ລົງເລິກການຮ່ວມມືລະຫວ່າງສະຖາບັນກັບວິສາຫະກິດ

 

 

ສະຖາບັນຂົງຈື ໄດ້ຮ່ວມມືກັບ ບໍລິສັດ ຊີຈີເອັນເອເນີຈີ ເຕັກໂນໂລຊີ (ລາວ) ຈຳກັດ ໃນປີ 2024, ໂດຍອີງໃສ່ມາດຕະຖານຄວາມຕ້ອງການຄວາມສາມາດດ້ານພາສາຈີນຂອງບໍລິສັດ ຈຶ່ງໄດ້ສ້າງຫຼັກສູດຝຶກອົບຮົມເປັນເວລາ 10-12 ເດືອນ. ໂຄງການດັ່ງກ່າວນີ້ ແມ່ນ ຝຶກອົບຮົມຢ່າງເປັນລະບົບ, ສ້າງບຸກຄະລາກອນທ້ອງຖິ່ນທີ່ມີຄວາມສາມາດສື່ສານດ້ານພາສາຈີນ ແລະ ມີຄວາມສາມາດ ດ້ານວິຊາສະເພາະວິສະວະກໍາໄຟຟ້າ, ຜ່ານໂຄງການນີ້ຈະເຮັດໃຫ້ນັກສຶກສາຈຳນວນ 34 ຄົນກໍາແໜ້ນຄວາມຮູ້ດ້ານວິສະວະກໍາໄຟຟ້າ ແລະ ຄວາມສາມາດໃນການສື່ສານພາສາຈີນໄປພ້ອມກັນ; ເມື່ອສິ້ນສຸດໂຄງການຝຶກອົບຮົມນັກສຶກສາດັ່ງກ່າວຈະໄດ້ຮັບບຸລິມະສິດໃນການເຂົ້າເຮັດວຽກນຳບໍລິສັດ ຊຶ່ງຈະເປັນກໍາລັງສໍາຄັນຂອງບໍລິສັດ ແລະ ເປັນກໍາລັງສະໜັບສະໜູນການພັດທະນາທຸລະກິດໃນທ້ອງຖິ່ນໃຫ້ມີຄວາມໝັ້ນຄົງ.

ນອກຈາກນີ້, ສະຖາບັນຂົງຈືຍັງມີການປະສານພົວພັນສະໜິດແໜ້ນກັບຫົວໜ່ວຍທຸລະກິດຕ່າງໆ, ປະສານສົມທົບກັນສ້າງຫຼັກສູດທີ່ແທດເໝາະກັບຄວາມຕ້ອງການຕົວຈິງຂອງສັງຄົມ ຊຶ່ງຍົກລະດັບການເປັນຜູ້ນຳໜ້າຂອງຫຼັກສູດໃນດ້ານການນໍາໃຊ້ ແລະ ການຈ້າງງານ. ການຝຶກອົບຮົມ “ຫຼັກສູດກຳນົົດສະເພາະ” ແບບນີ້ບໍ່ພຽງແຕ່ເປັນການຍົກສູງຄວາມສາມາດໃນການແຂ່ງຂັນໃນການຈ້າງງານເທົ່ານັ້ນ, ແຕ່ຍັງເປັນການພັດທະນາບຸກຄະລາກອນທ້ອງຖິ່ນທີ່ມີຄຸນນະພາບສູງ, ທັງຊຸກຍູ້ການປະສານສົມທົບກັນລະຫວ່າງການສຶກສາ ແລະ ຫົວໜ່ວຍທຸລະກິດໃຫ້ລົງເລິກຍິ່ງໆຂຶ້ນ.

ສະຖາບັນຂົງຈື ໄດ້ປະຕິບັດບົດບາດໃນການຝຶກອົບຮົມ “ພາສາຈີນ ເຕັກນິກວິຊາຊີບ” ຂອງຕົນໃຫ້ກັບສັງຄົມຢ່າງເຕັມຄວາມສາມາດ ຊຶ່ງໄດ້ສົ່ງເສີມໃຫ້ມີການຝຶກທັກສະຝີມືດ້ານວິຊາຊີບກ່ຽວກັບການໃຊ້ຕົວຈິງ ແລະ ສົ່ງເສີມການພັດທະນາບຸກຄະລາກອນໃນທ້ອງຖິ່ນ. ສະຖາບັນຂົງຈື ໄດ້ຮ່ວມມືກັບພາກສ່ວນທີ່ກ່ຽວຂ້ອງສ້າງສູນສິດສອນພາສາຈີນຈຳນວນຫຼາຍແຫ່ງໃນແຂວງຫຼວງພະບາງ ຊຶ່ງໄດ້ມີການຈັດຝຶກອົບຮົມດ້ານເຕັກນິກໃນໄລຍະສັ້ນໃນຂົງເຂດກະສິກຳ, ການເງິນ, ການແພດ, ການລົດໄຟ ແລະ ອື່ນໆ ສາມາດຕອບສະໜອງຄວາມຕ້ອງການຂອງອົງກອນ ແລະ ທຸລະກິດໄດ້ເປັນຢ່າງດີ.

