່ດິນຄືນໃໝ່;3. ຄຸ້ມຄອງລາຍຈ່າຍ ແລະ ໜີ້ສິນ ປະຕິບັດນະໂຍບາຍປະຢັດຢ່າງເຂັ້ມງວດ ຢຸດຕິການກູ້ຢືມ ທີ່ບໍ່ມີປະສິດທິຜົນ ແລະ ຮັບປະກັນງົບປະມານ ສຳລັບການເພີ່ມເງິນເດືອນໃຫ້ພະນັກງານ-ລັດຖະກອນ;4. ປັບປຸງລັດວິສາຫະກິດ, ເລັ່ງປະຕິຮູບລັດວິສາຫະກິດ ໃຫ້ມີກຳໄລ ແລະປະກອບສ່ວນເຂົ້າງົບປະມານ ໃຫ້ໄດ້ຢ່າງໜ້ອຍ 1% ຂອງ GDPຍົກສູງຈັນຍາບັນພະນັກງານການເງິນຕ້ອງມີຄວາມຊື່ສັດ ຮັກວິຊາຊີບ ແລະ ເດັດຂາດໃນການບັງຄັບໃຊ້ກົດໝາຍເພື່ອສະກັດກັ້ນການສໍ້ລາດບັງຫຼວງ;5. ຮຽກຮ້ອງໃຫ້ທຸກພາກສ່ວນຈົ່ງຍົກສູງຄວາມຮັບຜິດຊອບທາງການເມືອງ ເພີ່ມທະວີຄວາມສາມັກຄີ ແລະ ປະສານສົມທົບກັນຢ່າງກົມກຽວ ເພື່ອເຮັດໃຫ້ແຜນງົບປະມານປີ 2026 ບັນລຸຄາດໝາຍລາຍຮັບ ທີ່ວາງໄວ້.
(ຂ່າວ: ຣັດສະໝີ ດວງສັດຈະ)
ຄໍາເຫັນ