ທ່ານ ອານຸສອນ ຄູນສົມບັດ ຮັກສາການຫົວໜ້າກົມຊົນລະປະທານ ໃຫ້ສຳພາດຕໍ່ນັກຂ່າວໜັງສືພິມປະຊາຊົນທີ່ກົມຊົນລະປະທານ ເມື່ອບໍ່ດົນຜ່ານມາວ່າ: ເພື່ອຮັບມືຕ້ານໄພພິບັດທາງທຳມະຊາດ ກໍຄື ໄພນ້ຳຖ້ວມ ໃນໄລຍະລະດູຝົນ; ກົມຊົນລະປະທານ ໄດ້ລົງສົມທົບກັບທ້ອງຖິ່ນ ກວດກາຈຸດຫຼໍ່ແຫຼມ ທີ່ມີຄວາມສ່ຽງນໍ້າໄຫຼເຂົ້າພື້ນທີ່ການຜະລິດ ໃຫ້ມີຄວາມຮັບປະກັນ ເຊັ່ນ: ຈຸດຄູປ້ອງກັນນໍ້າຖ້ວມ, ລະບົບປິດ-ເປີດປະຕູນໍ້າ ແລະ ລະບົບຈັກສູບ, ລະບາຍນໍ້າສຸກເສີນ ທີ່ໄດ້ຕິດຕັ້ງໄວ້ຕາມສາຍຫ້ວຍຕ່າງໆ ຄື: ຈຸດຫ້ວຍໝາກຮຽວ, ຈຸດຫ້ວຍເດື່ອ, ຫ້ວຍວັງໂພ, ຫ້ວຍນໍ້າເຄັມ ແລະ ຈຸດອື່ນໆ ໃນຂອບເຂດທົ່ວປະເທດ. ຕິດຕາມຂໍ້ມູນຂ່າວສານສະພາບການປ່ຽນແປງດິນຟ້າອາກາດ ໂດຍສົມທົບກັບກົມອຸຕຸນິຍົມ ແລະ ອຸທົກກະສາດ ເພື່ອອອກແຈ້ງການເຖິງຂະແໜງຊົນລະປະທານແຂວງ, ນະຄອນຫຼວງວຽງຈັນ ເພື່ອແຈ້ງຕໍ່ໃຫ້ອໍານາດການປົກຄອງບ້ານ ແລະ ກຸ່ມຊາວນາ ກະກຽມຄວາມພ້ອມຮັບມືກ່ອນການເກີດພາຍຸຝົນຕົກໜັກ ໃຫ້ມີສະຕິເຝົ້າລະວັງ, ກຽມພ້ອມຮັບມືຕໍ່ສະພາບນໍ້າຖ້ວມກະທັນຫັນ, ນໍ້າປ່າໄຫຼຊຸແຮງ, ດິນເຈື່ອນຈາກຝົນຕົກໜັກ, ຕິດຕາມປ້ອງກັນການເວນຍາມ, ເຝົ້າລະວັງຢ່າງໃກ້ຊິດ ສະພາບການຂຶ້ນ-ລົງ ຂອງລະດັບນໍ້າ, ແມ່ນໍ້າຂອງ ແລະ ແມ່ນໍ້າສາຂາທົ່ວປະເທດ ທີ່ອາດຈະສົ່ງຜົນກະທົບຕໍ່ພື້ນຖານໂຄງລ່າງຊົນລະປະທານ.
ແຜນໃນຕໍ່ໜ້າ ເພື່ອຮັບມືຕ້ານແລ້ງ-ຕ້ານຖ້ວມ, ກົມຊົນລະປະທານ ຈະປະສານສົມທົບ ກັບຂະແໜງຊົນລະປະທານແຂວງ, ນະຄອນຫຼວງວຽງຈັນ, ຫ້ອງການກະສິກຳ ແລະ ສິ່ງແວດລ້ອມເມືອງ ຮ່ວມກັນກວດກາຈຸດຫຼໍ່ແຫຼມ ທີ່ມີຄວາມສ່ຽງນໍ້າໄຫຼເຂົ້າພື້ນທີ່ການຜະລິດ ໃຫ້ມີຄວາມຮັບປະກັນ; ພ້ອມກັນນັ້ນ, ສຸມໃສ່ຕິດຕາມກວດກາປະຕູນໍ້າ, ຄູກັນນໍ້າ, ລະບົບລະບາຍ ແລະ ບົວລະບັດຮັກສາລະບົບຊົນລະປະທານ ໃຫ້ຢູ່ໃນສະພາບກຽມພ້ອມໃຊ້ນໍ້າໄດ້ຕະຫຼອດເວລາ ເພື່ອຮັບປະກັນການເກັບກັກນໍ້າ ໃນກໍລະນີເກີດມີໄພແຫ້ງແລ້ງ ແລະ ລະບາຍນໍ້າອອກກໍລະນີມີນໍ້າຖ້ວມຂັງ. ນອກນັ້ນ, ຈະໄດ້ກວດກາ ແລະ ກະກຽມຄວາມພ້ອມຂອງຈັກສູບນໍ້າຂະໜາດ 65 ແຮງມ້າ ຕິດລໍ້ເຄື່ອນທີ່ ຈໍານວນ 17 ຊຸດ ທີ່ໄດ້ມອບໃຫ້ທ້ອງຖິ່ນ ແລະ ລົດໃຫຍ່ຕິດປໍ້າເຄື່ອນທີ່ຈໍານວນ 7 ຄັນ (ປະຈຳຢູ່ແຂວງພາກເໜືອ 1 ຄັນ (ຢູ່ແຂວງໄຊຍະບູລີ), ຢູ່ບັນດາແຂວງທາງພາກໃຕ້ 1 ຄັນ (ຢູ່ແຂວງຈຳປາສັກ), ຢູ່ນະຄອນຫຼວງວຽງຈັນ 1 ຄັນ ແລະ ປະຈຳຢູ່ກົມຊົນລະປະທານ 4 ຄັນ.
ທັງໝົດນີ້, ກໍແມ່ນແຜນກະກຽມຄວາມພ້ອມຮອບດ້ານ ເພື່ອຮັບມືກັບໄພພິບັດທາງທຳມະຊາດ ທີ່ອາດເກີດຂຶ້ນໃນໄລຍະລະດູຝົນປີນີ້ ແລະ ທັງມີແຜນການຮອງຮັບໃນຕໍ່ໜ້າ ເພື່ອຮັບມືຕ້ານແລ້ງ-ຕ້ານຖ້ວມ ຮັບປະກັນໃຫ້ຊົນລະປະທານສາມາດລະບາຍນໍ້າໄດ້ຍາມມີນໍ້າຫຼາຍ ແລະ ມີນໍ້າໄວ້ສະໜອງໃນເວການເຮັເດການຜະລິດລະດູແລ້ງ.
ຄໍາເຫັນ