ໃນຂະແໜງກະສິກຳ, ສະຖາບັນຂົງຈື ໄດ້ຮ່ວມມືກັບວິທະຍາໄລກະສິກໍາ ແລະ ປ່າໄມ້ພາກເໜືອ ເປີດການຝຶກອົບຮົມພາສາຈີນ ການປ້ອງກັນພືດ”, “ພາສາຈີນ ການປ້ອງກັນແມງໄມ້ ແລະ ພະຍາດ, ພາສາຈີນ ນິເວດກະສິກຳ” ເປັນຕົ້ນ. ໃນຂະແໜງການເງິນ, ໄດ້ຮ່ວມມືກັບວິທະຍາໄລການເງິນພາກເໜືອ ເປີດການຝຶກອົບຮົມ ພາສາຈີນ ການຄ້າທາງເອເລັກໂຕນິກ” ແລະ ພາສາຈີນ ການບໍລິຫານການເງິນ. ນອກຈາກນັ້ນ, ຍັງເປີດຝຶກອົບຮົມ ພາສາຈີນ ເຕັກນິກການແພດ, ພາສາຈີນ ການລົດໄຟ ແລະ ອື່ນໆ ສາມາດຕອບສະໜອງບຸກຄະລາກອນທີ່ມີຄວາມສາມາດດ້ານເຕັກນິກ ແລະ ວິຊາສະເພາະສະໜອງໃຫ້ຂົງເຂດການແພດ, ທະນາຄານ, ທາງລົດໄຟ ແລະ ອື່ນໆ. ນັບແຕ່ ປີ 2019 ເປັນຕົ້ນມາສະຖາບັນຂົງຈື ໄດ້ຮ່ວມມືກັບໂຮງງານປະສານເຫຼົ່າຫຼວງພະບາງ ເປີດການຝຶກອົບຮົມ ພາສາຈີນ ວິສະວະກໍາກົນຈັກ. ຮ່ວມມືກັບພະແນກປະຕິບັດການ ແລະ ບໍາລຸງຮັກສາໂຄງການໄຟຟ້າເຂື່ອນນ້ຳອູຂອງກຸ່ມບໍລິສັດ ພາວເວີຊາຍນາ ເປີດການຝຶກອົບຮົມ ພາສາຈີນ ວິສະວະກໍາໄຟຟ້າສໍາເລັດໄປ ແລ້ວ 2 ຊຸດ ຈຳນວນ 58 ຄົນ ໄດ້ກາຍເປັນພະນັກງານທ້ອງຖິ່ນທີ່ກຳແໜ້ນດ້ານເຕັກນິກ ແລະ ຄວາມສາມາດດ້ານພາສາຈີນ ທີ່ມີປະສິດທິພາບໃນການເຮັດວຽກສູງ ແລະ ໄດ້ໄປປະຕິບັດໜ້າທີ່ຢູ່ເຂື່ອນໄຟຟ້ານ້ຳອູ ນັບແຕ່ເຂື່ອນທີ 1 ຮອດເຂື່ອນທີ 7. ນອກຈາກນີ້, ເພື່ອຕອບສະໜອງຄວາມຕ້ອງການດ້ານການເງິນ ແລະ ດ້ານການຄ້າທີ່ກຳລັງພັດທະນາຢ່າງຕໍ່ເນື່ອງນັ້ນ, ສະຖາບັນຂົງຈື ກໍໄດ້ຮ່ວມມືກັບທະນາຄານລາວ - ຈີນ ເພື່ອສ້າງສູນຝູ້ຕຽນ ຂຶ້ນ ເພື່ອຂະຫຍາຍການຝຶກອົບຮົມ ພາສາຈີນ ການເງິນການທະນາຄານ, ພາສາຈີນ ການຄ້າທາງເອເລັກໂຕຣນິກ, ຜັນຂະຫຍາຍ ໂຄງການຝຶກອົບຮົມຕົວແບບ “ພາສາຈີນ ເຕັກນິກວິຊາຊີບ” ໃຫ້ມີຫຼາກຫຼາຍສາຂາຍິ່ງຂຶ້ນ. ໂຄງການນີ້ບໍ່ພຽງແຕ່ເປັນການສ້າງບຸກຄະລາກອນໃຫ້ຂະແໜງການຕ່າງໆເທົ່ານັ້ນ, ມັນຍັງເປັນສັນຍາລັກແຫ່ງຄວາມກ້າວໜ້າອັນສໍາຄັນໃນຂະບວນການສົ່ງເສີມການຮ່ວມມືດ້ານການສຶກສາ, ການເງິນ ແລະ ອື່ນໆລະຫວ່າງລາວ-ຈີນ ອີກດ້ວຍ.