ພາຍຫັງສຳເລັດການຍື່ນສານ, ທ່ານ ເອກອັກຄະລັດຖະທູດ ໄດ້ຮັບກຽດພົບປະກັບ ເຈົ້າຊາຍ ອາລົວ ດ້ວຍບັນຍາກາດທີ່ດີ ແລະ ໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດ ຈາກພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄປຍັງພະລາຊາ ຮັນຊ ອາດາມ ທີ II ກໍຄືເຈົ້າຊາຍ ອາລົວ ແລະ ສະມາຊິກຄອບຄົວລາດຊະວົງ ພ້ອມທັງລັດຖະບານ ແລະ ປະຊາຊົນເລັກເຕິນສະເຕນ ທຸກຖ້ວນໜ້າ. ພ້ອມກັນນັ້ນ, ທ່ານ ດາວວີ ວົງໄຊ ຍັງໄດ້ແຈ້ງສະພາບການພັດທະນາເສດຖະກິດ-ສັງຄົມ ຂອງ ສປປ ລາວ ກໍຄື ຄວາມພະຍາຍາມ ຂອງລັດຖະບານ ເພື່ອນໍາພາປະເທດໃຫ້ຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ໃນປີ 2026 ລວມທັງການຟື້ນຟູເສດຖະກິດ-ສັງຄົມ ທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19, ຜົນກະທົບຈາກໄພພິບັດທຳມະຊາດ ແລະ ສະພາບການຂອງໂລກທີ່ພວມຜັນແປຢ່າງໄວວາ.
ໃນໂອກາດດັ່ງກ່າວ, ເຈົ້າຊາຍ ອາລົວ ແຫ່ງ ເລັກເຕິນສະເຕນ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ທ່ານ ດາວວີ ວົງໄຊ ທີ່ໄດ້ມາດໍາລົງຕໍາແໜ່ງເປັນເອກອັກຄະລັດຖະທູດ ແຫ່ງ ສປປ ລາວ ຄົນໃໝ່ ປະຈໍາ ເລັກເຕິນສະເຕນ ພ້ອມທັງສະແດງຄວາມສົນໃຈຕໍ່ການພັດທະນາ ແລະ ສະພາບໄພພິບັດທາງທຳມະຊາດທີ່ເກີດຂຶ້ນຢູ່ ສປປ ລາວ. ພ້ອມກັນນີ້, ເຈົ້າຊາຍ ອາລົວ ກໍໄດ້ຝາກຄວາມຢື້ຢາມຖາມຂ່າວ ເຖິງປະທານປະເທດ ແລະ ການນຳຂອງ ສປປ ລາວ.
ທັງສອງຝ່າຍ ຍັງໄດ້ປຶກສາຫາລືກ່ຽວກັບການສົ່ງເສີມການຮ່ວມມືໃນຂະແໜງທີ່ເປັນທ່າແຮງຂອງສອງປະເທດ ກໍຄືການຮ່ວມມືໃນຂອບອົງການສະຫະປະຊາຊາດ ໂດຍສະເພາະການສະໜັບສະໜູນເຊິ່ງກັນ ແລະ ກັນ ຂອງບັນດາປະເທດນ້ອຍ ໃນເວທີສາກົນ.
ໃນໄລຍະກ່ອນການຍື່ນສານຕາຕັ້ງ, ທ່ານ ດາວວີ ວົງໄຊ ກໍໄດ້ເຂົ້າຢ້ຽມຂໍ່ານັບ ທ່ານ ນາງ ຊາບີນໂມໂນນີ (Sabine Monauni) ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ, ສິ່ງແວດລ້ອມ ແລະ ວັດທະນະທຳ ແຫ່ງ ເລັກເຕິນສະເຕນ ແລະ ໄດ້ຍື່ນສຳເນົາສານຕາຕັ້ງ ພ້ອມທັງໄດ້ປຶກສາຫາລື ກ່ຽວກັບການຄົ້ນຄວ້າຊອກຫາຊ່ອງທາງເພື່ອສົ່ງເສີມການຮ່ວມມືທັງໃນຂອບສອງຝ່າຍ ແລະ ຫຼັາຍຝ່າຍໃຫ້ດີຍິ່ງຂຶ້ນ ພາຍຫຼັງທີ່ມີການສ້າງຕັ້ງສາຍພົວພັນການທູດນຳກັນມາແຕ່ວັນທີ 8 ມັງກອນ 2014 ເປັນຕົ້ນມາ.
(ຂ່າວ: ກຕທ)
ຄໍາເຫັນ